JW subtitle extractor

Ita-nia tema ba fulan neʼe mak “Kristaun neʼebé neutrál,
neʼe katak sá, oinsá, no tanbasá tenke neutrál”.
Tuir Ita-nia hanoin, ita tenke neutrál ka lae?
Ema bele hapara buat neʼebé la justisa iha mundu neʼe ka lae?
Kuandu ema koʼalia kona-ba polítika, karik ita hanoin,
‘neʼe hanoin neʼebé la iha ligasaun ho ita-nia moris.’
Maibé neʼe bele kona Ita-nia moris,
kuandu ema neʼebé ita hadomi hasoru buat neʼebé la justisa.
Ita la hakfodak atu haree buat polítiku nian haketak ema.
Apokalipse kapítulu 8-13 hatete katak,
iha loron ikus sira, ema sei fó sai makaʼas sira-nia opiniaun kona-ba governu
no ema sei sente iha obrigasaun atu apoia sira-nia governu.
Tan neʼe, husu ba Ita-nia an:
‘Kuandu ema debate kona-ba governu, haʼu presiza halo saida?’
Nuʼudar ema Kristaun, ita tenke banati-tuir Kristu nia hanoin kona-ba polítika.
Kuandu Jesus iha rai, tuir loloos nia bele halo buat barak
atu halakon buat neʼebé la justisa.
Nia hanoin tebes povu sira.
Nia iha kbiit hodi fó-han ba ema neʼebé hamlaha, kura moras, fó moris hiʼas,
no koʼalia liafuan neʼebé kona tebes ema nia laran.
Jesus nia kbiit sira-neʼe bele halo nia sai ulun-naʼin polítika neʼebé forsa.
Satanás kontente tebes atu fó “nasaun hotu iha mundu tomak” ba Jesus,
naran katak Jesus adora nia dala ida deʼit.
Maibé Jesus la simu.
Maski Jesus mós la nega katak Satanás iha duni podér kona-ba buat sira-neʼe.
Liutiha tempu balu, ema Judeu husu Jesus atu sai sira-nia liurai.
Jesus mós la simu.
Liutiha tempu balu tan ema ida husu ba Jesus kona-ba loos ka la loos
atu selu impostu ba governu Roma.
Dala ida tan Jesus mantein neutrál.
Jesus lakohi atu sai mundu nia ulun-naʼin.
Nia lakohi sai lideransa ba nasaun ruma, ka mete buat polítika nian.
Ida-neʼe hatudu katak Jesus la interese no la iha hanoin buat ida ka lae?
Lae, Jesus hanoin tebes ema.
Nia trata ema hotu hanesan deʼit, no liuhusi dalan neʼe mak
Jesus hatudu sai katak neʼe mak justisa neʼebé loos.
Maski nuneʼe, Jesus hatene katak buat importante liu hotu mak
atu ajuda ema hodi hanorin sira kona-ba Maromak nia Ukun.
Só Ukun neʼe deʼit mak bele halakon buat neʼebé la justisa ba nafatin.
Se nuneʼe, ita tenke hanoin oinsá kona-ba ema nia governu?
Ita bele aprende husi Jesus nia resposta kona-ba selu impostu
ba governu Roma neʼebé hakerek iha Marcos 12:15-17.
Saida mak buat neʼebé César nian?
Apóstolu Paulo temi iha Roma 13:1-7 katak,
buat sira-neʼe mak selu taxa, impostu, hamtaʼuk, no hatudu respeitu.
Iha Eskritura Jesus hatete katak, “Fó ba César buat neʼebé César nian”.
César, naʼi-ulun neʼebé pozisaun aas liu hotu iha Roma,
nia mak arranja estadu atu halo buat oioin neʼebé iha folin, hanesan osan besi.
Tan neʼe, César iha direitu atu husu fali osan besi sira-neʼe.
Hodi nuneʼe mak estadu bele uza fali osan besi sira-neʼe
atu selu ka halo serbisu oioin.
Jesus nunka nega kona-ba neʼe.
Maibé buat folin boot liu hotu neʼebé ita iha mai husi Maromak,
hanesan ita-nia fuan, moris, neon, no kbiit.
Ita labele fó buat sira-neʼe ba César ka governu
tanba buat sira-neʼe la mai husi César.
Ita fó deʼit ba Maromak liuhusi ita-nia dedikasaun no domin.
Kona-ba ita-nia domin ba Maromak,
Jesus hatete iha Marcos 12:30 hodi dehan:
Tan neʼe, domin neʼebé ita hatudu ba Maromak tenkesér tomak.
Isin tomak, abilidade tomak, forsa tomak, no sentimentu tomak.
Ema neʼebé hadomi Maromak sei apoia Jesus,
ida-neʼebé Jeová hili atu sai Liurai.
Maibé oinsá mak Jesus nia dixípulu bele defende an
kuandu ema kontra Jesus nia Ukun?
Ita bele hetan resposta husi akontesimentu iha kalan ikus
ba Jesus nia moris iha rai.
Iha Mateus kapítulu 26 hatete katak,
bainhira “ema-lubun neʼebé lori surik no ai-dona” mai atu kaer Jesus,
Pedro “losu ninia surik hodi ataka amlulik boot nia atan no sabir tiha ninia tilun”.
Iha livru João hatete katak atan neʼe nia naran mak Malko.
Livru Lucas dehan katak Jesus kaer atan neʼe nia tilun no kura fali nia.
Ita admira tebes tanba Jesus la rai odi ba ema neʼebé mai atu kaer nia.
No mós, tuir Mateus 26:52, Jesus hatete ba Pedro:
Tanbasá mak Jesus la simu Pedro nia hahalok brani neʼe?
Razaun mak tanba Jesus nunka hakarak envolve an iha polítiku.
Jesus fó sai ida-neʼe ho klaru bainhira nia koʼalia ba Pónsio Pilatos.
Iha João 18:36, Jesus dehan:
Tanba Jesus nia Ukun laʼós husi ema nia governu,
tan neʼe la presiza uza ema atu proteje Ukun neʼe.
Tanbasá mak ita koʼalia nuneʼe?
Haree didiʼak fali ba João 18:36 parte ikus:
Entaun nuʼudar ema Kristaun,
ita tenke hatudu hahalok saida kona-ba buat polítiku nian?
Ita neutrál!
Dala ruma ema hanoin sala kona-ba tanbasá ita neutrál.
Ema balu hanoin sala katak, sé ita la apoia governu ida,
neʼe katak ita apoia daudaun ema seluk nia governu.
Husi tinan 1950 nia laran, governu Repúblika Kongu duun katak
Testemuña ba Jeová mak ema komunista.
Maibé husi tinan 1970 nia laran, governu Kongu forma fali governu komunista, no governu neʼe sai hirus tanba ita lakohi sai komunista.
Maibé ohin loron, besik tinan 30 ona,
governu Repúblika Kongu fó estatutu legál ba Testemuña ba Jeová.
Ema balu hanoin katak, ita neutrál
tanba ita la iha interese ba buat neʼebé akontese daudaun.
Ema seluk tan hanoin katak ita hakarak kontra governu.
Mai ita koʼalia kona-ba ema nia hanoin sira-neʼe.
Primeiru, neutrál la hanesan ho la interese.
La interese mak hahalok neʼebé ‘la hanoin ema seluk’.
Ita iha interese no hanoin tebes ema seluk nia sentimentu.
Hanesan Jesus, ita hakaʼas an atu halo kmaan
no hatudu dalan ba ema liuhusi hanorin sira
kona-ba Maromak nia Ukun neʼebé mak bele halakon buat la justisa hotu.
Duké koko atu troka organizasaun polítika sira, ita uza Bíblia atu hanorin ema troka sira-nia hahalok no moris.
Tanba hun ba ema nia problema laʼós husi governu,
maibé husi dalan neʼebé sira halaʼo sira-nia moris.
Tanbasá mak ita bele dehan katak,
Testemuña ba Jeová la sai ameasa ba governu, maibé ajuda sira?
Tanba ita halo tuir didiʼak lei sira.
Ita apoiu komunidade liuhusi serbisu voluntáriu
ka halo serbisu obrigatóriu civíl iha rai balu.
Ita mós selu taxa.
Maski ita la tuir vota ba partidu ka ba kandidatu ruma,
maibé ita mós nunka hamosu problema iha tempu votasaun
ka hanetik ema seluk atu vota.
Maski ita la halo kampaña atu tuur iha estadu,
maibé ita mós la kritika sira neʼebé kaer podér,
la protesta sira-nia ideia, ka halo demonstrasaun atu kontra ideia polítika ruma.
Maski ita la halo kontinénsia ba bandeira, maibé ita mós la sunu, la tafui,
ka la koʼalia hatún nasaun neʼebé uza bandeira neʼe,
maski iha rai balu lei la bandu ema atu halo buat sira-neʼe.
Maski ita la kanta inu nasionál, maibé ita mós nunka hanetik ema seluk
atu kanta ka protesta iha ema barak nia oin.
Maski ita la hola parte iha funu, maibé ita mós nunka halo violénsia iha rai laran.
Neʼe duni, maski ita la fó sai ideia polítika ruma,
maibé iha ita-nia laran mós ita la koʼalia aat ideia polítika ruma.
Neʼe mak signifika husi liafuan neutrál.
Ita nunka todan ba sorin.
Maibé oinsá se governu husu ita atu halo
buat neʼebé kontra Jesus nia mandamentu ruma?
Bíblia fó sai prinsípiu ida.
Karik Ita hanoin-hetan liafuan husi Apóstolu 5:28, 29 neʼebé dehan:
“Ami tenke halo tuir Maromak nuʼudar ukun-naʼin duké halo tuir ema.”
Neʼe la dehan katak ita la hatudu respeitu ba governu,
maibé tanba ita hatudu respeitu liu ba Maromak.
Se governu husu ita atu halo buat neʼebé Maromak bandu
ka hanetik ita atu halo tuir Maromak nia mandamentu,
ita bele fiar katak Maromak lakohi ita atu halo tuir governu nia hakarak neʼe.
Karik ema bele hatete, ‘Imi-nia hahalok neʼe
dala ruma bele halo governu sai hirus’.
Jesus fó-hatene nanis iha Mateus 24:9 dehan:
Iha Apokalipse 2:10, Jesus hatete katak
ema sei hatama ninia dixípulu balu ba komarka.
Laʼós ita hotu maibé balu deʼit.
Tan neʼe keta triste se ema la hatama ita ba komarka,
maibé se ema hatama duni Ita ba komarka, Ita mós sei la sai laran-tun.
Ita hanoin tebes ita-nia irmaun-irmán sira neʼebé
tama komarka tinan barak ona, tan deʼit sira hakarak neutrál.
Ita sente orgullu ho sira.
Ita nafatin halo orasaun ba sira.
Ita hatene katak Jeová kontente ho sira-nia hahalok.
Sira-nia tahan iha susar sira-neʼe sai duni vitória ba ita hotu.
Oinsá ita hatene?
Iha karta ba kongregasaun Éfeso, Paulo dehan:
Paulo hakerek liafuan sira-neʼe kuandu nia sai dadur iha Roma.
Paulo nia susar “lori glória” ba ema Kristaun iha Éfeso.
Tanba maski hetan susar maibé Paulo nafatin halaʼo ninia knaar
hodi hatudu ba kongregasaun Éfeso katak,
priviléjiu neʼebé sira hetan nuʼudar ema Kristaun
mak buat neʼebé importante no folin boot tebes.
Sé Paulo mak rende an, karik neʼe sei hatudu katak sira-nia fiar, knaar,
no esperansa kona-ba Maromak nia Ukun la iha folin.
Paulo nia tahan ajuda duni sira.
Neʼe mós hatudu katak, tenke laran metin hodi halo sakrifísiu naran deʼit.
Ohin loron mós, ita-nia irmaun-irmán doben sira
neʼebé hatudu hahalok tahan iha komarka,
hatudu katak sira iha duni esperansa kona-ba Maromak nia Ukun,
sira fiar duni Ukun neʼe.
Sira orgullu hodi bele reprezenta, laʼós ema nia governu,
maibé Maromak nia governu iha lalehan.
Governu neʼebé sei lori moris rohan-laek ba sira
iha mundu neʼebé sei la iha tan funu.

David Schafer: Kristaun neʼebé neutrál—Neʼe katak sá, oinsá, no tanbasá mak tenke neutrál