JW subtitle extractor

Téma di es mês li é:
“Ka mete na asuntus di mundu
— kuzê ki siginifika,
kuzê ki el ta iziji
i pamodi ki nu ta skodje faze si.”
Kal ki é bu opinion?
Bu ta konkorda ma bu ka
debe mete na asuntus di mundu?
Algun di nos ta pode para injustisa na mundu?
Óras ki nu ta obi algen ta diskuti kuzas di pulítika,
nu pode pensa ma kel konbérsu é sô filozofia.
Má óras ki injustisa ta afeta algen ki nu ta ama,
kel-la ta mexe ku nos.
Nu ka ta fika spantadu di odja
ma pesoas ten ideias diferenti sobri pulítika.
Apocalipse kapítlu 8 ti 13
ta fla ma na ténpu di fin,
pesoas ta ben tinha opinions fórti
i ma es ta ben xintiba presionadu na skodje un ladu.
Pergunta ki nu meste faze nos kabésa é:
Modi ki N ta reaji
óras ki pesoas ta pâpia sobri kuzê
ki govérnus debe faze pa para injustisa?
Dja ki nos é kristons,
nu krê imita izénplu di Jizus.
Si ten un algen ki podia fazeba
diferénsa na luta kóntra injustisa,
es algen éra Jizus.
El xinti péna di pesoas.
I ku puder ki el tinha di alimenta pesoas ku fómi,
di kura duentis,
di resusita mortus
i toka korason di pesoas ku se palavras,
Jizus podia sérba un líder pulítiku poderozu.
Di sertéza el tevi xansi di faze kel-la.
Satanás oferese-l
‘tudu reinu di téra interu’
si Jizus adoraba el sô un bês.
Má Jizus ka seta kel-la.
Nen el ka fla ma Satanás ka tinha
autoridadi pa faze-l kel oférta.
Más tardi, ómis di se própi país tenta faze-l rei,
má Jizus nega kel-la tanbê.
Dipôs, alguns algen pergunta-l si
éra dretu paga inpostu pa govérnu romanu.
Más un bês el ka toma ninhun ladu.
El nega bira un governanti di mundu,
un líder di se país
i el ka toma ladu di ninhun partidu.
Kel-li krê fla ma Jizus ka ta preokupaba?
Ma el ka tinha ninhun opinion?
El ta preokupaba sin!
Jizus preokupa más ki kel ki nu pode imajina.
El trata pesoas ku justisa
i asi el inxina-nu kuzê ki justisa siginifika di verdadi.
Má simé,
se obijetivu prinsipal éra
inxina pesoas sobri Reinu di Deus,
ki ta ben kaba ku injustisa pa tudu ténpu.
Nton, kal ki é atitudi ki Jizus fla
ma nu debe ten pa govérnus di ómi?
Nu ta prende ku respósta ki Jizus da
kantu es pergunta-l sobri
paga inpostu pa govérnu romanu,
ki sta na Marcos 12:15 ti 17:
‘“Nhos traze-m un dináriu pa N odja.”
Es traze-l un, i el pergunta-s:
“Kel róstu li i kuzê ki sta skrebedu li é di kenha?”
Es responde-l: “Di Séza.”
Nton, Jizus fla:
“Nhos paga Séza kel ki é di Séza,
má nhos da Deus kel ki é di Deus.”’
Kuzê ki é kes kuza di Séza?
Na Romanos 13:1 ti 7
apóstlu Polu pâpia sobri inpostu,
taxa,
ruspetu i ónra.
Nhos repara ma Jizus fla
‘pa paga kel ki é di Séza’.
Kuzê ki kel-la ta nvolve?
Kel Séza, ki éra kel governanti di kel ténpu,
dja fazeba txeu kuzas di valor
— sima muéda pur izénplu.
Nton, Séza tinha direitu di
pidi pa gentis pagaba inpostu.
Kel-li permiti govérnu kontinua
ta faze kuzas ki povu mesteba.
Jizus dexa kel-la klaru.
Pa otu ladu,
kuzas ki nu ten di más valor é Jeová ki da-nu
— sima nos korason, nos vida,
nos menti i nos forsa.
Nu ka pode da Séza kes kuza li
pamodi é ka el ki da-nu es.
Óras ki nu ta da nos vida pa Deus i nu ta ama-l
nu sta ta da Jeová di vólta kes kuza ki el da-nu.
Sobri nos amor pa Deus
Jizus fla na Marcos 12:30:
‘Bu debe ama Jeová, bu Deus,
di tudu bu korason,
di tudu bu alma,
di tudu bu menti i di tudu bu forsa.’
Nton kel amor ki nu ta da
Jeová di vólta ta nvolve tudu
— ninhun párti di korpu, funson,
kapasidadi i dizeju ka ta dexadu di fóra.
Nton kes ki ta ama Deus ta fika di ladu di Jizus,
ki Jeová skodje kómu Rei.
Modi ki disiplus di Jizus ta defendeba
se Reinu óras ki pesoas fikaba kóntra el?
Nu ta odja respósta na kel últimu noti,
di vida di Jizus na Téra.
Lenbra ma Mateus kapítlu 26
ta fla ma kantu ‘un monti di algen
ku spadas i ku pó’ ben pa pô-l prézu,
Pedru ‘puxa se spada, el ataka
kel skravu di saserdóti prinsipal i el korta-l orédja’.
Juan ta fla ma nómi di kel skravu éra Malku.
Lúkas ta fla ma Jizus poi mô
na orédja di kel ómi i el kura-l.
Imajina kel-li!
Jizus ka fika xatiadu ku kes ómi ki leba-l prézu.
Fóra kel-li, di akordu ku Mateus 26:52
Jizus fla Pedru:
‘Torna poi spada na se lugar,
pamodi tudu kes ki uza spada,
é spada ki ta mata-s’.
Pamodi ki Jizus ka aprova atitudi korajozu di Pedru?
Pa mésmu motivu ki nunka
el ka meteba na pulítika antis.
Jizus splika kel-li,
kantu ki el pâpia ku
Pónsiu Pilátus más tardi na kel noti.
Na João 18:36 ta fla si:
‘Nha Reinu ka ta faze párti di es mundu’.
Sin, se Reinu ka meste umanus pa difende-l,
pamodi el é ka un govérnu di ómi.
Modi ki nu pode ten sertéza
ma é kel-li ki Jizus kria flaba?
Nu odja ku atenson kuzê ki
kel otu párti di João 18:36 ta fla:
‘Si nha Reinu ta fazeba párti di es mundu,
nhas ajudanti ta brigaba pa
es ka ntregaba mi pa judeus.
Má, sima sta klaru,
nha Reinu é ka di li.’
Nton, dja ki nos é kristons,
modi ki nu ta nkara asuntus di pulítika?
Nu ka ta mete na pulítika.
Alvês pesoas ka ta ntende nos puzison.
Alguns ta atxa ma si nu ka ta apoia un govérnu
umanu é pamodi nu ta apoia otu govérnu.
Na anu di 1950,
na undi ki gósi é Kongu (Kinxasa),
kes autoridadi akuza
Tistimunhas di Jeová di ser kumunista.
Má duránti anu di 1970,
kantu ki Kongu pasa ta ten un govérnu kumunista,
kes novu autoridadi
kritika-nu pamodi nos é ka kumunista!
Má oji, dipôs di uns 30 anu,
Tistimunhas di Jeová sta legalizadu na Kongu (Kinxasa).
I timenti alguns ta atxa ma
nu ka ta mete na asuntus di mundu
pamodi nu ka ta nporta ku kuzê ki ta kontise,
otus ta nkara nos puzison kómu un amiasa.
Nu ben analiza kes dôs pontu li.
Primeru,
ten txeu diferénsa entri ka mete na asuntus di mundu
i ka nporta.
Ka nporta siginifika ka mostra
‘interesi pa pesoas ô ka mostra preokupason’.
Anos nu ta mostra interesi pa pesoas
i nu ta nporta ku ses sentimentu.
Sima Jizus, nu ta sforsa pa
djuda pesoas ku ses sufrimentu
óras ki nu ta djuda-s na kuzê ki es meste,
timenti nu ta inxina-s ma é sô
Reinu di Deus ki ta pode kaba ku injustisa.
Envês di tenta muda govérnus pulítiku,
nu ta uza Bíblia pa djuda pesoas muda
ses manera di ser i ses manera di vive.
Nu ta kridita ma kel-li é
midjór manera di djuda pesoas,
pamodi prublémas más grávi di ómis é ka
pamodi pulitíka má é pamodi ka faze vontadi di Deus.
Má pamodi ki nu pode fla ma Tistimunhas di Jeová
é un ajuda pa govérnus envês di un amiasa?
Nu ta obi ku ses lei,
nu ta apoia kalker trabadju ki ta fazedu na nos zóna,
sikrê é trabadju voluntáriu ô obrigatóriu,
i nu ta paga nos inpostu.
É verdadi ki nu ka ta vota na
ninhun kandidatu ô partidu,
má tanbê nu ka ta inpidi eleisons
i nu ka ta stroba kes ki krê vota.
É verdadi ki nu ka ta influensia opinion di pesoas,
faze kanpanha nen kandidata pa un lugar na govérnu,
má tanbê nu ka ta kritika kes ki sta na puder,
nu ka ta pâpia mal di ses trabadju
i nu ka ta faze manifestasons.
É verdadi ki nu ka ta sauda bandera,
má tanbê nu ka ta kema ô kuspi na bandera
ô ti mésmu rabaxa nason
ki kel bandera ta reprizenta
— mésmu na kes país ki es ta fla ma kel-li
é un manera legal di mostra
kuzê ki es ta xinti pa kel govérnu.
É verdadi ki nu ka ta kanta inu nasional,
má tanbê nu ka ta fla otus pa ka kanta
nen nu ka ta txoma atenson
di pesoas pamodi nu ka ta kanta,
sô nu ka ta partisipa.
É verdadi ki nu ka ta mata algen na géra,
má tanbê nu ka ta ataka pesoas na nos própi país.
Nton, sima nu ka ta mete na pulítika,
tanbê nu ka ta kondena kalker puzison pulítiku
— nen mésmu na nos korason.
Kel-li ki siginifika ka mete na asuntus di mundu.
Nos nu ka ta toma ninhun ladu.
Má i si kel ki govérnu ta iziji
ta bai kóntra kel ki Jizus ta manda?
Ten un prinsípiu na Bíblia pa kel-li.
Bu sta ta pensa na kuzê
ki Atos 5:28 i 29 ta fla
— ma ‘nu ten ki obi ku Deus
antis di nu obi ku ómis’?
Kel-li é ka disruspeta govérnu
má nu sta ta mostra grandi ruspetu pa Deus.
Si govérnu iziji pa nu faze kuzas ki Deus ta proibi
ô pa nu ka faze kel ki Deus ta manda,
nton nu ta kridita ma Deus
ka ta krê pa nu obi ku govérnu na kel kazu li.
Má, un algen pode fla
“N pode imajina alguns situason
ki pensa di kel manera li pode pô-u na prubléma.”
Na Mateus 24:9
Jizus fla ma kel-li ta ben kontiseba.
El fla:
‘Nhos ta ser odiadu pa tudu nasons,
pamodi nha nómi.’
I na Apocalipse 2:10
Jizus fla ki alguns di se disiplus ta podu na kadia
— ka nos tudu, alguns.
Nton nu ka ta fika dizanimadu si nu ka podu prézu,
má tanbê nu ka ta perde koraji si kel-la kontise.
Nos kabésa sta pensa na kes
milharis di irmon ku irmans
ki kondenadu i podu prézu pa txeu anu
pamodi es ka mete na asuntus di mundu.
Nu ten orgulhu di es.
Nu ta ora pa es.
Nu sabe ma Jeová sta kontenti ku es.
Óras ki es aguenta firmi na kes provason,
é un vitória pa nos tudu.
Pamodi?
Polu skrebe pa kongregason na Éfezu:
‘ N ta pidi nhos pa nhos ka dizisti pamodi
difikuldadis ki N ta aguenta pa djuda nhos,
pamodi es ta siginifika glória pa nhos.’
Polu skrebe kes palavra li
timenti el staba prézu na un kaza na Roma.
Na ki sentidu ki kes difikuldadi ki Polu pasa pa el
‘siginifikaba glória’ pa kes algen di Éfezu?
Pamodi el aguenta firmi i el prega sikrê ku opozison,
el mostra kel kongregason
ma kel priviléjiu ki es tinha kómu kristons
éra txeu inportanti.
Si Polu dizistiba,
kuzê ki kel-la ta mostraba?
Ma ses fé, ses pregason
i ses speransa na
Reinu di Deus ka tinha txeu valor.
Pamodi Polu aguenta firmi,
otus odja ma ser un kriston ten valor.
El mostra ma mante fiel bale pena.
Di mésmu manera,
kapasidadi di aguenta firmi
di nos irmons ku irmans ki sta prézu,
ta prova má ses speransa sta bibu
i ki Reinu di Deus é rial pa es.
Es ta xinti orgulhu
pamodi es ka ta reprizenta un govérnu umanu
má un govérnu ki sta na séu
— un govérnu ki ta ben
djuda-s vive pa tudu ténpu na un mundu
undi ki ka ta ben ten más géra.

David Schafer: Ka mete na asuntus di mundu — kuzê ki siginifika, kuzê ki el ta iziji i pamodi ki nu ta skodje faze si