JW subtitle extractor

Fotokevitrintsika amy fanjava ty:
“Karakory ma tsy an̈isany donia ty zen̈y?
Ino aby tafiditry amy zen̈y?
Nan̈ino atsika karaha zen̈y?”
Karakory hevitrinao?
Anao ma man̈eky fa atsika tsy tokony ho an̈isany donia ty?
Misy olo edy ma mahavita man̈adoso ny tsy rariny zen̈y?
Atsika koa maharen̈y olo mikoran̈a momba politiky, atsika mety tsy ho taitry foeky,
fotony karaha tsy mahazo ribany tran̈ontsika raha zen̈y.
Fa izikoa ndraiky misy havantsika avoa raha tsy rariny,
mety tsy azontsika onon̈o aby atsika efa milan̈y aminany io.
Tsy mahagaga atsika izikoa olo tsy mitovy hevitry mikasiky politiky.
Efa nikoran̈iny Apokalypsy toko 8-13 fa
hanjary fototro koran̈anolo politiky ndreky fitondrasan̈a,
ke loso misy olo amy zay hilan̈iandro.
Atsika tsiaraikiaraiky mila man̈ontany:
Ino raha tokony hataoko
izikoa misy olo miady hevitry momba raha tokony hataony fanjakan̈a han̈adosoan̈a ny tsy rariny?
Atsika io Kristianin̈y, ke tiantsika hangala tahaka raha nataony Jesosy.
Izikoa nisy olo nahavita nan̈adoso raha tsy rariny zen̈y tambony tany teto, efa Jesosy edy.
Izy ten̈a nahinakinaka olo.
Izy nahavita nan̈amia hanin̈y olo maro, nampajanga olo marary, namelon̈o olo maty.
Nahay nandresy lahatra ndreky nanohin̈y fônolo koa izy.
Izikoa raha jiaby zen̈y zahan̈a, izy tokony hanjary pitondra.
Vitany nan̈ano zen̈y, fa tsy nataony fo.
Nisy fotoan̈a Satana efa nila han̈amia izy “fanjakan̈a ndreky voninahitry jiaby ambony tany”,
izikoa Jesosy mankohoko aminany indraiky fo.
Fa Jesosy tsy nan̈eky zen̈y.
Tsy nifamarany Jesosy koa fa Satana nanan̈a fahifan̈a han̈amia izy raha aby io.
Tsy ela tafaranizen̈y,
iro olo tanàna araiky tamy Jesosy nila han̈ano izy panjaka, fa Jesosy tsy nety koa.
Baka io nisy olo koa nan̈ontany izy mety sa tsy mety man̈efa latety amy fanjakan̈a romanin̈y.
Tsy nilan̈y taminjovy na taminjovy koa Jesosy taminio.
Tsy nan̈eky natao panjakany donia ty izy, na hanjary pitondra firenena,
na hanjary panohan̈a antoko politiky.
Dikanizen̈y ma Jesosy tsisy raha nijireny foeky?
Tsisy hevitrinany foeky ma izy?
Ehe, tsy zen̈y foeky.
Jesosy edy ny ten̈a mahay mahinakinaka olo ke.
Nan̈ano ny rariny fo izy.
Naboakany raha zen̈y tamy fomba nitondrasany olo.
Fa ndray zen̈y, Fanjakan̈any Zan̈ahary raha ten̈a nampianariny Jesosy olo,
fotony izio zaraiky fo han̈adoso raha tsy rariny jiaby.
Ke izikoa volan̈a Jesosy zahan̈a,
tokony ho karakory toetsain̈intsika manoloan̈a fanjakan̈anolombelon̈o aby io?
Alo zahavantsika raha nivolan̈iny Jesosy, amy Marka 12:15-17:
Ino aby ma rahany Kaisara io?
Koran̈iny Paoly amy Romanina 13:1-7 fa rahany Kaisara io latety, tahotro, ndreky fan̈ajan̈a.
Aleva onon̈o volan̈a Jesosy ty: ‘Ifà amy Kaisara rahany Kaisara.’
Karakory ma zen̈y?
Kaisara io manampahifan̈a farany an̈abo taminy andra zen̈y,
ke nan̈amia fahifan̈a fanjakan̈a romanin̈y han̈ano raha maro valera izy,
an̈isanizen̈y vola aby io.
Baka amy zen̈y nahavy Kaisara
nanan̈a fahifan̈a hitaky han̈ampodianan̈a sasany amy vola aby zen̈y taminany.
Vola aby io baka ampiasainy fanjakan̈a ikarakaran̈a raha ilainy vahoaka.
Nataony Jesosy mazava taminolo tsarabe raha zen̈y.
Zan̈ahary koa nan̈amia atsika raha ten̈a valera,
karaha ataony fô, fahin̈ana, jery, ndreky angovo anan̈antsika.
Tsy mety amian̈a Kaisara raha aby zen̈y, fotony tsy izy nan̈amia zen̈y atsika.
Jehovah zaraiky fo mendriky amiantsika zen̈y.
Man̈ano zen̈y atsika izikoa tia izy ndreky manokanten̈a aminany.
Mikoran̈a mikasiky fitiavan̈a Zan̈ahary zen̈y Jesosy amy Marka 12:30:
Dikanizen̈y, atsika koa tia Jehovah amy fôntsika jiaby,
amezantsika izy koa dikanizen̈y ain̈intsika ndreky angovontsika jiaby,
baka io fahaizan̈antsika ndreky fan̈irian̈antsika jiaby.
Jesosy io Panjaka nifidiny Jehovah, ke milan̈y aminany lan̈iany olo tia Jehovah.
Karakory fo basy nataony pianatrany Jesosy niaro Fanjakan̈a io, izikoa fa nisy olo nanohitry izio?
Hamaliantsika zen̈y,
alo zahavantsika raha nandalo taminy alin̈y farany talohany nifatesany Jesosy.
Tantarainy Matio toko 26 ao fa
izikoa fa ‘nisy vahoaka nitondra sabatra ndreky koboay handeha hanambotro Jesosy,
‘Petera nan̈atsoaka sabatranany,
baka io nifirainy sofin̈y panompony pison̈orobe in̈y, ke napoaka tan̈y sofin̈y io.
Jaona nivolan̈a fa Malko an̈arany panompo io.
Lioka koa nivolan̈a fa nitosiny Jesosy sofin̈y lelahy io, ke janga direkty.
Zahava amy zen̈y fo baka!
Tsy neloko taminolo handeha hisambotro izy aby io foeky Jesosy.
Koran̈iny amy Matio 26:52 ty raha nivolan̈iny tamy Petera:
Nisy korazy mare Petera tio,
kanefa nan̈ino ma Jesosy tsy nankasitraka raha nataony?
Mbala mira taloha tarỳ fo antony.
Fotony izy tsy tihibidabida raha momba politiky foeky.
Mbala nan̈azava raha zen̈y Jesosy taminizy nikoran̈a tamy Pontio Pilato taminy alin̈izin̈y fo.
Koran̈iny Jaona 18:36:
Marin̈y ankitin̈y fa Fanjakan̈any Jesosy io tsy baka aminolombelon̈o,
ke tsy mila olo izio hiaro Fanjakan̈a io.
Nan̈ino ma atsika mivolan̈a fa zen̈y raha tiany Jesosy koran̈iny?
Zahava tsarabe baka raha koran̈iny tohiny andininy amy Jaona 18:36:
Ke atsika Kristianin̈y, karakory tokony fihetsikintsika man̈oloan̈a politiky?
Atsika tsy milan̈y na aminjovy na aminjovy.
Ndraikindraiky tsy azonolo nan̈ino atsika karaha zen̈y.
Sasany mieritreritry fa atsika koa tsy manohan̈a fitondrasan̈a araiky,
dikanizen̈y atsika manohan̈a fitondrasan̈a hafa.
Taminy 1950 tan̈y, fitondrasan̈a ta Repobliky Demokratiny Congo tan̈y nivolan̈a fa
Vavolombelon̈o Jehovah zen̈y Koministy.
Kanefa izikoa fa nanjary Koministy fitondrasan̈a tan̈y tamy taon̈o 1970,
neloko tamintsika iro manampahifan̈a vaovao tao,
fotony zen̈y atsika tsy nilan̈y tamy Koministy.
Fa izioty ndraiky,
efa 30 taon̈o zay nikeny fitondrasan̈a tan̈y ho aradalàn̈a Vavolombelon̈o Jehovah.
Olo samy amy fahazahoany atsika tsy milan̈y na aminjovy na aminjovy io.
Misy mieritreritry fa tsy mijery raha mandalo erantany foeky zen̈y atsika.
Misy koa mivolan̈a fa manohitry fitondrasan̈a zen̈y atsika.
Hikoran̈a momba hevitry aroe io atsika.
Voanalohany, tsy mitovy dikany tsy milan̈y na aminjovy na aminjovy ndreky tsy mijery raha io.
Misy boky araiky mivolan̈a fa olo tsy mijery raha zen̈y ‘tsy miraharaha,
na tsy miasaloha amy raha mahazo olo.’
Atsika tsy karaha zen̈y.
Atsika man̈ano karaha nataony Jesosy, ke mifen̈y atsika man̈ampy olo baka tsy ho kivy
ndreky mampianatra iro momba Fanjakan̈any Zan̈ahary,
fotony izio zaraiky fo hahavita han̈adoso raha tsy rariny.
Tsy han̈ova fitondrasan̈a zen̈y tanjon̈ontsika,
fotony haintsika fa tsy hahavita han̈afoan̈a raha tsy rariny fanjakan̈anolombelon̈o.
Mampiasa Baiboly atsika, fotony izio man̈ampy olo han̈ova toetrindro ndreky fomba fiain̈anandro.
Hitantsika ten̈a mety raha zen̈y,
fotony fototro problemonolombelon̈o baka tsy baka amy politiky fa baka amy toetrinolo.
Nan̈ino ma atsika mivolan̈a fa Vavolombelon̈o Jehovah tsy manohitry fitondrasan̈a zen̈y foeky?
Atsika ten̈a man̈araka lalàn̈a ndreky man̈efa latety.
Baka io izikoa efa misy asa mila atao, na amy fiarahamonin̈y,
na irahin̈y man̈ano fanompoan̈a sivily atsika, atsika mandray anjara amy zen̈y.
Marin̈y ndraiky fa atsika tsy milan̈y na aminjovy na aminjovy lera misy fifidianan̈a.
Kanefa atsika koa tsy mikorontan̈a fifidianan̈a ndreky tsy misakana olo hifidy.
Atsika tsy mandresy lahatra pitondra fanjakan̈a, baka iro han̈araka hevitry sasany.
Tsy man̈ano propagandy koa atsika sady tsy milatsaka kandidà
na man̈ano lagrevy baka han̈ovoan̈a pitondra fanjakan̈a.
Tsy manangantsain̈y atsika,
kanefa atsika tsy man̈oro drapo ndreky tsy mandrora amizio.
Baka io izikoa fa misy firenena na olo mafana fô mare loatra man̈indrahindra izio,
atsika tsy hankalefaka iro na tsy han̈aja iro.
Tsy man̈ano hirampirenena koa atsika, kanefa tsy hisakana olo tsy hihira izio.
Atsika fo ny tsy man̈ano.
Atsika tsy mandray anjara foeky izikoa fa misy lagera, ke hamono olo.
Ndray zen̈y, atsika tsy kafiry aminolo tanindrazan̈a araiky amintsika.
Koa fintin̈iny, tsy manohan̈a na mankaratsy fitondrasan̈a foeky atsika, nata an̈aty fôntsika an̈y.
Zen̈y dikany tsy milan̈y na aminjovy na aminjovy zen̈y.
Karakory fo basy izikoa iro manampahifan̈a aby io mitaky raha mifanohitry amy didiny Jesosy?
Ty misy toro lalan̈a Baiboly man̈ampy atsika amy zen̈y.
Azonaro onon̈o raha koran̈iny Asan’ny Apostoly 5:28, 29?
“Zan̈ahary fo tsy maintsy arehanay volan̈a, fa tsy olo fotony izy pitondra zahay.”
Zen̈y tsy mivolan̈a fa atsika tsy man̈aja fanjakan̈a, fa zen̈y fan̈ajan̈a mare Zan̈ahary.
Izikoa misy raha mifanohitry amy lalàn̈any Zan̈ahary ampan̈anovindro manampahifan̈a aby io atsika,
atsika tsy man̈eky, fotony tsy tiany Zan̈ahary han̈ano zen̈y atsika.
Mety hisy olo hieritreritry:
‘Tsy ndraiky hampameloko manampahifan̈a aby io zaho koa man̈ano zen̈y?’
Jesosy efa nampioman̈a atsika amy Matio 24:9 karaha ty:
Nazavainy tsarabe aminy Apokalypsy 2:10 koa fa tsy maintsy gadrain̈y sasany amy pianatranany.
Tsy jiaby hoizy e, sasany fo.
Ke tsy tokony hampakivy atsika raha zen̈y, na migadra atsika na tsy migadra.
Andrivony rahalahy ndreky ranabavintsika aby io voasazy higadra,
fotony tsy milan̈y na aminjovy na aminjovy.
Mivavaka nindro koa atsika.
Haintsika fa Jehovah ravoravo manan̈a iro.
Karaha zen̈y koa atsika.
Miaritry iro koa tojy fitsapan̈a, ke atsika jiaby mandresy miaraka amindro.
Nan̈ino ma atsika mivolan̈a zen̈y?
Karaha ty nivolan̈iny Paoly tamy fiangonan̈a ta Efesosy:
Nigadra ta Roma Paoly taminizy nanoratra volan̈a aby io.
Nan̈ino ma fahorian̈a nahazo Paoly volan̈iny fa voninahitrindro Efesianin̈y aby io?
Fiaretany Paoly io nahitandro fa raha ten̈a maventy ankitin̈y Kristianin̈y zen̈y.
Nan̈ano karakory eky Paoly koa tsy niaritry?
Dikanizen̈y tsisy dikany finoan̈andro,
fanompoan̈andro ndreky fan̈antinandro Fanjakan̈any Zan̈ahary.
Paoly niaritry, ke zen̈y nan̈aboaka fa raha maventy ankitin̈y Kristianin̈y zen̈y.
Man̈ambara koa zen̈y fa ten̈a raha maventy tsy mivadiky zen̈y,
ndray ino ndray ino raha miboaka.
Karaha zen̈y koa amy zioty.
Miaritry iro rahalahy ndreky ranabavintska amy prizon an̈y,
fotony iro matoky fa ten̈a misy Fanjakan̈any Zan̈ahary.
Matoky koa iro fa han̈ano raha tsara Fanjakan̈a io aminy amaray an̈y.
Ravoravo iro manohan̈a Fanjakan̈any Zan̈ahary andan̈itry an̈y io fa tsy fanjakan̈anolombelon̈o,
fotony izio zaraiky fo hahavita han̈adoso ady ndreky hampiadan̈a olo tsisy farany.

David Schafer: Karakory ma Tsy An̈isany Donia ty Zen̈y? Ino aby Tafiditry amy Zen̈y? Nan̈ino Atsika Karaha Zen̈y?