JW subtitle extractor

Mișto avilean co JW Broadcasting!
Ande cado șion va dichasa so miștimata si amen cana folosisaras ande iech modo goghiaver amari goghi.
Va dichasa sar dui familii sas-le binecuvântime anda codoia că sicade iubirea hai dine buhle vastența.
Va avela te hachiaras sar o Iehova ujiarel fiesaves mașcar amende, tha vi pesca organizația hai so miștimata si amen.
Hai va avela te dichas sar o Iehova binecuvântil amari familia cana șioas-les po iechto than ande amari viața.
Bucurin tumen anda cadai emisiunea!
„Sar te sicavas goghiaverimos cana alosaras so te încăras andi goghi?”
Anda cadaia das duma. Daștil-pe că phenas amenghe: „Me ci daștiv te cherav cadaia”.
Hai daștil te avel tumen ciacimos.
Tha daisaras te las sama ca le buchia cai sea o timpo aven ande amari goghi.
Te dichas so sichioas le Iehovastar cana alosaras so te încăras andi goghi.
Mai dur va dichasa sar ajutil amen cadaia te sicavas iubirea hai te slujisaras averenghe.
So alosarel o Iehova te anel pesche amintea anda amende?
Mangav tumen te pâtren ande iech than manța co Evrei 6:10.
Cade citisaras:
„Că o Del na-i neorta caște bâstrel tumari buchi hai i iubirea cai sicadean-la anda lesco anav
cana slujisardean codolenghe sfinți hai cheren cadaia vi mai dur”.
Dichlean so anel pesche amintea o Iehova?
Vo dichel le șucar buchia cai cheras-len.
Andi nota de telal anda cado verseto andi șib engleza phenel-pe:
„Dacă o Iehova avelas te bâstrel le lașe buchia cai cheras-len, avelas te phenel anda peste că silo neorta”.
So șucar sicaven cadal dumes sar o Iehova lel sama amendar.
Da, vo prinjianel amen mișto, dichel vi amare greșeli, tha vi amare păcatea.
Tha vo alosarel te na gândil-pe ca so cheras nasul.
Gândin tumen: Amari goghi daștil te avel sar iech biblioteca. O Iehova prinjianel fiesavo lil cai si andi biblioteca.
Si sar cana ande chichiva lila si scriime amare greșeli hai păcatea hai ande aver, le buchia lașe cai cheras-len.
O Iehova jianel mișto save si le lila ande save si amare păcatea.
Tha vo alosarel te citil le lila ande save si scriime le lașe buchia cai cheras-len.
Sar te las amen pala o Iehova cana alosaras ca so te anas amenghe amintea?
Te risaras amen parpale co Evrei 6:10, hai te dichas dui buchia savende trebul te gândisaras amen.
I iechto: I iubirea savi sicavas-la anda o anav le Iehovasco.
Si iech bari pachiv te phiravas lesco anav, tha trebul te cheras sea so daisaras caște avel mișto dichlo le manușendar.
Prin o modo sar das duma, hureavas amen hai phiravas amen averența,
sicavas dacă anas pachiv sau lajiav po anav le Iehovasco.
Ando 1 Corinteni 10:31 sicavel-pe că trebul te cheras sea le buchia caște anen pachiv le Devlesche.
Camas ca sea le manușa te jianen că o anav le Iehovasco silo sfânto hai importanto anda amende.
Sicavas că iubisaras o anav le Devlesco vi cana das duma averența anda leste.
Cadaia însemnol te predichisaras.
Cadea că, te avas sea mai lașe andi buchi le Devleschi, trebul te avas mișto pregătime.
Si mișto te astaras te das duma le manușența andai Biblia, tha camas vi te zuriaras-len prin so phenas lenghe.
Mai but, camas te avas pregătime te das duma oricai sam.
Daisaras te șioas amenghe andi goghi te cheras mai but anda o Iehova hai cana daștil-pe,
te das sea amari zor te jias andi predicarea ande fiesavo curco.
Camas te cheras „sea le buchia anda o drago la vesteachi lași” hai te sicavas chichi de but iubisaras le Iehovas hai lesco anav.
I duito buchi savi dichleam-la ando Evrei 6:10 hai pe savi trebul te las sama si „te slujisaras codolenghe sfinți”.
„Codola sfinți” si le phrala machle le Isusosche.
Le anglune creștini slujisarde lenghe phralenghe machle prin mai but buchia.
Cana nachle prin pharimata, le phrala dine-len so sas-len nevoia.
O Pavel așardea-len anda codoia că sas-le pașa penghe phrala hai cherenas cadaia vi mai dur.
Vi amen ajutil amen aghies so si scriime ando Evrei 6:10.
Te na bâstras. Te cheras so si mișto anda aver.
Bucurisaras amen cana aver sile lașe amența, tha sam vi mai bucurime cana amen das buchle vastența anda iubirea.
Daisaras te cheras but buchia anda aver.
Sar exemplo, daisaras te ajutisaras-len cana das-len haben,
hureaimata hai primisaras-len ande amare chăra cana nachen prin iech dezastro, cana sile nasfale sau cana sile persecutime.
Iech aver buchi si te așiaras hai te zuriaras amare phralen.
Tha iech buchi vi mai importanto si te mangas amen anda amare phrala.
So sichileam ji acana? Savore daisaras te cheras so phenel-pe andel Proverbe 3:27.
Cade phenel-pe:
„Cana așel ande chio zuralimos te ajutisares-len, na încăr tut parpale te cheres mișto codolenghe cai silen nevoia”.
Cana gândisaras amen ca i iubirea anda o anav le Devlesco
hai te ajutisaras averen sicavas că anas amenghe amintea le buchia mai importanto.
Poiechdata si amenghe pharo, anda codoia că anas amenghe amintea le buchia cai camas te bâstras-len.
Vi mai but, cana varecon cărdea amenghe iech neortomos sau phiradea-pe nasul.
Numai cana gândisaras amen ca codo manuș hai ca so cărdea amenghe, amaro ilo pherdiol holiatar.
Pachias că ci va paruvela-pe hai si pharo te bâstras so cărdea amenghe.
Te dichas dui exemplea.
Te das duma anda o David hai anda o Șimei.
O Șimei sas neamo le regesa Saul,
vo sas-lo holiardo but bărșa po David anda codoia că chonic anda o neamo le Saulosco ci mai daștilas te avel rege.
Ando 2 Samuel o capitolo 16 phenel-pe că o Șimei șiudea barrența anda o David hai lesche manușa hai dea-les armai.
O Șimei ci sicadea lenghe pachiv.
Anda codoia o Abișai phendea le Davidosche te mechel-les te mudarel-les.
Tha o David ci mechlea-les.
Vo ci risardea o nasulimos, mechlea-les andel vasta le Iehovasche.
Hai cadea o David ci holiardea-pe hai încărdea-pe parpale.
Pala iech timpo, cana o David risardea-pe co trono, le Șimeiosche falea lesche pharo hai manglea pesche iertarea.
Tha o Abișai camlea pale te mudarel-les. O David ci mechlea-les.
Vo chiar solahardea că ci va avela te mudarel le Șimeios.
O David bucurisardea o ilo le Iehovasco anda sar lașiardea cado nasulimos.
Aven te dichas, so phendea o David le Solomonosche angla te merel anda o 1 Regi 2:8, 9:
„Sa cadea, tusa silo o Șimei, o șiavo le Gherasco, o beniaminito anda Bahurim.
Vo dea man armaia, phendea manghe phare dumes, ando ghies cana gălemas co Mahanaim.
Tha, cana avilea angla mande co Iordano, solahardem lesche po Iehova: «Ci va avela te mudarav tut la sabiasa».
Acana, na mech-les bi te pochinel anda so cărdea,
anda codoia că san iech manuș goghiaver hai jianes so trebul te cheres lesche.
Te șios ando Mormânto lesche parne bala pherde rat”.
Daștil-pe că le Davidos sas-les cam 60 bărșa cana o Șimei dea-les armai.
Vo mulea cam ca 70 bărșa.
Cadea că, cam 10 bărșa, o David gândisardea-pe but ca so cărdea lesche o Șimei hai ci bâstărdea-les.
I Biblia ci phenel amenghe sostar o David cărdea cadaia.
Cana varecon phiravel-pe amența bi lașimasco hai cherel amenghe iech neortomos cadea sar dichleam,
daștil te avel amenghe pharo te nachas părdal, chiar cana ande codo momento phiradeam amen șucar.
Daștil-pe că pala but bărșa încă simțosaras amen duchade.
So ajutil amen te iertisaras codoles cai greșisardea amenghe hai te na mai anas amenghe amintea so cărdea?
Acana te gândisaras amen sar o Isus phiradea-pe le Petrosa.
Andi riat, angla te avel astardo, o Petru phendea le Isusosche că niciechdata ci avelas te mechel-les.
Cu sea cadala, pala numai chichiva ceasuri, o Petru phendea trin-var că ci prinjianel le Isusos.
Gândin tumen: Ande codol momentea o Isus nachlea prin le mai cale ghiesa.
Cana sas-les nevoia de o mai baro ajutorii, lesche discipoli hai lesco mai lașio amal, o Petru, mechle-les.
Pala so dea peschi seama so cărdea, vo astardea te rovel hai simțosardea că i doș halea lesco ilo.
Tha sar phiradea-pe o Isus lesa?
Cadea sar dichas ando 1 Corinteni 15:5,
o Isus ci sicadea-pe lesche caște doșarel-les hai te phenel lesche că ci mai pachial-pe ande leste.
Caște dichas so întâmplosardea-pe mai dur, te citisaras o Marcu 16:7.
Te dichas so phendea o îngero le jiuvleanghe cai avile co mormânto le Isusosco:
„Acana jian hai phenen lesche discipolenghe hai le Petrosche:
«Vo jial angla tumende andi Galileea. Va dichena-les code, cadea sar phendea tumenghe»”.
Andi nota de tela anda cado verseto phenel-pe:
„Angla ca o Isus te sicavel-pe pesche dicipolenghe, vo sicadea-pe le Petrosche cana sas-lo corcoro.
O Isus cărdea pesche timpo ande iech modo specialo anda o Petru cadea sar sicaven vi le dumes le îngerosche.
Sea cadala cărde le Petros te pachial că sas-lo iertime chiar cana phendea trin-var că ci prinjianel le Isusos”.
Te gândisaras amen chichi de mișto simțosardea-pe o Petru.
Si ciaces, o Isus ci bâstărdea so cărdea.
Tha vo alosardea te anel pesche amintea le șucar buchia cai cărdea-len o Petru.
O Isus na numai iertisardea le Petros, tha vi dea-les i pachiv te zuriarel pesche phralen.
So lașio exemplo mechlea amenghe!
Dacă vi tut duchadea tut varecon pașiardo, le tut pala o Isus hai an tuche amintea le lașe buchia.
Sar mai daisaras te folosisaras amari goghi ande iech modo goghiaver?
Aven te das duma pale anda o David. Vo andea pesche amintea sar o Iehova salvisardea-les hai sas-lo pașa leste.
Cadala ajutisarde-les te pachial că daștil te nachel părdal orisavo pharimos.
Te dichas lesche dumes anda o Psalmo 27:2, 3.
„Cana le manușa nasul avile contra mande caște han man,
codola cai sas manghe contra hai mânre dușmani sas codola perade hai pele tele.
Vi cana iech armata avelas contra mande, mânro ilo ci daralas.
Vi cana iech marimos avelas contra mande, sa pherdo pachiamos avilemas”.
Dichlean so phendea o David: „Mânro ilo ci daralas”.
„Sa pherdo pachiamos avilemas”.
Daștil te avel amen sa cado baro pachiamos sar le Davidos?
Da, cana folosisaras amari goghi goghiaverimasa.
Sar exemplo, nachlean vi tu prin iech baro pharimos hai manglean le Iehovas te ajutil tut
hai pala codoia dichlean sar dea tut goghiaverimos hai zuralimos sau dichlean sar lașiardea vo le buchia?
Te na bâstres nichiechdata cadaia.
Sau camlean te cheres mai but andi buchi le Iehovaschi hai dichlean sar o Iehova duriardea le phare buchia cai așiavenas tut te cheres so șiutean ande chi goghi?
Te na bâstres nici cadaia.
Ande amari viața va avela te cheras amenghe but amintiri.
Cana anas amenghe amintea le buchia prin save nachleam,
te gândisaras amen ca le șucar calități cai si amare phralen hai ca lenghe lașe buchia cai cărde-len.
Cana dichas so si amen ando ilo, te șiudas avri anda leste so si nasul, sar avelas i invidia, i holi
hai te bariaras mai dur șucar calități, sar si i iubirea hai i iertarea.
Te anas amenghe amintea sar ajutisardea amen o Iehova andel phuraimata hai sar ajutil amen vi acana.
Te pachias anda sea o ilo că chiar cana nachas prin bare pharimata
daisaras te jias angle cana folosisaras amari goghi ande iech modo goghiaver.
Pașa le exemplea andai Biblia, si amen but phrala aghies cai folosin ande iech modo goghiaver penghi goghi.
Sar exemplo, o Don Schwenning.
Ando timpo so slujisardea le Iehovasche vo dichlea sar parude-pe but buchia andi organizația.
So sichilea vo?
Ande le palutne iech șăl bărșa amari organizația barilea hai cărde-pe but paruimata.
Nachlem prin but paruimata.
Chichiva arăsle ca mânro ilo hai chichiva darade man.
Tha sea o timpo ande manghe miștimata hai dichlem sar ‘o harcum sas parudo ando sumnacai’.
Me som o Don Schwenning.
Slujiv le Iehovasche de mai but de sar 70 bărșa, hai cado si numai o începuto.
Mânro dad prinjiandea o ciacimos cana iech colego catar i buchi dea-les iech lil.
Cadaia parudea cu sea amari viața, tha vi i congregația sicadea amenghe lașimos.
Le phrala hai le pheia ajutisarde man te simțov că cherav partea anda i congregația. Placialas man te jiav ca le întruniri.
Chichiva paruimata anda i organizația hachiardeam-len sigo.
Cana i iechto data primisardeam i „Traducerea la lumeachi nevi”, sigo dem mânri sama că sas iech lașio paruimos.
Placiaia man zurales but i Biblia hai citisardem po iech capitolo ande fiesavo ghies.
Sas-li claro hai ușoro hachiarimaschi, na sar i traducerea „King James”.
Ajutisardea man te hachiarav că o Iehova existil ciaces hai că daștiv te pașioav lestar.
Cadea că cărdem paruimata hai boldem man co 16 bărșa.
Pala 2 bărșa pala so boldem man, somas numime sar phral cai ajutil le phuren.
I iechto buchi cai sas manghe dini sas te încărav iech studio andi grupa.
Ande late sas phrala mai phure save jianenas mai but sar me. Ci sas manghe ușoro.
– Bucurisaras amen că sam cade! Aven te ... ăăă ... te ...
Poiechdata sas pharo. Hai butivar ci jianglem anda soste dav duma cadea că, me numai citisardem so sas angla mande.
Chiar dacă sas manghe dar, le phrala hai le pheia ajutisarde man.
Prin lende simțosardem că o Iehova ajutil man te cherav mai dur mânri buchi.
Ande iech felo na-i ușoro cana aven neve paruimata. Me simțosardem cadaia ande 1972.
Somas serv de congregație, adică o corcoro phral cai lelas sama catar i congregația.
Sea ande codo timpo, avilea iech paruimos. Ande fiesavi congregația trebulas te avel iech corpo le phurengo.
Sas manghe pharo te dichav lașe iachența cado paruimos. Hai cadaia cărdea man te simțosarav man doșalo.
Manglem man le Iehovasche but te hachiarav sostar cărdea cado paruimos. Cadaia pașardea man lestar.
Dem mânri sama că trebulas te dichav le buchia cadea sar dichen len o Iehova.
Ji la urmă, hachiardem sostar cărdea-pe cado paruimos.
Si zurales mișto te avel amen iech corpo le phurengo. Cado paruimos si iech baro miștimos.
Cadea daștin te len sama la congregațiatar mai but phrala.
Sichilem but buchia catar le phrala mai phure, tha vi le tărnendar.
Simțosardem pe mânri morci le dumes cai phenen că „cana si but sfătuitori le buchia jian mișto”.
Sea o timpo va avena paruimata, tha trebul te cheras buchi ande iech than le Iehovasa.
Cana cheras cadaia, va avena amen but miștimata. Daștil-pe că ci dichas-len pe thaneste, tha le timposa va avela te dichas-len.
Le mai bare paruimata va avena ando viitorii.
Aghies si i mai bari buchi te slujisaras le Iehovasche hai te avas ande leschi organizația.
Dacă san tărno, na hasar chio timpo. Tha de chi zor te sichios mai but anda i organizația le Iehovaschi.
Cher partea anda late. Cher mai but ande chi congregația. De duma le phurența.
Phen lenghe că san gata te cheres oriso andi congregația.
Mech tut sicado le Iehovastar hai pachia tut ande leste. Cadea va avela tut iech viața pherdi bucuria.
Acana iertin man, trebul te tiliarav că si man but buchi te cherav.
Daștil-pe că ande amare ghiesa ci pachias că daștil te avel iech congregația bi te avel-la iech corpo phurengo.
Tha le phralesche Schwenning sas lesche pharo cana cărdilea cado paruimos.
So ajutisardea-les te dichel le buchia sar o Iehova?
Vo manglea-pe but caște hachiarel sostar si lașio cado paruimos.
Te dichas sar o manglimos ajutisardea dui familii te cheren mai but anda o Iehova
hai so miștimata sas-len că primisarde le phralen cai avile co congreso specialo.
Ando 2015 încărdea-pe iech congreso specialo ande amaro foro, Medellin,
hai sas amen i pachiv te primisaras ande amaro chăr le phralen ande aver thema.
Tha ande codo timpo sas man but buchia te cherav, ci arăselas manghe iech ghies caște cherav sea so trebulas.
Amare șiaves sas-les 11 bărșa hai mânri rromni nachlea prin iech pharo nasfalimos.
Voi daralas că ci daștil te cherel sea so trebul anda le phrala.
Gândisardeam amen: „Ci daisaras te primisaras le phralen te beșen amende chăre”.
De cana năștisailea amaro șiavo, sea o timpo mangleam amen le Iehovasche te ajutil amen te sicavas mișto amare șiaves
sar te pașiol lestar, te iubil-les hai te slujil lesche.
Ande iech ghies, mânri rromni phendea manghe:
„Dacă o Iehova silo cadea de lașio amența, sostar te na sicavas vi amen lașimos caring amare phrala?”
Pala so mangleam amen deam duma so trebul te cherel fiesavo mașcar amende ca le phrala te daștin te aven amende chăre.
Cana le phrala arăsle, sicade amenghe so but iubin amen.
Sas sar cana jiangleam amen de but bărșa.
Lengo exemplo zuriardea amen anda codoia că dichleam so but iubin le Iehovas,
denas sea penghi zor avel-len iech amalimos chidino lesa.
O amalimos cai phanghlea-pe mașcar amende hai le phrala hai le buchia anda save deam duma,
ajutisardea amare șiaves te pașiol vi mai but le Iehovastar.
Ande iech ghies, amaro șiavo avilea mande hai phendea manghe: „Dade, camav te phenav tuche vareso importanto”.
Hai anda sea pesco ilo phendea manghe:
„Dade, camav te bolav man”.
Cana gândiv man ca le phrala cai avile amende chăre dav mânri sama că sas o răspunso ca amare manglimata.
Vi aghies sam amala cadale phralența. Samas vi amen lende chăre hai andeam amenghe amintea so șucar sas co congreso.
Sam cadea de bucurime că le phrala hai le pheia avile amende chăre hai cadea daisardeam te sicavas lenghe amari iubirea.
Cadai buchi si vareso cuci anda amende, anel amenghe but fericirea.
Niciechdata ci gândisardem man că o Iehova va dela răspunso ca mânre hai mânra deiache manglimata anda codoia că deam buhle vastența.
O Avraam sicadea lașimos le manușenghe cai ci prinjianelas-len.
Cana așundem anda o congreso, phendem manghe:
„Camav anda sea ilo te acharav le phralen te beșen mande chăre”.
Ande codo timpo, ci sas amen sea so trebulas amen ande amaro chăr.
Sas amen numai cai te sovas, so te has hai iech țâni meseli. Tha mai sas amen iech pharimos.
Phendem lenghe că dacă va avena te mechen-len amende ci va avela te ajutiv-len chancesa.
Mânri phei ci slujilas le Iehovasche.
I mai importanto buchi anda mande sas i școala hai mânro than buchiaco.
Tha cu sea cadala, simțosardem man cadea de corcori hai ci somas fericime.
O phral hai i phei cai beșle amende sas zurales lașe hai umili. Iubinas amen hai cherenas amen te asas.
Le phrala hale sea so cărdem, placialas-len oriso.
Simțosardeam amen cadea de mișto, sar cana prinjiandeam amen de but timpo.
Mai but, dichlem că sile cadea de fericime hai dem mânri sama că sile cadea anda codoia că slujin le Iehovasche.
Mânri dei hai mânri phei dine anda sea o ilo sea so sas-len mai lașio le phralenghe.
Hai me bucuriv man cadea de but că dichlem cadal șucar buchia cai cărde-len von,
hai cadaia cărdea vi man te camav te slujiv le Iehovasche.
Astardem te sichioav andai Biblia, cărdem paruimata hai dem mânri viața le Iehovasche.
Boldem man ande 7 martia 2020 hai cărdem manghe ciace amala pi viața.
Vi acana das duma lența. Hai si amen iech grupo pe savo scriisaras amenghe.
Șiuteam lesche o anav „Big Family”.
Cadala phrala sas mai but sar iech cadouo. Sas iech baro miștimos le Iehovastar anda amari familia.
Cana cheras lașe buchia anda aver, o Iehova binecuvântil amen.
Si amen familii mai zurale, neve amala hai încăras ande amari goghi buchia cai bucurin amen.
Si ciaces, poiechdata anas amenghe amintea le buchia cai camas te bâstras-len.
Te așunas i cuvântarea andai închinarea de teharin cai bușiol: „Savore greșisaras butivar”.
Si cadea de but buchia cai daisaras te phenas anda o Iacov 3:2, cai phenel că: „savore greșisaras butivar”.
Anda cado vereseto hachiaras că cana ci las sama sar das duma
arăsas te cheras greșeli hai te avas perade.
Sar nachle le bărșa, butivar sas amenghe phendo te lașiaras o modo sar das duma.
Daștil-pe că phendea-pe amenghe: „Gândisar tut angla so te des duma”, „Inghin ji co 10”, „Așun mișto”.
Sau sas phende but aver dumes caște lașiaras o modo sar das duma.
Hai ajutin amen ciaces, tha cu sea cadala, chiar cana primisardeam cadal sfaturi,
sa arăsleam te duchavas varecas prin so phendeam, haleam amen hai rodeam amaro ciacimos.
Pala codoia pușleam amen: „Sostar cărdem cadaia?”
Si zurales șucar i imaginea cai cherel-pe ande amari goghi anda cado verseto.
Cana peras tele si amenghe lajiav hai dichas sigo palal dacă dichlea amen varecon.
Pala so vazdas amen opre, so cheras i iechto data? Na-i cadea că dichas tele te dichas sostar peleam?
Daștil-pe că sas vareso mechlo code sau daștil-pe că o drom sas-lo pharado.
Cadea arăsleam te peras tele. Sau daștil-pe că ci leam sama sar phiras hai peleam tele ande amare pânre.
Poiechdata cana gălem tele po scări sas te perav anda codoia că mânri goghi sas ande aver than hai ci mai dichlem cai șioav mânro pânro.
Sau aver data, varecon daștil te șiol angla amende pesco pânro caște cherel amen te peras.
Si vareso normalo te șiudas sigo amare iacha tele te dichas sostar peleam. Anda fiesavi greșeala camas te sichioas vareso.
Cadaia camas te așiel ande amari goghi.
Cana greșisaras si mișto te beșas iech țâra hai te pușias amen:
„So cărdea man te cherav cadaia? Sar daștiv te lașiarav le buchia cana va avela te nachav prin sa cadal situații?”
Cana das amari sama so cherel amen te phenas dumes nasul, va avela te jianas de mai anglal so te phenas.
Cadea ci va perela amenghe pharo anda so phendeam.
Cana sea o timpo das duma nasul hai cheras cadai greșeala, ci daisaras te phenas că sichileam vareso anda late.
Si but buchia cai cheren amen te pheras, sar avenas: cana ci jianas so te pachias, cana daras sau cana sam baricane.
Acana, aven te dichas numai dui buchia prin save daisaras te nachas hai sar daisaras te așias dur lendar.
Aven te dichas i iechto buchi.
Cana prinjianas varecas prea mișto daștil-pe că ci va avela te mai sicavas lesche pachiv.
Daștil-pe că vi o Iacov, cai scriisardea o verseto de aghies, simțosardea-pe cadea.
Te gândisaras amen: „Sar simțosardea-pe o Iacov, ca o Isus te avel lesco mai baro phral?”
Daștil-pe că gândisardea-pe: „Tu cames te aves o mai iubime amara deiatar, diches tut perfecto”. Tha chiar sas-lo perfecto.
O Iacov ci dea peschi sama catar o începuto că o Isus sas o Mesia, tha anda codoia că vo barilea ande iech than lesa.
Ando Marcu 3:21 sicavel-pe sar dichenas le Isusos lesche neamuri.
Cade phenel-pe: „Tha, cana așunde sea cadala, lesche neamuri avile te astaren-les, anda codoia că phenenas: „Hasardea peschi goghi”.
Andi nota de studiu sicavel-pe că iech mașcar codola cai phendea cadal dume, sas o Iacov.
Ando 1 Corinteni 15:7 ...
aven te dichas sar simțosardea-pe vo pala codoia.
Citisaras 1 Corinteni 15:7.
„Sicadea-pe le Iacovosche, hai pala codoia sea le apostolenghe”.
Oare sar simțosardea-pe o Iacov cana o Isus sicadea-pe lesche hai dea duma lesa?
Daștil-pe că falea-les pharo anda le dume nasul cai phendea-len anda leste.
Acana hachiardea că o Isus sas o Mesia.
Acana te gândisaras amen amende.
Phendean vroiechdata che rromesche sau rromniache dumes cai ci va avelas te phenes aver varecasche?
Holiaren tut codola anda chi familia sau jianen che covlimata hai cheren tut te phenes vareso cai va avela te fal-tut nasul?
Daștil-pe că camen te cheren cadaia sau nici.
Puș tut: „Dacă ci avelas varecon andai familia mai phendemas cadal dumes?”
Dacă nici, te gândisaras amen so va avela te cheras cana varecon andai familia greșil amenghe sau phenel amenghe vareso nasul.
Dacă hachiaras so buchia cheren amen te cheras vareso nasul va avela te jianas so te cheras.
Cadea că chiar cana prinjianas varecas mișto te na mechas te înclel anda amaro mui dumes nasul cai îngăren amen po drom pharado.
I duito buchi: cana varecon așel amenghe contra.
Ande cadal situații si zurales importanto te gândisaras amen, so cărdea amen te phenas sau te cheras vareso.
Te pușias amen: So cherel man te phiravav man cadea?
I gelozia, o baricanimos, gândiv man numai mande sau sas man iech nehachiarimos varecasa?
Dacă gândisaras amen cadale buchiande va avela te hachiaras so cherel amen te phenas vareso nasul.
Cadea daisaras vi te bariaras calități cai va ajutina amen te jianas so te cheras.
Sar exemplo, te dichas so daisaras te cheras nasul ande chichiva situații:
„Chonic ci așunel man”. So cheras? Daștil-pe că das cingar.
„Ci sicavel-pe manghe pachiv”. So cheras? Nici amen ci das das pachiv averen.
„Phenel-pe hohaimata anda mande”. So cheras? Meras holiatar, camas te cheras amenghe ortomos.
„Ci som hachiardo”. So cheras? Ci mai das duma chanicasa.
Co sfârșito le capitolosco 3 anda o Iacov ande le versetea catar o 14-18,
sicavel-pe sar daiasaras te paruvas le buchia nasul andel buchia lașe.
Citisaras: „Tha, dacă si tumen ande tumaro ilo holi cărchi hai dacă sa roden te han tumen iech averesa,
na den tumen bare hai na hohaven contra o ciacimos!
Cadaia na-i o goghiaverimos cai avel de opral, tha avel pa i phuv, si le masesco, le benghengo.
Anda codoia că, code cai si invidia hai cai le manușa roden te han-pe iech averesa, le buchia ci sile ca lengo than hai si numai buchia nasul.
Tha o goghiaverimos de opral silo ando iechto than ujo, pala codoia pașnico,
mechel pestar, gata te așunel, pherdo lașimos hai roade lașe, ci cherel diferențea, ci athavel.
Mai but, o rodo le ortomasco silo șiuto andi pacea anda codola cai cheren pacea”.
Cadea că cana varecon si contra tuche gândisar tut so va avela te phenes sau te cheres.
Gândisar mai butivar so daștis te phenes caște jianes so te cheres.
Cana prinjianas mișto varecas va avela amenghe mai ușoro te jianas so va avela te phenas iech averesche sau te cheras.
Si mișto te cheras cado exercițio.
Daștil-pe că ci jianas so te cheras pe thaneste, tha dacă cheras cado exercițio mai dur va avela te jianas pala codoia so te cheras.
Cana diches tut varecasa hai des duma lesa daștil-pe că va avela but mai mișto sar gândisardean tut tu.
Tha cana beșas hai gândisaras amen so va avela te phenas va jianasa so te cheras
hai cadea va avela amenghe mai ușoro te încăras i pacea mașcar amende.
Dacă cheras cadai buchi va avela te jianas so ci cărdeam mișto hai va jianasa te încăras amen parpale angla te phenas vareso.
Acana, aven te dichas i mai importanto buchi: de fiesavi data cana greșisaras si mișto te sichioas vareso anda cadaia.
I șib si sar i iag! Sar simțosardeanas tut dacă avelas te des iag bi te cames varesoste?
Pachias că na prea mișto. Hai numai cadaia si? Nici.
Daștil-pe că cames te diches sar arăslean te cheres cadaia sau chiar te manghes ajutorii.
Sa cadea, daștil-pe că ci va avela te mai meches chanci po aragazo,
te na meches te jial i iag prea zurales sau te na șiudes pai cana i iag si cărdi catar o thulimos.
Va avela te jianes so te na cheres aver data.
Cadai buchi ajutil amen vi cana sam perade anda le dumes cai phenen-len amenghe aver.
Cadea că, te hachiaras mișto i situația caște jianas so te cheras anda le situații cai va avena.
Na bâstren, anda orisavi greșeala daisaras te sichioas vareso.
Cana ci mai gândisaras amen ca amare greșeli,
tha gândisaras amen ca so sichileam anda lende hai vi anda le buchia cai duchade amen, ajutil amen but.
Le săre la familiache cheren iech phari buchi.
Von trebun te len sama penga familiatar te aven sasteveste, fericime hai te așen pașă le Iehovastar.
Te dichas sar cherel iech dad cadaia andi ghili cai bușiol „Mânre vasta ci va avena te covlion”.
Cuci șăre la familiache, o Iehova dichel sar iubin hai len sama tumara familiatar.
Na-i sea o timpo ușoro, tha dacă ci mechen te covlion tumare vasta
o Iehova va ajutila tumen hai tumara familia te slujin lesche.
Anda o video „Rode sumnacai andai Biblia”, sichileam sar te țâradas miștimata anda i citirea la Bibliachi.
Arăsleam co palutno lil anda le Scripturi ebraico, co Maleahi.
Te dichas so cherel o Iehova caște „ujiarel amen”.
Wow! Arăsleam co palutno lil anda le 12 profeți!
Da, terminisardeam-len sigo.
Ajutisardea man but so phenelas-pe ande iech turno, te gândisaras amen sar traisarde le manușa ande codo timpo.
So șucar! Hai so placiaia tut mai but anda cado lil?
O lil Maleahi na numai că si o palutno lil anda le Scripturi ebraico, tha silo vi scriime pala sar întâmplosarde-pe le buchia.
Le Iehovas sas-les bari răbdarea le israelițența, bișaldea but profeți caște ajutil-len tha cu sea cadala von cărde pale so vo urâlas.
Cadea si. Andel anglune capitolea citisaras că von ci andine pachiv le Iehovasche.
Von anenas lesche jertfe nasfale.
Mechle penghe rromnian caște len penghe aver cai ci slujin le Iehovasche hai le rașaia ci cărde chanci.
Dacă avilemas ando than le Iehovasco, mechlemas-len.
Tha o Iehova ci cherel cadaia, Vo bișaldea lenghe le profetos.
Cadea si.
Cana citisardem, somas atento ca chichiva dumes hai hachiardem so but daisaras te sichioas numai anda lende.
So șucar! Hai save si codol dumes?
Ando Maleahi 3:3 phenel-pe că o Iehova „va beșela sar codo cai bilavel … hai … va ujiarela le Levesche șiaven”.
Gândisardem man ca le dumes „va beșela” hai „codo cai bilavel”.
– Mișto.
– Rodem o verseto ande Watchtower Biblioteca Online
hai arachlem iech referința ande savi phenelas-pe că „I buchi codoleschi cai ujiarel lelas lesche but timpo.
Vo beșelas hai ajucărelas te bilavel-pe o sastr ji cana sicavelas sar iech oglinda ande savi daștilas te dichel-pe”.
Gândisardem man: Cadai buchi cărdea vi o Iehova le israelițența ande sea cado timpo.
Vo mechlea te nachen prin pharimata, ortosardea-len hai bișaldea lenghe mai butivar profeți.
Vo ujiardea-len pherdo răbdarea.
Cadea si o Iehova!
Chiar cana le manușa duchaven-les, Vo silo lașio lența sea o timpo hai ajutil-len mai dur te cheren paruimata.
O Iehova beșel hai ujiarel amen pherdo răbdarea. Cadea sar cărdea le Israelosa, cherel vi amența.
Vo ujiarel amen prin i Biblia, prin lesche manușa sau cana nachas prin pharimata.
Ci si ușoro te avas ortosarde sau te nachas prin iech pharimos cai încarel mai but timpo, tha cadal buchia ujiaren amen.
Cadea si.
So sichioas anda sar si o Iehova?
Vo dichel so paruimata daștin te cheren le manușa.
Chiar cana duchal amen cana sam ujiarde o Iehova jianel so manușa daisaras te arăsas.
Prin cadaia dichas că o Iehova ci pedepsil amen, tha sicavel amenghe iubirea.
Daa. O Iehova chiar mechlea ca o Maleahi te astarel pesco lil le dumența: „Sicadem tumenghe iubirea”.
O turno anda 2018 sicavel chichiva pușimata cai ajutin amen:
„Sar cherel man cadai buchi te simțov man?” sau „Sar daștiv te cherav cadaia?”.
Placian man cadal pușimata. Si ciaces, poiechdata duchal cana sam ortosarde.
Tha si mai ușoro te mechas amen ortosarde le Iehovastar cana gândisaras amen că Vo cherel cadaia anda codoia că iubil amen.
Vo jianel so manușa daisaras te arăsas.
Vi me trebul te pușav man: „Mechav man ciaces ujiardo le Iehovastar?
Cana dav mânri sama că trebul te paruvav vareso mande, mangav man zurales anda cadaia?
Mechav man ortosardo la Bibliatar sau la organizațiatar? Așunav sau nici cana si manghe vareso phendo?
Cana o Iehova mechel te nachav prin pharimata, gândiv man numai co pharimos prin savo nachav hai holiarav man.
Sau mechav man ujiardo caște avau mai blândo hai răbdatorii?
Sar ajutil man o Iehova te dichav ciaces sar som?”
Lașe pușimata. Cana si bilado o sastr, trebul bari iag hai te nachel timpo caște înclel avri so ci si lașio.
Sa cadea cana le pharimata sau le persecuții încăren mai but timpo ci si ușoro.
Tha încalaven anda amaro ilo le buchia nasul anda save ci deam amari sama. Me nachlem prin cadaia.
Phendem buchia cai pala codoia falea man nasul hai sas ande mânro ilo buchia cai ci placiaia man.
Somas peradi! Dem mânri sama că mânro pachiamos covlilea.
Fal man nasul prin so nachlean. Anda codoia zuriaren amen le dumes anda o Maleahi.
O Iehova ajucărel-pe te înclen avri anda amende le buchia nasul, tha Vo dichel ca so si lașio ande amende.
Cana o Iehova ajutil amen te dichas amare covlimata, trebul te cheras paruimata na te mechas amen.
So șucar! O Iehova mechel te nachav prin pharimata anda codoia că Vo jianel so manuș daștiv te arăsav.
Vo si zurales bucurime cana dichel pesche calități ande amende.
Hmm. Daisaras te sicavas sar si o Iehova vi anda o modo sar dichas le coaveren.
„Dichav so si lașio ande lende? Sau so manușa daștin te arăsăn?
Sar va avena ciaces andi lumea nevi? Sau dichav numai lenghe greșeli?”
Hai daștiv te gândiv man: „So iubil o Iehova lende?”.
Daștil-pe că le buchia cai ci placial man lende si sea so trebul len caște cheren i buchi le Iehovaschi.
So șucar. Cadea si vi ande amari căsnicia. Camav te dichav le buchia lașe, le șucar calități, hai te na lav sama ca le greșeli.
Vi dacă sam căsătorime de but sau de țâra timpo o Iehova dichel so daisaras te arăsas. Vi me camav te cherav sa cadea.
So șucar buchia dichleam, numai anda iech verseto!
Ciaces. Dichleam sar traisarde codol manușa, dichleam le dumes cai sas folosime hai gândisardeam amen sar te cheras so sichileam.
Hai mai si vi aver buchia te rodas. Sar exemplo, so phenel o lil Maleahi anda o Mesia.
Si iech lil profetico anda savo sichioas zurales but.
O Maleahi sas o palutno profeto anda le Scripturi ebraico angla te avel o Mesia.
Tha, lesco mesajo așilea mai dur importanto.
O Maleahi dea duma anda o Ioan Botezătoro hai o Ioan Botezătoro îngărdea amen co Isus.
So șucar!
Tha so sichioas anda cado lil sar lel sama o Iehova le jiuvleandar?
Sau so însemnol anda fiesavo anda amende i duma „cuci națiunea”? Abia ajucărav te rodas mai but.
Sichileam cadea de but buchia anda cadala lila.
Dichleam mai but andai iubirea le Iehovaschi, lesco lașimos hai lesco zuralimos.
Ande fiesavo capitolo dichiol-pe sar silo Vo.
Sichileam cadea de but buchia pa o Iehova. Hai te rodas mai dur, mai si but buchia te sichioas!
Da, o Iehova ujiarel amen. Vo ajutil pesca organizația te cherel paruimata, tha vi amen.
Cher tuche timpo hai puș tut: „Sar ujiarel-ma man o Iehova caște arăsav iech slujitoro vi mai lașio?”
Le 12 profeți astarde viața andi seria „Rode sumnacai andai Biblia”.
Caște cheren lașe video-uri le echipe trebun te cheren le thana sar sas ande codol ghiesa.
Sar avelas: iech gav anda o Israelo, iech nevo chăr anda amare ghiesa sau aver thana.
Sar daștin le echipe te cheren cadai buchi?
Aven te dichas.
Cana cheras le materialea video camas ca le manușa te sichion vareso.
Cadea că trebul te arăsas ca lengo ilo. Anda codoia camas ca o video te astarel viața.
Angla te astaras le filmări trebul te pușias amen, dacă si amen deja iech than sau trebul te cheras aver?
Cheras buchi le lovența le phralenghe. Cadea că, camas te folosisaras-len goghiaverimasa.
Jianas că le phrala cheren phares buchi anda le love cai șion-len co donații.
Cadea că si importanto sar folosisaras-len cana cheras cadal thana.
Angla te cheras iech than anda le filmări, rodas te folosisaras iech than cai deja si amen.
Poiechdata le phrala mechen amen te folosisaras lenghe chăra andal filmări hai cana le autorități mechen amen, folosisaras vi le thana publico.
Sau daisaras te folosisaras iech than anda o Betelo.
Ande iech materialo video, le phrala trebunas te cheren i filmarea ande iech spitalo.
Tha von ci găle nici ca iech spitalo hai nici na cărde iech than.
Dine penghi sama că iech geamo anda o Betelo sas sea so trebulas lenghe.
Code cărde iech cotor anda iech filmarea, pala codoia chinde iech cotor ieche șiavorresa caște terminin o materialo video.
Anda chichiva proiectea ci daisaras te folosisaras le thana cai si amen, cadea că trebul te cheras aver thana andal filmări.
Pala so sas alosardo te cherel-pe iech than andal filmări, iech phral dichel-pe la echipasa hai alosaren so buchia trebul lenghe.
O directoro de imagini dichel-pe pesche echipasa hai alosaren de anglal so buchia te dichen-pe ande iech video.
Cadaia ajutil le phrales te hachairel so întâmplol-pe ando video hai so si mai importanto.
Cadea pregătisaras o than numai le buchianța cai trebun ande iech video.
Cana cheres buchi andel construcții, cames te cheres vareso cai încărel but timpo.
Tha cana cheras iech than anda le filmări si diferime. Camas te vazdas-les sigo hai te das-les tele sigo.
Trebul te sicavel mișto tha ci trebul te încărel but.
Butivar cheras buchia te fan-pe ciace, tha ci folosisaras amen lendar.
Sar exemplo, cheras iech bucătăria cai sila udara hai sertarea cai ci pâtren-pe.
Sa cadea, cana cheras le scări, ci cheras dui etaje, tha cheras te fal-pe că si dui etaje.
Cadea ci lel amendar but timpo hai love.
Cana trebul te cheras iech nevo than anda le filmări, butivar folosisaras le pereți anda placaje cai cheras-len de mai anglal.
Si ușoro te cheras buchi lența.
Hai cana ci mai trebun amen, ci șiudas-len.
Pala so terminisaras iech proiecto, las tele o placajo cai folosisardeam-les,
las avri le capse hai sea so sas pe leste.
Pala codoia șioas aver placajo cai siles 6 mm.
Cadea daisaras te folosisaras pale le panouri. Si amen chichiva panouri de mai but sar 9 bărșa.
Cana cheras iech nevo than andal filmări, gândisaras amen ca so aver proiectea daștil te avel folosime.
Sar exemplo, le phrala phende amenghe te folosisaras pale le buchia cai sas ando filmo „O Iehova, ande tute șiutem mânro pachiamos”.
Nachle cam 10 bărșa hai încă mai folosisaras codol buchia.
Amaro departamento rodel te folosil chichi mai but timpo sea so si amen.
Iech than anda o filmo „Iosia” sas-lo folosime vi ando video le Neemiasa hai vi anda le video-uri le Davidosa.
Hai iech aver than andal filmări sas folosime sar iech clasa mai nevi,
sar iech clasa mai purani vi sau sar iech chăr anda i America de Sud.
Sar cărdeam iech than cai sicavel sar iech Sala le Regatoschi hai folosisardeam-la ande but materialea video.
Anda codoia că sili mai țâni sar iech Sala le Regatoschi, numai 30 manușența fal-pe că sili pherdi.
Vi i biblioteca de palal sas-li parudi caște fal-pe că si iech aver than.
Sar exemplo, parudeam-la ande iech dormitoro sau ande iech than cai lel-pe iech intervio.
Cana folosisaras pale cado than das amari zor ca le phrala te na den penghi sama că si iech than cai mai dichle-les.
Cana gândisaras amen mișto so buchia te șioas ando than cai cheren-pe le filmări, daisaras te paruvas-les cu sea
hai cadea fal-pe că si aver than.
Sam bucurime cana lașiaras le thana anda le filmări.
Chiar cana poiechdata si amenghe mai pharo hai das sea amari zor caște cheras le buchia mai simplo arachas vi mai bari bucuria.
Bucuriv man te avav ande iech than le phralența hai le pheianța cai jianen sar te cheren le buchia vi cana na-i ușoro.
Von daștin te cheren anda vareso simplo iech buchi cai dichiol-pe zurale șucar ande iech video
hai cheren sea cadala ca le phrala te sichion vareso.
So șucar!
Le materialea video si iech cadouo le Iehovastar.
Jianav că va avela te dichas-len vi mai cuci anda codoia că amare phrala cheren iech phari buchi caște aven amen cadal thana andal filmări.
Aghies dichleam că bucurisaras o ilo le Iehovasco cana folosisaras amari goghi ande iech modo goghiaver,
cana cheras paruimata, cana cheras so si mișto anda aver hai cana mechas le Iehovas te ujiarel amen.
Angla te phandavas camas te dichas i Cambodgia.
I Cambodgia sili ando sud-esto la Asiaco. Voi sili prinjiandi anda lachi cultura hai le lașe habena.
Le manușa chinen le mai lașe buchia catar i piața caște cheren iech haben anda mașo cai bușiol, amok trei.
Avri anda le foruri daisaras te dichas but șucar buchia.
Ando nord-esto le themesco dichas șucar cascade, andel veșa dichas elefanți asiatici,
bare ibiși hai ande but thana daisaras te dichas plaia pherde lotuși.
Andi Cambodgia arachas cuci bara anda zircon.
Len si len iech șucar culoarea cai bușiol vânăto de Ratanakiri.
Le manușa thabaren cadal barra cai iech bari iag caște paruven penghi culoarea.
Ande 1958 avile le anglune misionari.
Ji ande 1965 le misionari George hai Carol Crawford, trebuisarde te tiliaren anda o them anda le nehachiarimata politico.
Iech timpo ci daștilas te încăren-pe întruniri hai nici te predichil-pe.
Anda codoia cam 25 bărșa andi Cambodgia ci sas nici iech Martoro le Iehovasco.
Tha o Iehova ci bâstărdea le lașe manușen anda cado them.
Ande 1993 o guverno mechlea amen te predichisaras pale hai le misionari avile ando them.
Aghies pala 33 bărșa ando them si mai but sar 1 200 martori cai sichion andai Biblia 1 400 manușența.
Șăla phrala hai pheia anda sea i lumea avile andi Cambodgia anda codoia că si iech șucar them hai lașe manușa.
Le manușa de catar sile voime hai silen iech ilo ujio. Anda codoia, but cai avile cade arăsle te iubin-len sigo.
Na de but timpo încărdea-pe i iechto Școala andal Evanghelizatori ande Cambodgia.
Biș phrala hai pheia bucurisarde-pe but anda cadai școala.
Vi mai but, iech familia de misioanari camle te cheren cadai școala încă de cana terminisarde o Galaado ande 1999.
Le tărne phrala cărde cadai școala ande iech than le misionarența cai prinjianen but buchia.
Dui phrala sas-le bișalde andi congregația Chbar Ampov.
Cadai congregația ajutil te predichil-pe ande iech than mai duriardo, ande Svay Rieng cai si cam ca 120 km.
Le phrala andai grupa len partea ca le întruniri po interneto.
Le phrala anda Chbar Ampov jian butivar ca i grupa caște zuriaren penghe phralen hai caște predichin.
Le phrala hai le pheia anda Chbar Ampov
hai anda i grupa Svay Rieng bișalen amenghe lenghi thati hai guli iubirea.
Zuriarel amen cana dichas amare phralen sar cheren phares buchi anda o Iehova.
Dichlean o JW Broadcasting catar o Sedio Mondialo le Martorengo le Iehovasche!

JW Broadcasting – noiembria 2026
- 

JW Broadcasting – noiembria 2026

Mișto avilean co JW Broadcasting!
Ande cado șion va dichasa so miștimata si amen cana folosisaras ande iech modo goghiaver amari goghi.
Va dichasa sar dui familii sas-le binecuvântime anda codoia că sicade iubirea hai dine buhle vastența.
Va avela te hachiaras sar o Iehova ujiarel fiesaves mașcar amende, tha vi pesca organizația hai so miștimata si amen.
Hai va avela te dichas sar o Iehova binecuvântil amari familia cana șioas-les po iechto than ande amari viața.
Bucurin tumen anda cadai emisiunea!
„Sar te sicavas goghiaverimos cana alosaras so te încăras andi goghi?” 
Anda cadaia das duma. Daștil-pe că phenas amenghe: „Me ci daștiv te cherav cadaia”.
Hai daștil te avel tumen ciacimos.
Tha daisaras te las sama ca le buchia cai sea o timpo aven ande amari goghi.
Te dichas so sichioas le Iehovastar cana alosaras so te încăras andi goghi.
Mai dur va dichasa sar ajutil amen cadaia te sicavas iubirea hai te slujisaras averenghe.
So alosarel o Iehova te anel pesche amintea anda amende?
Mangav tumen te pâtren ande iech than manța co Evrei 6:10.
Cade citisaras:
„Că o Del na-i neorta caște bâstrel tumari buchi hai i iubirea cai sicadean-la anda lesco anav
cana slujisardean codolenghe sfinți hai cheren cadaia vi mai dur”.
Dichlean so anel pesche amintea o Iehova?
Vo dichel le șucar buchia cai cheras-len.
Andi nota de telal anda cado verseto andi șib engleza phenel-pe:
„Dacă o Iehova avelas te bâstrel le lașe buchia cai cheras-len, avelas te phenel anda peste că silo neorta”.
So șucar sicaven cadal dumes sar o Iehova lel sama amendar.
Da, vo prinjianel amen mișto, dichel vi amare greșeli, tha vi amare păcatea.
Tha vo alosarel te na gândil-pe ca so cheras nasul.
Gândin tumen: Amari goghi daștil te avel sar iech biblioteca. O Iehova prinjianel fiesavo lil cai si andi biblioteca.
Si sar cana ande chichiva lila si scriime amare greșeli hai păcatea hai ande aver, le buchia lașe cai cheras-len. 
O Iehova jianel mișto save si le lila ande save si amare păcatea.
Tha vo alosarel te citil le lila ande save si scriime le lașe buchia cai cheras-len.
Sar te las amen pala o Iehova cana alosaras ca so te anas amenghe amintea?
Te risaras amen parpale co Evrei 6:10, hai te dichas dui buchia savende trebul te gândisaras amen.
I iechto: I iubirea savi sicavas-la anda o anav le Iehovasco.
Si iech bari pachiv te phiravas lesco anav, tha trebul te cheras sea so daisaras caște avel mișto dichlo le manușendar.
Prin o modo sar das duma, hureavas amen hai phiravas amen averența,
sicavas dacă anas pachiv sau lajiav po anav le Iehovasco.
Ando 1 Corinteni 10:31 sicavel-pe că trebul te cheras sea le buchia caște anen pachiv le Devlesche. 
Camas ca sea le manușa te jianen că o anav le Iehovasco silo sfânto hai importanto anda amende.
Sicavas că iubisaras o anav le Devlesco vi cana das duma averența anda leste.
Cadaia însemnol te predichisaras.
Cadea că, te avas sea mai lașe andi buchi le Devleschi, trebul te avas mișto pregătime.
Si mișto te astaras te das duma le manușența andai Biblia, tha camas vi te zuriaras-len prin so phenas lenghe. 
Mai but, camas te avas pregătime te das duma oricai sam.
Daisaras te șioas amenghe andi goghi te cheras mai but anda o Iehova hai cana daștil-pe,
te das sea amari zor te jias andi predicarea ande fiesavo curco.
Camas te cheras „sea le buchia anda o drago la vesteachi lași” hai te sicavas chichi de but iubisaras le Iehovas hai lesco anav.
I duito buchi savi dichleam-la ando Evrei 6:10 hai pe savi trebul te las sama si „te slujisaras codolenghe sfinți”. 
„Codola sfinți” si le phrala machle le Isusosche.
Le anglune creștini slujisarde lenghe phralenghe machle prin mai but buchia.
Cana nachle prin pharimata, le phrala dine-len so sas-len nevoia.
O Pavel așardea-len anda codoia că sas-le pașa penghe phrala hai cherenas cadaia vi mai dur.
Vi amen ajutil amen aghies so si scriime ando Evrei 6:10.
Te na bâstras. Te cheras so si mișto anda aver.
Bucurisaras amen cana aver sile lașe amența, tha sam vi mai bucurime cana amen das buchle vastența anda iubirea.
Daisaras te cheras but buchia anda aver.
Sar exemplo, daisaras te ajutisaras-len cana das-len haben,
hureaimata hai primisaras-len ande amare chăra cana nachen prin iech dezastro, cana sile nasfale sau cana sile persecutime.
Iech aver buchi si te așiaras hai te zuriaras amare phralen.
Tha iech buchi vi mai importanto si te mangas amen anda amare phrala.
So sichileam ji acana? Savore daisaras te cheras so phenel-pe andel Proverbe 3:27.
Cade phenel-pe:
„Cana așel ande chio zuralimos te ajutisares-len, na încăr tut parpale te cheres mișto codolenghe cai silen nevoia”.
Cana gândisaras amen ca i iubirea anda o anav le Devlesco
hai te ajutisaras averen sicavas că anas amenghe amintea le buchia mai importanto.
Poiechdata si amenghe pharo, anda codoia că anas amenghe amintea le buchia cai camas te bâstras-len.
Vi mai but, cana varecon cărdea amenghe iech neortomos sau phiradea-pe nasul.
Numai cana gândisaras amen ca codo manuș hai ca so cărdea amenghe, amaro ilo pherdiol holiatar.
Pachias că ci va paruvela-pe hai si pharo te bâstras so cărdea amenghe.
Te dichas dui exemplea.
Te das duma anda o David hai anda o Șimei.
O Șimei sas neamo le regesa Saul,
vo sas-lo holiardo but bărșa po David anda codoia că chonic anda o neamo le Saulosco ci mai daștilas te avel rege. 
Ando 2 Samuel o capitolo 16 phenel-pe că o Șimei șiudea barrența anda o David hai lesche manușa hai dea-les armai.
O Șimei ci sicadea lenghe pachiv.
Anda codoia o Abișai phendea le Davidosche te mechel-les te mudarel-les.
Tha o David ci mechlea-les.
Vo ci risardea o nasulimos, mechlea-les andel vasta le Iehovasche.
Hai cadea o David ci holiardea-pe hai încărdea-pe parpale.
Pala iech timpo, cana o David risardea-pe co trono, le Șimeiosche falea lesche pharo hai manglea pesche iertarea.
Tha o Abișai camlea pale te mudarel-les. O David ci mechlea-les.
Vo chiar solahardea că ci va avela te mudarel le Șimeios.
O David bucurisardea o ilo le Iehovasco anda sar lașiardea cado nasulimos.    
Aven te dichas, so phendea o David le Solomonosche angla te merel anda o 1 Regi 2:8, 9:
„Sa cadea, tusa silo o Șimei, o șiavo le Gherasco, o beniaminito anda Bahurim.
Vo dea man armaia, phendea manghe phare dumes, ando ghies cana gălemas co Mahanaim.
Tha, cana avilea angla mande co Iordano, solahardem lesche po Iehova: «Ci va avela te mudarav tut la sabiasa».
Acana, na mech-les bi te pochinel anda so cărdea,
anda codoia că san iech manuș goghiaver hai jianes so trebul te cheres lesche.
Te șios ando Mormânto lesche parne bala pherde rat”.
Daștil-pe că le Davidos sas-les cam 60 bărșa cana o Șimei dea-les armai.
Vo mulea cam ca 70 bărșa.
Cadea că, cam 10 bărșa, o David gândisardea-pe but ca so cărdea lesche o Șimei hai ci bâstărdea-les.
I Biblia ci phenel amenghe sostar o David cărdea cadaia.
Cana varecon phiravel-pe amența bi lașimasco hai cherel amenghe iech neortomos cadea sar dichleam,
daștil te avel amenghe pharo te nachas părdal, chiar cana ande codo momento phiradeam amen șucar.
Daștil-pe că pala but bărșa încă simțosaras amen duchade.
So ajutil amen te iertisaras codoles cai greșisardea amenghe hai te na mai anas amenghe amintea so cărdea?
Acana te gândisaras amen sar o Isus phiradea-pe le Petrosa.
Andi riat, angla te avel astardo, o Petru phendea le Isusosche că niciechdata ci avelas te mechel-les.
Cu sea cadala, pala numai chichiva ceasuri, o Petru phendea trin-var că ci prinjianel le Isusos.
Gândin tumen: Ande codol momentea o Isus nachlea prin le mai cale ghiesa.
Cana sas-les nevoia de o mai baro ajutorii, lesche discipoli hai lesco mai lașio amal, o Petru, mechle-les.
Pala so dea peschi seama so cărdea, vo astardea te rovel hai simțosardea că i doș halea lesco ilo.
Tha sar phiradea-pe o Isus lesa?
Cadea sar dichas ando 1 Corinteni 15:5,
o Isus ci sicadea-pe lesche caște doșarel-les hai te phenel lesche că ci mai pachial-pe ande leste.
Caște dichas so întâmplosardea-pe mai dur, te citisaras o Marcu 16:7.
Te dichas so phendea o îngero le jiuvleanghe cai avile co mormânto le Isusosco:
„Acana jian hai phenen lesche discipolenghe hai le Petrosche:
«Vo jial angla tumende andi Galileea. Va dichena-les code, cadea sar phendea tumenghe»”. 
Andi nota de tela anda cado verseto phenel-pe:
„Angla ca o Isus te sicavel-pe pesche dicipolenghe, vo sicadea-pe le Petrosche cana sas-lo corcoro.
O Isus cărdea pesche timpo ande iech modo specialo anda o Petru cadea sar sicaven vi le dumes le îngerosche.
Sea cadala cărde le Petros te pachial că sas-lo iertime chiar cana phendea trin-var că ci prinjianel le Isusos”.
Te gândisaras amen chichi de mișto simțosardea-pe o Petru.
Si ciaces, o Isus ci bâstărdea so cărdea.
Tha vo alosardea te anel pesche amintea le șucar buchia cai cărdea-len o Petru.
O Isus na numai iertisardea le Petros, tha vi dea-les i pachiv te zuriarel pesche phralen.
So lașio exemplo mechlea amenghe!
Dacă vi tut duchadea tut varecon pașiardo, le tut pala o Isus hai an tuche amintea le lașe buchia.   
Sar mai daisaras te folosisaras amari goghi ande iech modo goghiaver?
Aven te das duma pale anda o David. Vo andea pesche amintea sar o Iehova salvisardea-les hai sas-lo pașa leste.
Cadala ajutisarde-les te pachial că daștil te nachel părdal orisavo pharimos.  
Te dichas lesche dumes anda o Psalmo 27:2, 3.
„Cana le manușa nasul avile contra mande caște han man,
codola cai sas manghe contra hai mânre dușmani sas codola perade hai pele tele.
Vi cana iech armata avelas contra mande, mânro ilo ci daralas.
Vi cana iech marimos avelas contra mande, sa pherdo pachiamos avilemas”.
Dichlean so phendea o David: „Mânro ilo ci daralas”.
„Sa pherdo pachiamos avilemas”.
Daștil te avel amen sa cado baro pachiamos sar le Davidos?
Da, cana folosisaras amari goghi goghiaverimasa.  
Sar exemplo, nachlean vi tu prin iech baro pharimos hai manglean le Iehovas te ajutil tut
hai pala codoia dichlean sar dea tut goghiaverimos hai zuralimos sau dichlean sar lașiardea vo le buchia?
Te na bâstres nichiechdata cadaia. 
Sau camlean te cheres mai but andi buchi le Iehovaschi hai dichlean sar o Iehova duriardea le phare buchia cai așiavenas tut te cheres so șiutean ande chi goghi?
Te na bâstres nici cadaia.
Ande amari viața va avela te cheras amenghe but amintiri.
Cana anas amenghe amintea le buchia prin save nachleam,
te gândisaras amen ca le șucar calități cai si amare phralen hai ca lenghe lașe buchia cai cărde-len.
Cana dichas so si amen ando ilo, te șiudas avri anda leste so si nasul, sar avelas i invidia, i holi
hai te bariaras mai dur șucar calități, sar si i iubirea hai i iertarea.
Te anas amenghe amintea sar ajutisardea amen o Iehova andel phuraimata hai sar ajutil amen vi acana.
Te pachias anda sea o ilo că chiar cana nachas prin bare pharimata
daisaras te jias angle cana folosisaras amari goghi ande iech modo goghiaver.
Pașa le exemplea andai Biblia, si amen but phrala aghies cai folosin ande iech modo goghiaver penghi goghi.
Sar exemplo, o Don Schwenning.
Ando timpo so slujisardea le Iehovasche vo dichlea sar parude-pe but buchia andi organizația.
So sichilea vo? 
Ande le palutne iech șăl bărșa amari organizația barilea hai cărde-pe but paruimata.
Nachlem prin but paruimata. 
Chichiva arăsle ca mânro ilo hai chichiva darade man.
Tha sea o timpo ande manghe miștimata hai dichlem sar ‘o harcum sas parudo ando sumnacai’.
Me som o Don Schwenning.
Slujiv le Iehovasche de mai but de sar 70 bărșa, hai cado si numai o începuto.
Mânro dad prinjiandea o ciacimos cana iech colego catar i buchi dea-les iech lil. 
Cadaia parudea cu sea amari viața, tha vi i congregația sicadea amenghe lașimos.
Le phrala hai le pheia ajutisarde man te simțov că cherav partea anda i congregația. Placialas man te jiav ca le întruniri.
Chichiva paruimata anda i organizația hachiardeam-len sigo.
Cana i iechto data primisardeam i „Traducerea la lumeachi nevi”, sigo dem mânri sama că sas iech lașio paruimos.
Placiaia man zurales but i Biblia hai citisardem po iech capitolo ande fiesavo ghies.
Sas-li claro hai ușoro hachiarimaschi, na sar i traducerea „King James”.
Ajutisardea man te hachiarav că o Iehova existil ciaces hai că daștiv te pașioav lestar. 
Cadea că cărdem paruimata hai boldem man co 16 bărșa.
Pala 2 bărșa pala so boldem man, somas numime sar phral cai ajutil le phuren.
I iechto buchi cai sas manghe dini sas te încărav iech studio andi grupa. 
Ande late sas phrala mai phure save jianenas mai but sar me. Ci sas manghe ușoro.
– Bucurisaras amen că sam cade! Aven te ... ăăă ... te ...
Poiechdata sas pharo. Hai butivar ci jianglem anda soste dav duma cadea că, me numai citisardem so sas angla mande. 
Chiar dacă sas manghe dar, le phrala hai le pheia ajutisarde man.
Prin lende simțosardem că o Iehova ajutil man te cherav mai dur mânri buchi.
Ande iech felo na-i ușoro cana aven neve paruimata. Me simțosardem cadaia ande 1972.
Somas serv de congregație, adică o corcoro phral cai lelas sama catar i congregația. 
Sea ande codo timpo, avilea iech paruimos. Ande fiesavi congregația trebulas te avel iech corpo le phurengo.
Sas manghe pharo te dichav lașe iachența cado paruimos. Hai cadaia cărdea man te simțosarav man doșalo.
Manglem man le Iehovasche but te hachiarav sostar cărdea cado paruimos. Cadaia pașardea man lestar.
Dem mânri sama că trebulas te dichav le buchia cadea sar dichen len o Iehova. 
Ji la urmă, hachiardem sostar cărdea-pe cado paruimos.
Si zurales mișto te avel amen iech corpo le phurengo. Cado paruimos si iech baro miștimos.
Cadea daștin te len sama la congregațiatar mai but phrala.
Sichilem but buchia catar le phrala mai phure, tha vi le tărnendar.
Simțosardem pe mânri morci le dumes cai phenen că „cana si but sfătuitori le buchia jian mișto”.
Sea o timpo va avena paruimata, tha trebul te cheras buchi ande iech than le Iehovasa.
Cana cheras cadaia, va avena amen but miștimata. Daștil-pe că ci dichas-len pe thaneste, tha le timposa va avela te dichas-len.
Le mai bare paruimata va avena ando viitorii.
Aghies si i mai bari buchi te slujisaras le Iehovasche hai te avas ande leschi organizația.
Dacă san tărno, na hasar chio timpo. Tha de chi zor te sichios mai but anda i organizația le Iehovaschi. 
Cher partea anda late. Cher mai but ande chi congregația. De duma le phurența.
Phen lenghe că san gata te cheres oriso andi congregația. 
Mech tut sicado le Iehovastar hai pachia tut ande leste. Cadea va avela tut iech viața pherdi bucuria.
Acana iertin man, trebul te tiliarav că si man but buchi te cherav.
Daștil-pe că ande amare ghiesa ci pachias că daștil te avel iech congregația bi te avel-la iech corpo phurengo. 
Tha le phralesche Schwenning sas lesche pharo cana cărdilea cado paruimos.
So ajutisardea-les te dichel le buchia sar o Iehova?
Vo manglea-pe but caște hachiarel sostar si lașio cado paruimos.
Te dichas sar o manglimos ajutisardea dui familii te cheren mai but anda o Iehova
hai so miștimata sas-len că primisarde le phralen cai avile co congreso specialo.
Ando 2015 încărdea-pe iech congreso specialo ande amaro foro, Medellin,
hai sas amen i pachiv te primisaras ande amaro chăr le phralen ande aver thema.
Tha ande codo timpo sas man but buchia te cherav, ci arăselas manghe iech ghies caște cherav sea so trebulas.
Amare șiaves sas-les 11 bărșa hai mânri rromni nachlea prin iech pharo nasfalimos.
Voi daralas că ci daștil te cherel sea so trebul anda le phrala. 
Gândisardeam amen: „Ci daisaras te primisaras le phralen te beșen amende chăre”.
De cana năștisailea amaro șiavo, sea o timpo mangleam amen le Iehovasche te ajutil amen te sicavas mișto amare șiaves
sar te pașiol lestar, te iubil-les hai te slujil lesche.
Ande iech ghies, mânri rromni phendea manghe:
„Dacă o Iehova silo cadea de lașio amența, sostar te na sicavas vi amen lașimos caring amare phrala?”
Pala so mangleam amen deam duma so trebul te cherel fiesavo mașcar amende ca le phrala te daștin te aven amende chăre.
Cana le phrala arăsle, sicade amenghe so but iubin amen.
Sas sar cana jiangleam amen de but bărșa.
Lengo exemplo zuriardea amen anda codoia că dichleam so but iubin le Iehovas,
denas sea penghi zor avel-len iech amalimos chidino lesa.
O amalimos cai phanghlea-pe mașcar amende hai le phrala hai le buchia anda save deam duma,
ajutisardea amare șiaves te pașiol vi mai but le Iehovastar.
Ande iech ghies, amaro șiavo avilea mande hai phendea manghe: „Dade, camav te phenav tuche vareso importanto”.
Hai anda sea pesco ilo phendea manghe:
„Dade, camav te bolav man”. 
Cana gândiv man ca le phrala cai avile amende chăre dav mânri sama că sas o răspunso ca amare manglimata.
Vi aghies sam amala cadale phralența. Samas vi amen lende chăre hai andeam amenghe amintea so șucar sas co congreso.
Sam cadea de bucurime că le phrala hai le pheia avile amende chăre hai cadea daisardeam te sicavas lenghe amari iubirea.
Cadai buchi si vareso cuci anda amende, anel amenghe but fericirea.
Niciechdata ci gândisardem man că o Iehova va dela răspunso ca mânre hai mânra deiache manglimata anda codoia că deam buhle vastența.
O Avraam sicadea lașimos le manușenghe cai ci prinjianelas-len.
Cana așundem anda o congreso, phendem manghe: 
„Camav anda sea ilo te acharav le phralen te beșen mande chăre”.
Ande codo timpo, ci sas amen sea so trebulas amen ande amaro chăr.
Sas amen numai cai te sovas, so te has hai iech țâni meseli. Tha mai sas amen iech pharimos.
Phendem lenghe că dacă va avena te mechen-len amende ci va avela te ajutiv-len chancesa.
Mânri phei ci slujilas le Iehovasche. 
I mai importanto buchi anda mande sas i școala hai mânro than buchiaco.
Tha cu sea cadala, simțosardem man cadea de corcori hai ci somas fericime. 
O phral hai i phei cai beșle amende sas zurales lașe hai umili. Iubinas amen hai cherenas amen te asas. 
Le phrala hale sea so cărdem, placialas-len oriso.
Simțosardeam amen cadea de mișto, sar cana prinjiandeam amen de but timpo.
Mai but, dichlem că sile cadea de fericime hai dem mânri sama că sile cadea anda codoia că slujin le Iehovasche.
Mânri dei hai mânri phei dine anda sea o ilo sea so sas-len mai lașio le phralenghe. 
Hai me bucuriv man cadea de but că dichlem cadal șucar buchia cai cărde-len von,
hai cadaia cărdea vi man te camav te slujiv le Iehovasche.
Astardem te sichioav andai Biblia, cărdem paruimata hai dem mânri viața le Iehovasche.
Boldem man ande 7 martia 2020 hai cărdem manghe ciace amala pi viața.
Vi acana das duma lența. Hai si amen iech grupo pe savo scriisaras amenghe.
Șiuteam lesche o anav „Big Family”.
Cadala phrala sas mai but sar iech cadouo. Sas iech baro miștimos le Iehovastar anda amari familia.
Cana cheras lașe buchia anda aver, o Iehova binecuvântil amen.
Si amen familii mai zurale, neve amala hai încăras ande amari goghi buchia cai bucurin amen.
Si ciaces, poiechdata anas amenghe amintea le buchia cai camas te bâstras-len.
Te așunas i cuvântarea andai închinarea de teharin cai bușiol: „Savore greșisaras butivar”.
Si cadea de but buchia cai daisaras te phenas anda o Iacov 3:2, cai phenel că: „savore greșisaras butivar”.
Anda cado vereseto hachiaras că cana ci las sama sar das duma
arăsas te cheras greșeli hai te avas perade.
Sar nachle le bărșa, butivar sas amenghe phendo te lașiaras o modo sar das duma.
Daștil-pe că phendea-pe amenghe: „Gândisar tut angla so te des duma”, „Inghin ji co 10”, „Așun mișto”.
Sau sas phende but aver dumes caște lașiaras o modo sar das duma.
Hai ajutin amen ciaces, tha cu sea cadala, chiar cana primisardeam cadal sfaturi,
sa arăsleam te duchavas varecas prin so phendeam, haleam amen hai rodeam amaro ciacimos.
Pala codoia pușleam amen: „Sostar cărdem cadaia?”
Si zurales șucar i imaginea cai cherel-pe ande amari goghi anda cado verseto.
Cana peras tele si amenghe lajiav hai dichas sigo palal dacă dichlea amen varecon.
Pala so vazdas amen opre, so cheras i iechto data? Na-i cadea că dichas tele te dichas sostar peleam?
Daștil-pe că sas vareso mechlo code sau daștil-pe că o drom sas-lo pharado.
Cadea arăsleam te peras tele. Sau daștil-pe că ci leam sama sar phiras hai peleam tele ande amare pânre.
Poiechdata cana gălem tele po scări sas te perav anda codoia că mânri goghi sas ande aver than hai ci mai dichlem cai șioav mânro pânro.
Sau aver data, varecon daștil te șiol angla amende pesco pânro caște cherel amen te peras.
Si vareso normalo te șiudas sigo amare iacha tele te dichas sostar peleam. Anda fiesavi greșeala camas te sichioas vareso.
Cadaia camas te așiel ande amari goghi.
Cana greșisaras si mișto te beșas iech țâra hai te pușias amen:
„So cărdea man te cherav cadaia? Sar daștiv te lașiarav le buchia cana va avela te nachav prin sa cadal situații?”
Cana das amari sama so cherel amen te phenas dumes nasul, va avela te jianas de mai anglal so te phenas.
Cadea ci va perela amenghe pharo anda so phendeam.
Cana sea o timpo das duma nasul hai cheras cadai greșeala, ci daisaras te phenas că sichileam vareso anda late. 
Si but buchia cai cheren amen te pheras, sar avenas: cana ci jianas so te pachias, cana daras sau cana sam baricane.
Acana, aven te dichas numai dui buchia prin save daisaras te nachas hai sar daisaras te așias dur lendar.  
Aven te dichas i iechto buchi.
Cana prinjianas varecas prea mișto daștil-pe că ci va avela te mai sicavas lesche pachiv.
Daștil-pe că vi o Iacov, cai scriisardea o verseto de aghies, simțosardea-pe cadea. 
Te gândisaras amen: „Sar simțosardea-pe o Iacov, ca o Isus te avel lesco mai baro phral?”
Daștil-pe că gândisardea-pe: „Tu cames te aves o mai iubime amara deiatar, diches tut perfecto”. Tha chiar sas-lo perfecto.  
O Iacov ci dea peschi sama catar o începuto că o Isus sas o Mesia, tha anda codoia că vo barilea ande iech than lesa.
Ando Marcu 3:21 sicavel-pe sar dichenas le Isusos lesche neamuri.
Cade phenel-pe: „Tha, cana așunde sea cadala, lesche neamuri avile te astaren-les, anda codoia că phenenas: „Hasardea peschi goghi”. 
Andi nota de studiu sicavel-pe că iech mașcar codola cai phendea cadal dume, sas o Iacov.
Ando 1 Corinteni 15:7 ...
aven te dichas sar simțosardea-pe vo pala codoia.
Citisaras 1 Corinteni 15:7.
„Sicadea-pe le Iacovosche, hai pala codoia sea le apostolenghe”.  
Oare sar simțosardea-pe o Iacov cana o Isus sicadea-pe lesche hai dea duma lesa? 
Daștil-pe că falea-les pharo anda le dume nasul cai phendea-len anda leste.
Acana hachiardea că o Isus sas o Mesia.  
Acana te gândisaras amen amende.
Phendean vroiechdata che rromesche sau rromniache dumes cai ci va avelas te phenes aver varecasche?
Holiaren tut codola anda chi familia sau jianen che covlimata hai cheren tut te phenes vareso cai va avela te fal-tut nasul?
Daștil-pe că camen te cheren cadaia sau nici. 
Puș tut: „Dacă ci avelas varecon andai familia mai phendemas cadal dumes?”
Dacă nici, te gândisaras amen so va avela te cheras cana varecon andai familia greșil amenghe sau phenel amenghe vareso nasul.
Dacă hachiaras so buchia cheren amen te cheras vareso nasul va avela te jianas so te cheras.
Cadea că chiar cana prinjianas varecas mișto te na mechas te înclel anda amaro mui dumes nasul cai îngăren amen po drom pharado. 
I duito buchi: cana varecon așel amenghe contra.
Ande cadal situații si zurales importanto te gândisaras amen, so cărdea amen te phenas sau te cheras vareso.
Te pușias amen: So cherel man te phiravav man cadea? 
I gelozia, o baricanimos, gândiv man numai mande sau sas man iech nehachiarimos varecasa?
Dacă gândisaras amen cadale buchiande va avela te hachiaras so cherel amen te phenas vareso nasul.
Cadea daisaras vi te bariaras calități cai va ajutina amen te jianas so te cheras.
Sar exemplo, te dichas so daisaras te cheras nasul ande chichiva situații:
„Chonic ci așunel man”. So cheras? Daștil-pe că das cingar.
„Ci sicavel-pe manghe pachiv”. So cheras? Nici amen ci das das pachiv averen.
„Phenel-pe hohaimata anda mande”. So cheras? Meras holiatar, camas te cheras amenghe ortomos.
„Ci som hachiardo”. So cheras? Ci mai das duma chanicasa.     
Co sfârșito le capitolosco 3 anda o Iacov ande le versetea catar o 14-18,
sicavel-pe sar daiasaras te paruvas le buchia nasul andel buchia lașe.
Citisaras: „Tha, dacă si tumen ande tumaro ilo holi cărchi hai dacă sa roden te han tumen iech averesa,
na den tumen bare hai na hohaven contra o ciacimos!
Cadaia na-i o goghiaverimos cai avel de opral, tha avel pa i phuv, si le masesco, le benghengo.
Anda codoia că, code cai si invidia hai cai le manușa roden te han-pe iech averesa, le buchia ci sile ca lengo than hai si numai buchia nasul.
Tha o goghiaverimos de opral silo ando iechto than ujo, pala codoia pașnico,
mechel pestar, gata te așunel, pherdo lașimos hai roade lașe, ci cherel diferențea, ci athavel.
Mai but, o rodo le ortomasco silo șiuto andi pacea anda codola cai cheren pacea”. 
Cadea că cana varecon si contra tuche gândisar tut so va avela te phenes sau te cheres.
Gândisar mai butivar so daștis te phenes caște jianes so te cheres.
Cana prinjianas mișto varecas va avela amenghe mai ușoro te jianas so va avela te phenas iech averesche sau te cheras.
Si mișto te cheras cado exercițio.
Daștil-pe că ci jianas so te cheras pe thaneste, tha dacă cheras cado exercițio mai dur va avela te jianas pala codoia so te cheras. 
Cana diches tut varecasa hai des duma lesa daștil-pe că va avela but mai mișto sar gândisardean tut tu.
Tha cana beșas hai gândisaras amen so va avela te phenas va jianasa so te cheras
hai cadea va avela amenghe mai ușoro te încăras i pacea mașcar amende.
Dacă cheras cadai buchi va avela te jianas so ci cărdeam mișto hai va jianasa te încăras amen parpale angla te phenas vareso. 
Acana, aven te dichas i mai importanto buchi: de fiesavi data cana greșisaras si mișto te sichioas vareso anda cadaia.
I șib si sar i iag! Sar simțosardeanas tut dacă avelas te des iag bi te cames varesoste?
Pachias că na prea mișto. Hai numai cadaia si? Nici.
Daștil-pe că cames te diches sar arăslean te cheres cadaia sau chiar te manghes ajutorii.
Sa cadea, daștil-pe că ci va avela te mai meches chanci po aragazo,
te na meches te jial i iag prea zurales sau te na șiudes pai cana i iag si cărdi catar o thulimos.
Va avela te jianes so te na cheres aver data.
Cadai buchi ajutil amen vi cana sam perade anda le dumes cai phenen-len amenghe aver.
Cadea că, te hachiaras mișto i situația caște jianas so te cheras anda le situații cai va avena.
Na bâstren, anda orisavi greșeala daisaras te sichioas vareso.
Cana ci mai gândisaras amen ca amare greșeli,
tha gândisaras amen ca so sichileam anda lende hai vi anda le buchia cai duchade amen, ajutil amen but.
Le săre la familiache cheren iech phari buchi.
Von trebun te len sama penga familiatar te aven sasteveste, fericime hai te așen pașă le Iehovastar.
Te dichas sar cherel iech dad cadaia andi ghili cai bușiol „Mânre vasta ci va avena te covlion”.  
Cuci șăre la familiache, o Iehova dichel sar iubin hai len sama tumara familiatar.
Na-i sea o timpo ușoro, tha dacă ci mechen te covlion tumare vasta
o Iehova va ajutila tumen hai tumara familia te slujin lesche.
Anda o video „Rode sumnacai andai Biblia”, sichileam sar te țâradas miștimata anda i citirea la Bibliachi.
Arăsleam co palutno lil anda le Scripturi ebraico, co Maleahi.
Te dichas so cherel o Iehova caște „ujiarel amen”.
Wow! Arăsleam co palutno lil anda le 12 profeți!
Da, terminisardeam-len sigo.
Ajutisardea man but so phenelas-pe ande iech turno, te gândisaras amen sar traisarde le manușa ande codo timpo.
So șucar! Hai so placiaia tut mai but anda cado lil?
O lil Maleahi na numai că si o palutno lil anda le Scripturi ebraico, tha silo vi scriime pala sar întâmplosarde-pe le buchia.
Le Iehovas sas-les bari răbdarea le israelițența, bișaldea but profeți caște ajutil-len tha cu sea cadala von cărde pale so vo urâlas.
Cadea si. Andel anglune capitolea citisaras că von ci andine pachiv le Iehovasche.
Von anenas lesche jertfe nasfale.
Mechle penghe rromnian caște len penghe aver cai ci slujin le Iehovasche hai le rașaia ci cărde chanci.
Dacă avilemas ando than le Iehovasco, mechlemas-len.
Tha o Iehova ci cherel cadaia, Vo bișaldea lenghe le profetos.
Cadea si.
Cana citisardem, somas atento ca chichiva dumes hai hachiardem so but daisaras te sichioas numai anda lende.
So șucar! Hai save si codol dumes?
Ando Maleahi 3:3 phenel-pe că o Iehova „va beșela sar codo cai bilavel … hai … va ujiarela le Levesche șiaven”.
Gândisardem man ca le dumes „va beșela” hai „codo cai bilavel”.
– Mișto.
– Rodem o verseto ande Watchtower Biblioteca Online
hai arachlem iech referința ande savi phenelas-pe că „I buchi codoleschi cai ujiarel lelas lesche but timpo.
Vo beșelas hai ajucărelas te bilavel-pe o sastr ji cana sicavelas sar iech oglinda ande savi daștilas te dichel-pe”.
Gândisardem man: Cadai buchi cărdea vi o Iehova le israelițența ande sea cado timpo.
Vo mechlea te nachen prin pharimata, ortosardea-len hai bișaldea lenghe mai butivar profeți.
Vo ujiardea-len pherdo răbdarea. 
Cadea si o Iehova!
Chiar cana le manușa duchaven-les, Vo silo lașio lența sea o timpo hai ajutil-len mai dur te cheren paruimata.
O Iehova beșel hai ujiarel amen pherdo răbdarea. Cadea sar cărdea le Israelosa, cherel vi amența.
Vo ujiarel amen prin i Biblia, prin lesche manușa sau cana nachas prin pharimata.
Ci si ușoro te avas ortosarde sau te nachas prin iech pharimos cai încarel mai but timpo, tha cadal buchia ujiaren amen.
Cadea si.
So sichioas anda sar si o Iehova?
Vo dichel so paruimata daștin te cheren le manușa.
Chiar cana duchal amen cana sam ujiarde o Iehova jianel so manușa daisaras te arăsas.
Prin cadaia dichas că o Iehova ci pedepsil amen, tha sicavel amenghe iubirea. 
Daa. O Iehova chiar mechlea ca o Maleahi te astarel pesco lil le dumența: „Sicadem tumenghe iubirea”.
O turno anda 2018 sicavel chichiva pușimata cai ajutin amen:
„Sar cherel man cadai buchi te simțov man?” sau „Sar daștiv te cherav cadaia?”.
Placian man cadal pușimata. Si ciaces, poiechdata duchal cana sam ortosarde.
Tha si mai ușoro te mechas amen ortosarde le Iehovastar cana gândisaras amen că Vo cherel cadaia anda codoia că iubil amen.
Vo jianel so manușa daisaras te arăsas.
Vi me trebul te pușav man: „Mechav man ciaces ujiardo le Iehovastar? 
Cana dav mânri sama că trebul te paruvav vareso mande, mangav man zurales anda cadaia?
Mechav man ortosardo la Bibliatar sau la organizațiatar? Așunav sau nici cana si manghe vareso phendo?
Cana o Iehova mechel te nachav prin pharimata, gândiv man numai co pharimos prin savo nachav hai holiarav man.
Sau mechav man ujiardo caște avau mai blândo hai răbdatorii?
Sar ajutil man o Iehova te dichav ciaces sar som?”
Lașe pușimata. Cana si bilado o sastr, trebul bari iag hai te nachel timpo caște înclel avri so ci si lașio. 
Sa cadea cana le pharimata sau le persecuții încăren mai but timpo ci si ușoro. 
Tha încalaven anda amaro ilo le buchia nasul anda save ci deam amari sama. Me nachlem prin cadaia.
Phendem buchia cai pala codoia falea man nasul hai sas ande mânro ilo buchia cai ci placiaia man.
Somas peradi! Dem mânri sama că mânro pachiamos covlilea.
Fal man nasul prin so nachlean. Anda codoia zuriaren amen le dumes anda o Maleahi.
O Iehova ajucărel-pe te înclen avri anda amende le buchia nasul, tha Vo dichel ca so si lașio ande amende.
Cana o Iehova ajutil amen te dichas amare covlimata, trebul te cheras paruimata na te mechas amen.
So șucar! O Iehova mechel te nachav prin pharimata anda codoia că Vo jianel so manuș daștiv te arăsav.
Vo si zurales bucurime cana dichel pesche calități ande amende.
Hmm. Daisaras te sicavas sar si o Iehova vi anda o modo sar dichas le coaveren.
„Dichav so si lașio ande lende? Sau so manușa daștin te arăsăn?
Sar va avena ciaces andi lumea nevi? Sau dichav numai lenghe greșeli?”
Hai daștiv te gândiv man: „So iubil o Iehova lende?”.
Daștil-pe că le buchia cai ci placial man lende si sea so trebul len caște cheren i buchi le Iehovaschi.
So șucar. Cadea si vi ande amari căsnicia. Camav te dichav le buchia lașe, le șucar calități, hai te na lav sama ca le greșeli.
Vi dacă sam căsătorime de but sau de țâra timpo o Iehova dichel so daisaras te arăsas. Vi me camav te cherav sa cadea.
So șucar buchia dichleam, numai anda iech verseto!
Ciaces. Dichleam sar traisarde codol manușa, dichleam le dumes cai sas folosime hai gândisardeam amen sar te cheras so sichileam.
Hai mai si vi aver buchia te rodas. Sar exemplo, so phenel o lil Maleahi anda o Mesia.
Si iech lil profetico anda savo sichioas zurales but.
O Maleahi sas o palutno profeto anda le Scripturi ebraico angla te avel o Mesia.
Tha, lesco mesajo așilea mai dur importanto.
O Maleahi dea duma anda o Ioan Botezătoro hai o Ioan Botezătoro îngărdea amen co Isus.
So șucar!
Tha so sichioas anda cado lil sar lel sama o Iehova le jiuvleandar? 
Sau so însemnol anda fiesavo anda amende i duma „cuci națiunea”? Abia ajucărav te rodas mai but. 
Sichileam cadea de but buchia anda cadala lila.
Dichleam mai but andai iubirea le Iehovaschi, lesco lașimos hai lesco zuralimos.
Ande fiesavo capitolo dichiol-pe sar silo Vo.
Sichileam cadea de but buchia pa o Iehova. Hai te rodas mai dur, mai si but buchia te sichioas!
Da, o Iehova ujiarel amen. Vo ajutil pesca organizația te cherel paruimata, tha vi amen.
Cher tuche timpo hai puș tut: „Sar ujiarel-ma man o Iehova caște arăsav iech slujitoro vi mai lașio?”
Le 12 profeți astarde viața andi seria<i> </i>„Rode sumnacai andai Biblia”.
Caște cheren lașe video-uri le echipe trebun te cheren le thana sar sas ande codol ghiesa.
Sar avelas: iech gav anda o Israelo, iech nevo chăr anda amare ghiesa sau aver thana.
Sar daștin le echipe te cheren cadai buchi? 
Aven te dichas.
Cana cheras le materialea video camas ca le manușa te sichion vareso. 
Cadea că trebul te arăsas ca lengo ilo. Anda codoia camas ca o video te astarel viața.
Angla te astaras le filmări trebul te pușias amen, dacă si amen deja iech than sau trebul te cheras aver?
Cheras buchi le lovența le phralenghe. Cadea că, camas te folosisaras-len goghiaverimasa.
Jianas că le phrala cheren phares buchi anda le love cai șion-len co donații.
Cadea că si importanto sar folosisaras-len cana cheras cadal thana.
Angla te cheras iech than anda le filmări, rodas te folosisaras iech than cai deja si amen.
Poiechdata le phrala mechen amen te folosisaras lenghe chăra andal filmări hai cana le autorități mechen amen, folosisaras vi le thana publico.
Sau daisaras te folosisaras iech than anda o Betelo.
Ande iech materialo video, le phrala trebunas te cheren i filmarea ande iech spitalo.
Tha von ci găle nici ca iech spitalo hai nici na cărde iech than.
Dine penghi sama că iech geamo anda o Betelo sas sea so trebulas lenghe.
Code cărde iech cotor anda iech filmarea, pala codoia chinde iech cotor ieche șiavorresa caște terminin o materialo video.
Anda chichiva proiectea ci daisaras te folosisaras le thana cai si amen, cadea că trebul te cheras aver thana andal filmări.
Pala so sas alosardo te cherel-pe iech than andal filmări, iech phral dichel-pe la echipasa hai alosaren so buchia trebul lenghe.
O directoro de imagini dichel-pe pesche echipasa hai alosaren de anglal so buchia te dichen-pe ande iech video.
Cadaia ajutil le phrales te hachairel so întâmplol-pe ando video hai so si mai importanto.
Cadea pregătisaras o than numai le buchianța cai trebun ande iech video.
Cana cheres buchi andel construcții, cames te cheres vareso cai încărel but timpo.
Tha cana cheras iech than anda le filmări si diferime. Camas te vazdas-les sigo hai te das-les tele sigo.
Trebul te sicavel mișto tha ci trebul te încărel but.
Butivar cheras buchia te fan-pe ciace, tha ci folosisaras amen lendar.
Sar exemplo, cheras iech bucătăria cai sila udara hai sertarea cai ci pâtren-pe. 
Sa cadea, cana cheras le scări, ci cheras dui etaje, tha cheras te fal-pe că si dui etaje.
Cadea ci lel amendar but timpo hai love.
Cana trebul te cheras iech nevo than anda le filmări, butivar folosisaras le pereți anda placaje cai cheras-len de mai anglal.
Si ușoro te cheras buchi lența.
Hai cana ci mai trebun amen, ci șiudas-len.
Pala so terminisaras iech proiecto, las tele o placajo cai folosisardeam-les,
las avri le capse hai sea so sas pe leste.
Pala codoia șioas aver placajo cai siles 6 mm.
Cadea daisaras te folosisaras pale le panouri. Si amen chichiva panouri de mai but sar 9 bărșa.
Cana cheras iech nevo than andal filmări, gândisaras amen ca so aver proiectea daștil te avel folosime. 
Sar exemplo, le phrala phende amenghe te folosisaras pale le buchia cai sas ando filmo „O Iehova, ande tute șiutem mânro pachiamos”.
Nachle cam 10 bărșa hai încă mai folosisaras codol buchia.
Amaro departamento rodel te folosil chichi mai but timpo sea so si amen.
Iech than anda o filmo „Iosia” sas-lo folosime vi ando video le Neemiasa hai vi anda le video-uri le Davidosa.
Hai iech aver than andal filmări sas folosime sar iech clasa mai nevi,
sar iech clasa mai purani vi sau sar iech chăr anda i America de Sud.
Sar cărdeam iech than cai sicavel sar iech Sala le Regatoschi hai folosisardeam-la ande but materialea video.
Anda codoia că sili mai țâni sar iech Sala le Regatoschi, numai 30 manușența fal-pe că sili pherdi.
Vi i biblioteca de palal sas-li parudi caște fal-pe că si iech aver than.
Sar exemplo, parudeam-la ande iech dormitoro sau ande iech than cai lel-pe iech intervio.
Cana folosisaras pale cado than das amari zor ca le phrala te na den penghi sama că si iech than cai mai dichle-les.
Cana gândisaras amen mișto so buchia te șioas ando than cai cheren-pe le filmări, daisaras te paruvas-les cu sea
hai cadea fal-pe că si aver than.
Sam bucurime cana lașiaras le thana anda le filmări.
Chiar cana poiechdata si amenghe mai pharo hai das sea amari zor caște cheras le buchia mai simplo arachas vi mai bari bucuria.
Bucuriv man te avav ande iech than le phralența hai le pheianța cai jianen sar te cheren le buchia vi cana na-i ușoro.
Von daștin te cheren anda vareso simplo iech buchi cai dichiol-pe zurale șucar ande iech video
hai cheren sea cadala ca le phrala te sichion vareso.
So șucar!
Le materialea video si iech cadouo le Iehovastar.
Jianav că va avela te dichas-len vi mai cuci anda codoia că amare phrala cheren iech phari buchi caște aven amen cadal thana andal filmări.
Aghies dichleam că bucurisaras o ilo le Iehovasco cana folosisaras amari goghi ande iech modo goghiaver,
cana cheras paruimata, cana cheras so si mișto anda aver hai cana mechas le Iehovas te ujiarel amen.
Angla te phandavas camas te dichas i Cambodgia.
I Cambodgia sili ando sud-esto la Asiaco. Voi sili prinjiandi anda lachi cultura hai le lașe habena.
Le manușa chinen le mai lașe buchia catar i piața caște cheren iech haben anda mașo cai bușiol,<i> </i>amok trei.
Avri anda le foruri daisaras te dichas but șucar buchia.
Ando nord-esto le themesco dichas șucar cascade, andel veșa dichas elefanți asiatici,
bare ibiși hai ande but thana daisaras te dichas plaia pherde lotuși.
Andi Cambodgia arachas cuci bara anda zircon.
Len si len iech șucar culoarea cai bușiol vânăto de Ratanakiri.
Le manușa thabaren cadal barra cai iech bari iag caște paruven penghi culoarea.
Ande 1958 avile le anglune misionari.
Ji ande 1965 le misionari George hai Carol Crawford, trebuisarde te tiliaren anda o them anda le nehachiarimata politico.
Iech timpo ci daștilas te încăren-pe întruniri hai nici te predichil-pe.
Anda codoia cam 25 bărșa andi Cambodgia ci sas nici iech Martoro le Iehovasco.     
Tha o Iehova ci bâstărdea le lașe manușen anda cado them.
Ande 1993 o guverno mechlea amen te predichisaras pale hai le misionari avile ando them.
Aghies pala 33 bărșa ando them si mai but sar 1 200 martori cai sichion andai Biblia 1 400 manușența. 
Șăla phrala hai pheia anda sea i lumea avile andi Cambodgia anda codoia că si iech șucar them hai lașe manușa.
Le manușa de catar sile voime hai silen iech ilo ujio. Anda codoia, but cai avile cade arăsle te iubin-len sigo.
Na de but timpo încărdea-pe i iechto Școala andal Evanghelizatori ande Cambodgia.
Biș phrala hai pheia bucurisarde-pe but anda cadai școala.
Vi mai but, iech familia de misioanari camle te cheren cadai școala încă de cana terminisarde o Galaado ande 1999.
Le tărne phrala cărde cadai școala ande iech than le misionarența cai prinjianen but buchia.
Dui phrala sas-le bișalde andi congregația Chbar Ampov.
Cadai congregația ajutil te predichil-pe ande iech than mai duriardo, ande Svay Rieng cai si cam ca 120 km. 
Le phrala andai grupa len partea ca le întruniri po interneto.
Le phrala anda Chbar Ampov jian butivar ca i grupa caște zuriaren penghe phralen hai caște predichin.
Le phrala hai le pheia anda Chbar Ampov
hai anda i grupa Svay Rieng bișalen amenghe lenghi thati hai guli iubirea. 
Zuriarel amen cana dichas amare phralen sar cheren phares buchi anda o Iehova.
Dichlean o JW Broadcasting catar o Sedio Mondialo le Martorengo le Iehovasche!


-