JW subtitle extractor

Dja ten alguns anu ki mi ku Juliana é amigu
i dja ten uns mês ki nu staba ta namora.
Kuzas staba ta bai rei di dretu entri nos.
Nick konvida-m pa un konvíviu na un parki,
djuntu ku alguns amigu,
i pa fla verdadi, N diskunfia kantu N repara ma nos família staba la tanbê.
N fla “sin!”
El ka staba ta spéra ma N ta pidiba el na kazamentu kel dia.
Nu fika txeu filís.
I notísia spadja faxi!
Na kel otu dia na runion,
tudu algen ben da-nu parabens,
spesialmenti nha amiga Natália.
El tinha un monti ideia.
N tinha gana di kumesa faze planus.
Nunka N ka daba kónta ma pripara un kazamentu ta da txeu trabadju.
I tudu algen tinha ses ideia di kuzê ki nu ta mesteba, ti nha pai!
Nu tevi ki pensa na kenha ki nu ta konvidaba,
skodje flor, dikorason, un fatu pa Nick i klaru nha bistidu!
Ta sérba rei di sábi.
Peloménus é si ki N ta pensaba.
Lógu N da kónta ma pa txeu algen kazamentu é un nogósiu.
Es ta tenta djuda
má omésmu ténpu é di kel manera li ki es ta ganha dinheru.
Ta parseba ma es ka tinha nada baratu.
I pa un bistidu ki N ta bistiba sô un dia, el éra karu dimás.
Tudu algen staba kontenti pamodi mi,
má déntu mi N kumesa ta fika txeu preokupadu.
Kantu nu torna nkontra na kaza di Juliana N fika konfuzu.
Uns dia antis, el staba txeu kontenti
má gósi el sta txeu preokupadu.
Éra sima si ningen ka sta obiba kuzê ki nu kreba.
Má, pa fla verdadi, N ka ten sertéza si nu sabia kuzê ki nu kreba.
N pensa má ta sérba bon si nu traba ténpu
i nu pensa na modi ki kazamentu di un sérvu di Deus debe ser.
Na kel otu dia nu pâpia ku irmon Jorge i irmon Sérgio
sobri uza Salon di Reinu pa nos kazamentu.
Es da-nu alguns konsedju ki djuda-nu,
i N sta kontenti pamodi es faze-l.
1 Coríntios 10:31 ta fla:
‘Ô nhos kume, ô nhos bebe, ô nhos faze kalker otu kuza,
nhos faze tudu kuzas pa glória di Deus.’
Irmon Sérgio djuda-nu odja ma kazamentu é un okazion spritual,
i óras ki nu sta faze planu nu meste lenbra di kuzê ki Jeová krê.
Irmon Jorge mostra-nu 1 João 2:15, 16 ki ta fla:
‘Ka nhos ama mundu, nen kes kuza di mundu.
Pamodi tudu kuza ki sta na mundu, sima dizeju di karni,
dizeju di odju i izibison di kuzas ki algen ten,
es ta ben di mundu.’
El lenbra-nu ma kel ki é normal pa mundu
é txeu diferenti di kel ki é dretu pa sérvus di Deus
i ma nu pode da un bon izénplu,
si nu sforsa pa skodje kel ki ta agrada Jeová.
Ti es da-nu alguns artigu sobri kazamentu pa nu lé.
Es kreba ten sertéza ma kel dia ta sérba txeu filís
i ma nu ka ta rapendeba di nada.
N pidi irmon Sérgio pa ser nos diretor di fésta
pa djuda-nu mante kuzas organizadu
i el fla ma nu pode papiaba sobri kel-li
timenti nu ta djantaba na kel noti.
Na kaminhu nu pasa pa un lugar di fotu.
N fika dimiradu di odja modi ki pesoas
ta faze fésta di kazamentu ku tantu luxu.
Ta parse má é sô un diskulpa pa faze un fésta grandi
envês di pa onra Deus.
Kel-li lenbra-N di kuzê ki Gálatas ta fla:
‘Kes óbra di karni, é kes-li
bebe dimás, féstas diskontroladu i kuzas sima kes-li.’
É ka kel-la ki nu krê fazeba.
Nos dôs nu tra ténpu pa analiza ku orason
kes artigu ki irmons da-nu.
Nu odja ma kes prinsípiu ki sta na Bíblia
tanbê pode djuda-nu organiza un kazamentu sinplis,
ki tudu algen ta gosta i ki ta da ónra pa Jeová.
Ta parse ma nu tinha ki mudaba alguns kuza.
Nu ka podia fazeba tudu kel ki nu pensa na komésu,
alguns kuza éra karu dimás.
I nu krê tinha sertéza
ma nu ka ta skodjeba nada ki ta mostra spritu di mundu.
Nton, nu disidi torna kumesa,
di es bês pa nu ten sertéza ma nu staba ta faze kuzas di manera di Jeová.
1 Timóteo 2:9 ta fla
ma un sérvu di Deus ‘debe uza ropa dretu, ku ruspetu i bon juis’.
Nu djobe txeu, má nu konsigi atxa un bistidu ki ka éra mutu karu,
ta mostra ruspetu i bunitu.
N konsigi atxa un fatu bunitu,
ki N pode uzaba dipôs.
I klaru, mininas ben djobe pa es ten sertéza ma staba ta konbina.
Ténpu pasa faxi.
N tilifona irmon Sérgio pa djuda-nu ten sertéza
ma tudu kuza ta kontiseba sima nu kreba.
Antis di nu da kónta,
nu staba ta manda konvitis i ta tirmina di faze kes kuza ki staba ta falta.
N ka sabe splika modi ki N xinti na kel dia,
kantu nha pai entra ku mi na Salon.
Juliana staba rei di bunita!
Kel serimónia foi perfetu.
I klaru, nu faze nos kazamentu sima lei ta fla.
Óras ki N ta odja fotus di nos kazamentu N ta ten bons lenbransa.
N fika txeu filís pamodi tudu kóre dretu.
Nu fika dimiradu
kantu nu odja kel dikorason bunitu ki nos amigus faze pa fésta.
Tudu kuza staba perfetu, sinplis i ki ta agrada Jeová.
Tudu nos amigus fla ma foi un di kes kazamentu más sábi ki es bai.
Na kel dia tudu kuza bai sima nu kreba.
I nu ka gasta más di kel ki nu tinha na planu.
I más inportanti inda, ku ajuda di Jeová nu kumesa nos kazamentu dretu.
N sta txeu filís pamodi nu konxe kunpanheru.
Ami tanbê nha amor.
I N sabe ma nu ta kontinua ta ser filís
si sénpri nu poi Jeová na primeru lugar.

Onra Jeová na dia di bu kazamentu