JW subtitle extractor

Tema ña̱ ka̱ʼa̱nyó xa̱ʼa̱ yo̱o̱ yóʼo naníña:
“Ña̱ nda̱kú koo iniyó xíʼin Ndióxi̱,
ndáa ña̱ʼa kúúña,
ndáaña kúni̱ kachiña ta nda̱chun kéʼéyóña”.
¿Ndáaña ndákanixi̱níún xa̱ʼa̱ ña̱yóʼo?
¿Ndáaña keʼún?
¿Á ndáyáʼvi ña̱ ndákanixi̱ní
á ña̱ kéʼé iinlá na̱ yiví
na̱ kúni̱ sandiʼi-xa̱ʼa̱ tu̱ndóʼo ña̱ íyo tiempo vitin?
Tá káʼa̱n inkana xa̱ʼa̱ política,
sana ndákanixi̱níyó xa̱ʼa̱ ña̱ káʼa̱n kuitína.
Soo tá iin na̱ veʼeyó ndóʼo iin tu̱ndóʼo,
sana xa̱a̱ síín kivi ndakanixi̱níyó.
Ta va̱ása ndákanda̱-iniyó
ña̱ xa̱a̱ síín ndákanixi̱ní na̱ yiví xa̱ʼa̱ ña̱ política.
Nu̱ú capítulo 8 nda̱a̱ 13 ña̱ Revelación,
káʼa̱nña ña̱ tiempo nu̱ú ndíʼi,
ku̱a̱ʼání ña̱ ka̱ʼa̱n na̱ yiví xa̱ʼa̱ ña̱ política
ta nda̱a̱ ixandúxana xíʼinna
ña̱ kundiku̱nna iin partido.
Ña̱kán iin pregunta ña̱ xíniñúʼu keʼéyó kúú:
“¿Ndáaña kéʼíi̱ tá káʼa̱n na̱ yiví xíʼi̱n xa̱ʼa̱
nda̱saa kivi nasa̱mayó tu̱ndóʼo ña̱ íyo ñuyǐví yóʼo?”.
Miíyó na̱ ndásakáʼnu Ndióxi̱ kúni̱yó kundiku̱nyó yichi̱ ta̱ Jesús.
Iinlá kúú ta̱ ku̱chiñu xíʼin tu̱ndóʼo ña̱ íyo ñuyǐví yóʼo,
ta ta̱yóʼo xi̱kuu ta̱ Jesús.
Chi ña̱ ndixa xi̱kundáʼvi-inira xi̱xinira na̱ yiví.
Ku̱chiñura ta̱xira ña̱ xi̱xi na̱ yiví,
sa̱ndáʼara na̱ ndeé ndóʼo,
sa̱ndátakura na̱ ni̱xi̱ʼi̱
ta nda̱a̱ ni̱xa̱a̱ra níma̱ na̱ yiví xíʼin ña̱ xi̱sanáʼa̱ra,
ta̱yóʼo kivi koora iin político
ta ni iinna kǒo kivi koo nda̱a̱ táki̱ʼva íyora.
Ku̱a̱ʼánína xi̱kuni̱na ndasanara rey.
Ta̱ Ndi̱va̱ʼa ni̱ka̱ʼa̱nra xíʼinra
ña̱ taxira ndiʼi ña̱ xáʼndachíñu ña̱ íyo ñuyǐví yóʼo ndaʼa̱ra
tá ná ndasakáʼnurara,
soo ta̱ Jesús
kǒo níndasakáʼnurara
ta saátu
va̱ása níka̱ʼa̱nra ña̱ su̱ví kuenta ta̱ Ndi̱va̱ʼa kúú ña̱ chíñu ña̱ íyo ñuyǐví yóʼo.
So̱ndíʼi na̱ judío
xi̱kuni̱na ndasanara rey
soo va̱ása níxiinra.
Inka yichi̱ iin na̱ yiví ni̱nda̱ka̱tu̱ʼunnara
á xíniñúʼu chaʼvina impuesto
ña̱ xi̱ndakiʼin na̱ ñuu Roma,
ta va̱ása níka̱ʼa̱nra xíʼinna
ndáaña xíniñúʼu keʼéna.
¿Á kǒo níkeʼéraña
saáchi va̱ása ndíʼi-inira xa̱ʼa̱ ña̱yóʼo
á xa̱ʼa̱ ña̱ kǒo xínira ndáaña kivi keʼéna?
Va̱ása.
Ndeéníva xi̱ndiʼi-inira xa̱ʼa̱ na̱ yiví.
Va̱ʼaní ña̱ xi̱keʼéra xíʼinna,
nda̱kúní ni̱xi̱yo ña̱ ke̱ʼéra.
Ni saá xi̱kunda̱a̱-inira
ña̱ chindeétáʼanka xíʼinna kúú ña̱
sanáʼa̱rana xa̱ʼa̱ Reino Ndióxi̱,
chi reino yóʼo kúú ña̱ kivi sandiʼi-xa̱ʼa̱ ndiʼi tu̱ndóʼo
ña̱ íyo vitin.
Ta, ¿ndáaña sákuaʼayó xa̱ʼa̱ ta̱ Jesús
xa̱ʼa̱ nda̱saa xíniñúʼu kotoyó na̱ gobierno?
Ná kotoyó ndáaña ni̱ka̱ʼa̱nra
tá ni̱nda̱ka̱tu̱ʼunnara xa̱ʼa̱ ña̱ chaʼvina impuesto.
Ná nandukúyó Marcos
12:15-17:
Ta, ¿ndáaña kúú ña̱ʼa ta̱ Cesar?
Nu̱ú Romanos 13:1-7,
ta̱ apóstol Pablo ni̱ka̱ʼa̱nra xa̱ʼa̱ ña̱yóʼo ña̱ kúúña impuesto,
ña̱ yi̱ʼvíyó xíʼin ña̱ to̱ʼó kooyó.
Ta̱ Jesús ni̱ka̱ʼa̱nra ña̱ kivi taxiyó
á sandándikoyó sava ña̱ʼa ndaʼa̱ ta̱ César.
¿Ndáaña ku̱ni kachira?
Na̱ gobierno na̱ ñuu Roma
ke̱ʼéna sava ña̱ʼa ña̱ ndáyáʼvi,
tá kúú i̱xava̱ʼana xu̱ʼún.
Ta xi̱kuumiína derecho ña̱ ndukúna ña̱ ndikó sava xu̱ʼún yóʼo ndaʼa̱na,
chi xíʼin ña̱yóʼo
xi̱taxina sava ña̱ xi̱xiniñúʼu na̱ ñuu kán.
Ta̱ Jesús xi̱kunda̱a̱va̱ʼa-inira xa̱ʼa̱ ña̱yóʼo.
Soo,
ña̱ʼa ña̱ ndáyáʼvika Ndióxi̱ ta̱xiña ndaʼa̱yó tá kúú:
níma̱yó, xi̱níyó,
ndee̱yó xíʼin ña̱ tákuyó.
Ña̱kán kǒo kívi taxiyó ni iin ña̱yóʼo ndaʼa̱ ta̱ César á na̱ gobierno,
chi su̱ví na̱yóʼo kúú na̱ nítaxiña ndaʼa̱yó.
Ndaʼa̱ mií Jehová táxiyó ña̱yóʼo
tá ndátaxiyó miíyó ndaʼa̱ra
ta saátu tá náʼa̱yó ña̱ kúʼvi̱-iniyó xíniyóra.
Ta̱ Jesús nda̱kanixi̱níra xa̱ʼa̱ ña̱yóʼo
tá ni̱ka̱ʼa̱nra ña̱ va̱xi nu̱ú Marcos 12:30:
Ña̱kán xíniñúʼu kuʼvi̱-iniyó kuniyó Ndióxi̱ xíʼin ndiʼi ña̱ kúúmiíyó:
xíʼin ndiʼi ndee̱yó,
xíʼin ndiʼi ña̱ xíniyó keʼéyó
ta saátu xíʼin ndiʼi ña̱ kúni̱yó keʼéyó.
Ta na̱ kéʼé ña̱yóʼo náʼa̱na ña̱ kúʼvi̱-inina xínina Jehová
ta ndíku̱nna ta̱ Jesús
chi ta̱yóʼo kúú rey ta̱ nda̱ka̱xinra.
Ta,
¿nda̱saa náʼa̱ na̱ ndixa ndásakáʼnu Ndióxi̱
ña̱ ndíku̱nna ta̱ Jesús
xíʼin reino Ndióxi̱ ni sáa̱na xíninana?
Ña̱ ku̱u ñuu ta̱ kúma̱níka kuvi ta̱ Jesús
kivi chindeétáʼan xíʼinyó ña̱ kunda̱a̱-iniyó ña̱yóʼo.
Mateo 26 káchiña
ña̱ “ki̱xi ku̱a̱ʼá na̱ yiví
ta níʼina yuchu̱ xíʼin yitu̱n”
ña̱ va̱ʼa tiinnara.
Tasaá ta̱ Pedro
ta̱várá yuchu̱ra
ta xa̱ʼndara so̱ʼo iin ta̱ káchíñu nu̱ú ta̱ su̱tu̱”.
Ta̱ Juan káchira ña̱ Malco xi̱naní ta̱ ta̱a yóʼo.
Ta̱ Lucas káʼa̱nra
ña̱ ti̱in ta̱ Jesús so̱ʼo ta̱ ta̱a kán
ta sa̱ndáʼarara.
Iin ndákanda̱-iniyó xíʼin ña̱ ke̱ʼé ta̱ Jesús.
Chi kǒo nísa̱a̱ra xíʼin na̱ ni̱xa̱ʼa̱n ti̱in ñaʼá.
Mateo 26:52 káʼa̱nña
ña̱ ta̱ Jesús ni̱ka̱ʼa̱nra xíʼin ta̱ Pedro:
“Taxiva̱ʼa espadaún
saáchi ndiʼi na̱ xíniñúʼu espada
xíʼin espada kuvina”.
¿Nda̱chun kǒo níkutóo ta̱ Jesús ña̱ ke̱ʼé ta̱ Pedro?
Xa̱ʼa̱ ña̱ ni iin yichi̱ kǒo níki̱ʼvira xíʼin ña̱ política.
Ta ni̱ka̱ʼa̱nkara xa̱ʼa̱ ña̱yóʼo
tá ni̱xa̱ʼa̱nra nu̱ú ta̱ Poncio Pilato.
Nda̱a̱ táki̱ʼva káchi Juan 18:36,
ta̱ Jesús ni̱ka̱ʼa̱nra:
Ta xa̱ʼa̱ ña̱ su̱ví na̱ yiví níchindúʼu reinora,
va̱ása ndátura ña̱ ndakiʼin na̱ soldado tu̱ʼunra.
¿Nda̱saa kivi kunda̱a̱-iniyó ndáaña xi̱kuni̱ kachi ta̱ Jesús?
Ná kaʼviyó ña̱ káchika versículo yóʼo.
Ña̱yóʼo kúú Juan 18:36:
Ña̱kán,
¿ndáaña xíniñúʼu keʼé miíyó tá káʼa̱nna xíʼinyó xa̱ʼa̱ ña̱ política?
Kǒo kíʼviyó xíʼin ña̱yóʼo.
Na̱ yiví va̱ása kúnda̱a̱-inina
nda̱chun kǒo kíʼviyó xíʼin ña̱ política.
Savana káchina
ña̱ tá kǒo ndíku̱nyó sa̱tá iin gobierno,
sana inkaña ndíku̱nyó.
Tá ku̱i̱ya̱ 1950
ña̱ naní vitin República del Congo,
na̱ chíñu ni̱ka̱ʼa̱nna xa̱ʼa̱ na̱ testigo Jehová
ña̱ ku̱a̱ʼa̱nna contra na̱ gobierno.
Soo tá so̱ndíʼi
inka na̱ chíñu na̱ ku̱a̱ʼa̱n contra na̱ gobierno,
i̱xandi̱va̱ʼana xíʼin na̱ testigo
xa̱ʼa̱ ña̱ kǒo ku̱a̱ʼa̱nna contra na̱ gobierno.
Vitin
xa̱a̱ 30 ku̱i̱ya̱ kúú ña̱ chindúʼu va̱ʼana xa̱ʼa̱ na̱ testigo Jehová ñuu kán.
Sava na̱ yiví
va̱ása kúnda̱a̱-inina xa̱ʼa̱ ña̱ ndakú íyo iniyó
chi ndákanixi̱nína
ña̱ va̱ása ndíʼi-iniyó xa̱ʼa̱ tu̱ndóʼo ña̱ íyo ñuyǐví yóʼo
á ndákanixi̱nína
ña̱ íyoyó contra na̱ gobierno.
¿Ndáaña kivi ka̱ʼa̱nyó xa̱ʼa̱ ña̱yóʼo?
Va̱ása inkáchi íyo ña̱ nda̱kú koo iniyó
xíʼin ña̱ kǒo ndíʼi-iniyó xa̱ʼa̱ tu̱ndóʼo ña̱ íyo vitin.
Ndíʼiva-iniyó xa̱ʼa̱ na̱ yiví
ta saátu xa̱ʼa̱ ña̱ ndóʼona.
Nda̱a̱ táki̱ʼva ke̱ʼé ta̱ Jesús,
kéʼéyó sava ña̱ʼa ña̱ va̱ʼa chindeétáʼanyó xíʼinna.
Ta iin ña̱ kéʼéyó kúú ña̱ káʼa̱nyó xíʼinna xa̱ʼa̱ reino Ndióxi̱
ña̱ sandiʼi-xa̱ʼa̱ña ndiʼi tu̱ndóʼo ña̱ íyo tiempo vitin.
Tá sánáʼa̱yó na̱ yiví ña̱ nda̱a̱ ña̱ va̱xi nu̱ú Biblia
kúni̱yó ná nasamana ña̱ ndíka̱a̱ níma̱na
su̱ví ña̱ política.
Ta iin ña̱ va̱ʼaní kúú ña̱yóʼo
chi tu̱ndóʼo ña̱ ndóʼo na̱ yiví
su̱ví xa̱ʼa̱ ña̱ política ki̱xáʼaña
chi ki̱xáʼaña xa̱ʼa̱ ña̱ kǒo kéʼé na̱ yiví ña̱ káʼa̱n Ndióxi̱.
Ta, ¿nda̱chun káchiyó
ña̱ kǒo íyo miíyó na̱ testigo Jehová contra na̱ gobierno
ta kéʼéyó ña̱ va̱ʼa?
Saáchi ndíku̱nyó ley ña̱ káʼa̱n tu̱ʼun Ndióxi̱,
kéʼéyó sava chiñu ti̱xin ñuu nu̱ú ndóoyó
ta viíní kéʼéyó tá cháʼviyó impuesto.
Ni kǒo táxiyó voto ndaʼa̱ ni iin partido
soo saátu kǒo sásiyó nu̱ú inkana ña̱ keʼénaña.
Ndixava va̱ása káʼa̱n va̱ʼayó xa̱ʼa̱ iin ley
ni va̱ása kíʼviyó xíʼin na̱ político
ña̱ va̱ʼa ndakiʼinyó iin chiñu ti̱xin gobierno,
soo kǒo ku̱a̱ʼa̱nyó contra na̱ xáʼndachíñu
ni xa̱ʼa̱ ña̱ káʼa̱nna keʼéna,
ni va̱ása ndátaka ku̱a̱ʼáyó ña̱ ka̱ʼa̱nyó contra na̱ gobierno.
Ni kǒo chíndeéyó bandera,
soo va̱ása xáʼmiyóña
ni va̱ása kúndaayó ta̱sií yuʼúyó nu̱ú ña̱ bandera
ni kǒo káʼa̱n ndi̱va̱ʼayó xa̱ʼa̱ ñuu nu̱ú íyoña,
ni íyo sava ñuu nu̱ú kivi keʼéyóña
soo miíyó va̱ása kéʼéyó ña̱yóʼo.
Ni kǒo xítayó himno nacional,
soo kǒo sásiyó nu̱ú inkana ña̱ katanaña
ni va̱ása kúni̱yó koto ndiʼina
ña̱ kǒo xítayó ña̱yóʼo,
kuití kǒo keʼéyóña.
Ni kǒo xáʼa̱nyó guerra
ña̱ kaʼníyó inkana,
soo va̱ása íxandi̱va̱ʼayó xíʼin na̱ ndóo yatin xíʼinyó.
Tá saá ni kǒo ndíku̱nyó ña̱ káʼa̱n na̱ político
ni va̱ása káʼa̱n kúachíyó xa̱ʼa̱na
ta saátu kǒo ndákanixi̱níyó
ña̱ va̱ása va̱ʼa xa̱ʼa̱ ni iinna.
Ña̱yóʼo kúú ña̱ ndixa kúni̱ kachi ña̱ nda̱kú koo iniyó:
ña̱ kǒo ndíku̱nyó sa̱tá ni iinna.
Soo,
¿ndáaña keʼéyó tá káʼa̱n na̱ gobierno xíʼinyó
ña̱ keʼéyó iin ña̱ va̱ása kítáʼan xíʼin ña̱ ni̱ka̱ʼa̱n ta̱ Jesús?
Íyo iin texto ña̱ kivi chindeétáʼan xíʼinyó.
Sana ndákaʼánndó ña̱ káʼa̱n Hechos
5:28 xíʼin 29
ña̱ káchi
“siʼnaka ña̱ káʼa̱n Ndióxi̱ xíniñúʼu kuniso̱ʼondi̱
su̱víka ña̱ káʼa̱n ndóʼó”.
Ta su̱ví xa̱ʼa̱ ña̱ kǒo íxato̱ʼóyó na̱ chíñu kéʼéyó ña̱yóʼo,
kéʼéyóña chi ta̱ xíniñúʼu ixato̱ʼóyó kúú Ndióxi̱.
Tá na̱ gobierno káʼa̱nna xíʼinyó
ná keʼéyó iin ña̱ va̱ása kútóo Ndióxi̱
á káʼa̱nna xíʼinyó ña̱ kǒo keʼékayó ña̱ káʼa̱n Ndióxi̱,
nu̱ú Ndióxi̱ va̱ása xíniñúʼu kuniso̱ʼoyó na̱yóʼo.
Sana kivi ka̱ʼa̱n iinna:
“Soo tá ná keʼéyó ña̱yóʼo
na̱ chíñu kivi ixandi̱va̱ʼana xíʼinyó”.
Ndixava,
nu̱ú Mateo 24:9 ta̱ Jesús ni̱ka̱ʼa̱nra
ña̱ saá kuuva.
Siʼa káchi texto yóʼo:
Nu̱ú Revelación 2:10
ni̱ka̱ʼa̱nra ña̱ chika̱a̱na sava na̱ discípulora veʼeka̱a.
Ndixava
va̱ása ndakava-iniyó tá kǒo chíka̱a̱na miíyó veʼeka̱a,
soo saátu
va̱ása xíniñúʼu ndakava-iniyó tá ná chika̱a̱na miíyó veʼeka̱a.
Xíʼin ña̱yóʼo ndákanixi̱níyó
xa̱ʼa̱ ndiʼi na̱ hermanoyó na̱ chíka̱a̱na veʼeka̱a xa̱ʼa̱ ña̱ nda̱kú íyo inina.
Káʼa̱nyó xíʼin Jehová xa̱ʼa̱na.
Kúsi̱íní-iniyó ña̱ nda̱kú íyo inina.
Ta kándíxayó
ña̱ chíndayáʼvi Jehová ndiʼi ña̱ kéʼéna.
Ña̱ ndakú íyo inina,
chíndeétáʼanña xíʼin ndiʼiyó
na̱ ndásakáʼnu Jehová iníísaá ñuyǐví.
¿Nda̱chun káʼa̱nyó ña̱yóʼo?
Ná kotoyó ña̱ ni̱ka̱ʼa̱n ta̱ Pablo xíʼin na̱ hermano na̱ ñuu Éfeso:
Ta̱yóʼo xi̱ndika̱a̱ra veʼeka̱a ña̱ ñuu Roma tá ka̱ʼyíra carta yóʼo.
¿Nda̱chun ni̱ka̱ʼa̱n ta̱ Pablo ña̱ íxato̱ʼóra na̱ hermano
na̱ ñuu Éfeso
xa̱ʼa̱ ña̱ ndakú íyo inira tá xóʼvi̱ra?
Saáchi xa̱ʼa̱ ña̱ ndakú ni̱xi̱yo inira ni̱na̱ʼa̱ra
ña̱ ndáyáʼviní ndasakáʼnuyó Ndióxi̱.
¿Ndáaña ndakanixi̱nína
tá va̱ása ndakú níxi̱yo ini ta̱ Pablo?
Ndakanixi̱nína ña̱ kǒo ndáyáʼvi ña̱ kándíxara Ndióxi̱,
ña̱ na̱túʼunra xa̱ʼa̱ra
ta saátu ña̱ kándíxara reino Ndióxi̱.
Soo xa̱ʼa̱ ña̱ ku̱ndeé-ini ta̱ Pablo
va̱ʼaní yichi̱ sa̱ndákoora nu̱ú na̱ hermano.
Ni̱na̱ʼa̱ra ña̱ ndáyáʼviní ña̱ nda̱kú koo iniyó xíʼin Ndióxi̱
ni sava xóʼvi̱yó.
Saátu ña̱ kúndeé-ini na̱ hermanoyó na̱ ñúʼu veʼeka̱a tiempo vitin
náʼa̱ña ña̱ ndeéní íyo ña̱ kándíxana,
ña̱ ndixa kándíxana reino Ndióxi̱
ta kúnda̱a̱-inina
ña̱ kǒo kítáʼanña xíʼin ña̱ gobierno ña̱ íyo ñuyǐví yóʼo,
chi ndiví íyo reino yóʼo,
ta ña̱yóʼo kúú ña̱ taxi ña̱ kutakuyó ndiʼi tiempo
ti̱xin iin ñuyǐví
nu̱ú va̱ása kooka ku̱a̱chi
ta inkáchi kitáʼan ndiʼiyó.

Ta̱ David Schafer: Ña̱ nda̱kú koo iniyó xíʼin Ndióxi̱, ndáa ña̱ʼa kúúña, ndáaña kúni̱ kachiña ta nda̱chun kéʼéyóña