JW subtitle extractor

Kúsi̱íní-iniyó tá xitoyó ña̱ ku̱a̱ʼání na̱ yiví
ndáka̱xinna ndasakáʼnuna Jehová.
Ta ku̱a̱ʼánína ndíʼvi ñuura semana tá semana,
mií Jehová kúú ta̱ kána ndiʼi na̱ yiví yóʼo.
Kúsi̱íní-iniyó xíʼin ña̱yóʼo,
soo ña̱ va̱ʼa natúʼunkayó xíʼin na̱ yiví xa̱ʼa̱ Ndióxi̱
ta saátu ña̱ taxiyó ña̱ xíniñúʼu na̱ ñuu Ndióxi̱
íyo na̱ xíniñúʼu tava Biblia,
tutu, ta saátu keʼéna video ña̱ va̱ʼa kotoyó.
Iin lugar liviní kúú Betel.
Kán ñúʼu ku̱a̱ʼání na̱ hermano na̱ inkáchi kítáʼan káchíñu
xíʼin na̱ ñani ta̱ Cristo
ña̱ va̱ʼa tavana á keʼéna tutu ña̱ xíniñúʼu na̱ ñuu Ndióxi̱,
ta saátu ña̱ chindeétáʼanna xíʼin ña̱ predicación.
Ndiʼi na̱ ñúʼu yóʼo Jehová ndásakáʼnuna
ta na̱ xa̱a̱ nda̱kuchi kúúna, ta inkáchi kítáʼan ndiʼina káchíñuna
táki̱ʼva íyo iin familia.
Na̱yóʼo xa̱a̱ xítona ña̱ xínu tu̱ʼun ña̱ va̱xi nu̱ú Salmo 133:1: “¡Kotondó!.
Kúsi̱íní-inindi̱ ña̱ ñúʼu ku̱a̱ʼání na̱ hermano Betel
chi nda̱ka̱xinna ña̱ kachíñukana nu̱ú Jehová
ta i̱xandúʼxana ña̱ va̱ʼa ni̱ni̱ʼína ña̱yóʼo.
¿Á xa̱a̱ ndákanixi̱níún ña̱ kachíñún Betel?
Tá ná taxiún miíún ña̱ kachíñún Betel
ndakuna iin yéʼé nu̱ún nu̱ú kivi keʼún ku̱a̱ʼání chiñu nu̱ú Jehová.
Ña̱ va̱ʼa kachíñuyó Betel
xíniñúʼu ka̱ʼnu̱-iniyó ta saátu ña̱ kandíxayó keʼéyó
nda̱a̱ ndáaka chiñu ná taxina ndaʼa̱yó.
Saá ke̱ʼé ta̱ profeta Isaías,
táki̱ʼva káchi Isaías 6:8:
Ni̱kusi̱íní-ini ta̱ Isaías tá ku̱nda̱a̱-inira
ña̱ ku̱a̱ʼáka chiñu kivi keʼéra nu̱ú Jehová
ni va̱ása níkunda̱a̱-inira ndáa chiñu kúúña.
Soo ta̱yóʼo ni kǒo xínira ndáaña keʼéra,
ta̱xira miíra ña̱ va̱ʼa keʼékara ku̱a̱ʼá chiñu chi mií Jehová ni̱ka̱ʼa̱n xíʼinra.
Ña̱yóʼo kúú ña̱ ndákanixi̱ní ndiʼi na̱ hermano
na̱ ñúʼu Betel na̱ íyo nu̱ú iníísaá ñuyǐví.
¿Nda̱chun ku̱a̱ʼání na̱ hermano kúni̱na kachíñuna Betel?
Xa̱ʼa̱ ña̱ kúʼvi̱ní-inina xínina Jehová.
Ña̱ kúʼvi̱-iniyó xíniyó Jehová kúú ña̱ chíndaʼá miíyó
ña̱ siʼnaka Reino Ndióxi̱ ndiʼi-iniyó xa̱ʼa̱
ta su̱víka ña̱ kúni̱ miíyó.
Táki̱ʼva káchi ña̱ libro “Proclamadores”
nu̱ú página 295,
“va̱ása kuumiína ku̱a̱ʼání ña̱ʼa xíʼin chiñu yóʼo.
Chi ña̱ kúni̱na kúú ña̱ ndasakáʼnuna Jehová
ta kusi̱í-inina xíʼin ña̱ʼa ña̱ táxina ndaʼa̱na”
tá kúú ña̱ xíxina,
veʼe nu̱ú koona ta saátu loʼo xu̱ʼún ña̱ va̱ʼa satána ña̱ʼa ña̱ xíniñúʼuna.
¿Ndáaña kúú sava ña̱ va̱ʼa ña̱ ndákiʼinna xa̱ʼa̱ chiñu ña̱ ndáyáʼviní yóʼo?
Xa̱a̱ ku̱a̱ʼání ña̱ va̱ʼa ku̱a̱ʼa̱n ndákiʼin na̱ táxi xíʼin mií ña̱ kachíñuna Betel.
Ña̱ va̱ʼaní kítáʼanndi̱ xíʼin ña̱ kúʼvi̱ní-inindi̱ xíni táʼanndi̱
kǒo ni iin ña̱ʼa kítáʼan xíʼinña.
Va̱ása íyoña táki̱ʼva íyo iin empresa ña̱ íyo ñuyǐví yóʼo.
Ndiʼi ki̱vi̱ xíʼin na̱ migoyó káchíñuyó.
Tá inkáchi ndákanixi̱ní ndiʼi na̱ yiví
inkáchi íyo ña̱ kúni̱na keʼéna
ta chíndeé xíʼin táʼanna.
Saá íyo Betel.
Kivi ka̱ʼa̱nna xíʼún ña̱ keʼún iin chiñu
ña̱ ni iin yichi̱ ta̱ʼán keʼún,
soo íyo ku̱a̱ʼání na̱ hermano na̱ ndíʼi-ini xa̱ʼún
ta na̱yóʼo chindeétáʼanna xíʼún ña̱ keʼún chiñu yóʼo.
Tá káʼvina texto diario
ta saátu “Tutu ña̱ Nátúʼun xíʼinyó”,
xíniso̱ʼoyó comentario ña̱ táxi na̱ hermano yóʼo
ta ña̱yóʼo chíndeétáʼan xíʼinyó ta chíka̱a̱níña ndee̱yó.
Kíʼún kuenta ña̱ kúʼvi̱ní-inina xínina Jehová,
ta tu̱ʼun ña̱ káʼa̱nna chíndeéña yóʼó ña̱ keʼún táʼan ña̱ kéʼé na̱kán.
Betel yóʼo kúúmiíún iin patron ta̱ va̱ʼaní nu̱ú ndiʼina, Jehová.
Ni iinna va̱ása chíndayáʼvi chiñu ña̱ kéʼún
táki̱ʼva chíndayáʼvi Jehová ña̱yóʼo.
Xa̱ʼa̱ ña̱yóʼo kúʼvi̱níka-iniún xíniúnra,
ta kúsi̱íní-iniún ña̱ káchíñún nu̱úra.
Tá ndákanixi̱níi̱
xa̱ʼa̱ ndiʼi chiñu ña̱ íyo Betel yóʼo,
ña̱ távana tutu ta chíndaʼánaña ku̱a̱ʼa̱nña inka ñuu,
video ña̱ xítoyó asamblea regional,
ta saátu ña̱ sándayáʼana tutu inka tu̱ʼun,
ndákanda̱ní-inii̱ xíʼin ndiʼi ña̱yóʼo.
Nda̱a̱ ndáaka chiñu ña̱ kéʼíi̱ yóʼo,
kéʼíi̱ña chi saá chíndeétáʼi̱n xíʼin na̱ ñani ta̱ Cristo,
ta ña̱yóʼo sákusi̱íníña-inii̱.
Tá saá, ¿ndáaña xíniñúʼu keʼún ña̱ va̱ʼa kachíñún Betel?
Tá loʼovíi̱,
na̱ yivái̱ chi̱ndeéna yi̱ʼi̱ ña̱ kotoi̱ ña̱
ndáyáʼviní ña̱ kítáʼi̱n xíʼin Jehová,
ña̱kán ku̱a̱ʼání tiempo xi̱natúʼunndi̱ xíʼin na̱ yiví
nda̱a̱ tá xi̱xa̱ʼa̱nndi̱ vacación.
Ña̱yóʼo chi̱ndeé ndi̱ʼi̱ ña̱ kundi̱ʼi̱ka-inindi̱
xa̱ʼa̱ ña̱ʼa ña̱ espiritual,
ta ña̱yóʼo chi̱ndeé yi̱ʼi̱ ña̱ kunda̱a̱-inii̱
ndáaña xikunii̱ keʼíi̱ xíʼin ña̱ tákui̱
tasaá va̱ása ndiʼika-inii̱ xa̱ʼa̱ inka ña̱ʼa.
Yi̱ʼi̱ kútóoníi̱ kaʼvii̱,
ta iin ki̱vi̱ yivái̱ ni̱nda̱ka̱tu̱ʼunra yi̱ʼi̱:
“¿Á kivi kixáʼún kaʼviún Biblia?
Ndiʼiyó xíniñúʼu keʼé ña̱yóʼo,
soo mií ña̱ nda̱a̱ ni iin yichi̱ kǒo
níkaʼvii̱ Génesis nda̱a̱ Revelación,
soo tá xa̱a̱ ndi̱ʼi̱ ka̱ʼvii̱ iníísaáña na̱sama ki̱ʼva ña̱ ndákanixi̱níi̱.
Tasaá ndu̱ndakúka ña̱ kándíxai̱ ña̱ kúúmiíyó ña̱ nda̱a̱.
Ta saátu ña̱yóʼo
chíndeéña yi̱ʼi̱ ña̱ kundi̱ʼi̱ka-inii̱ xa̱ʼa̱ ña̱ kítáʼi̱n xíʼin Jehová.
Siʼna ña̱yóʼo ke̱ʼíi̱ ña̱ va̱ʼa kuchiñu keʼíi̱ inka ña̱ʼa chí nu̱únínu.
Revista xi̱ndataxii̱ ndaʼa̱ na̱ hermano congregación nu̱ú xi̱ndikai̱.
Saátu xi̱ndikai̱ xíʼin sonido
ta saátu xíʼin ña̱ plataforma.
Chiñu yóʼo chi̱ndeéña yi̱ʼi̱ ña̱ va̱ʼaka kachíñui̱
ta saátu ña̱ ku̱a̱ʼáka chiñu keʼíi̱ nu̱ú Jehová.
Yi̱ʼi̱ xi̱kunii̱ ku̱ʼi̱n Betel,
ta na̱ anciano xi̱keena xíʼi̱n tá xi̱natúʼunndi̱ xíʼin na̱ yiví.
Ña̱kán tá nda̱kava-inii̱,
ta nda̱kanixi̱níi̱ ña̱ “va̱ása kivi keʼíi̱ña”
á “ku̱a̱ʼání chiñu kúúña”
iin ta̱ anciano ni̱na̱ʼa̱ iin texto ña̱ va̱xi nu̱ú Biblia nu̱úi̱
nu̱ú káʼa̱nña ña̱ mií Jehová ni̱ka̱ʼa̱n xíʼin ta̱ Josué ña̱ ndakú koo inira.
Nda̱ka̱nda̱ní-inii̱ xíʼin ña̱yóʼo,
ta taxituña ndee̱ ndaʼíi̱ ña̱ va̱ʼa ndakú koo inii̱
ta kuchiñui̱ keʼíi̱ ña̱ xi̱kunii̱: ña̱ kachíñui̱ Betel.
Tá ni̱xa̱ʼi̱n xi̱toi̱ Betel,
ki̱ʼi̱n kuenta ña̱ na̱ ñúʼu Betel na̱ yiví táʼa̱n miívayó kúúna,
ta ku̱a̱ʼání ña̱ʼa ña̱ va̱ʼa kúúmiína,
ta yi̱ʼi̱ xi̱kunii̱ koi̱ táki̱ʼva íyo na̱kán.
Tá kúú na̱kán va̱ʼaní-inina.
Ta yi̱ʼi̱ xi̱kunii̱ saá xai̱ koi̱,
ta ña̱yóʼo chi̱ndeéka yi̱ʼi̱ ña̱ va̱ʼa keʼíi̱ ña̱ xikunii̱.
Ña̱ va̱ʼa kachíñún Betel xíniñúʼu keʼún sava ña̱ʼa.
Xíniñúʼu kuʼvi̱ní-iniún kuniún Jehová xíʼin na̱ ñuura,
ta náʼún ña̱yóʼo tá kándíxaún ña̱ káʼa̱n Biblia.
Xíniñúʼu koto inkana ña̱ kúún iin na̱ yiví espiritual.
Xíniñúʼu ixato̱ʼún yichi̱ ña̱ chi̱ndúʼú Jehová
ta kundasíún kuniún ña̱ yaku̱a̱ xíʼin ña̱ kini.
Va̱ʼaní xíniñúʼu koo ña̱ ndákanixi̱níún nu̱ú Jehová,
saá va̱ʼaní kuni̱ún xíʼin miíún
ta saátu xíʼin na̱ ñuu Jehová.
Ki̱ʼva ña̱ ndíxiún xíʼin ki̱ʼva ña̱ ndásaviún miíún
xíniñúʼu vií kooña,
táki̱ʼva ndíxi iin na̱ ndásakáʼnu Ndióxi̱
ni ta ku̱a̱ʼún keʼún inka ña̱ʼa.
Betel kǒo kivi kundixiún ti̱ko̱to̱ ña̱ núnaní nu̱ú
á ña̱ ni̱ʼi̱ní á ña̱ náʼa̱ ki̱ʼva ña̱ ndíxi na̱ ñuyǐví yóʼo.
Na̱ chíka̱a̱ solicitud ña̱ ki̱ʼvina Betel
kǒo xíniñúʼu kaʼvi̱na
á kuniso̱ʼona á kotona ña̱ʼa ña̱ kini
ña̱ va̱ása xíniñúʼu koto iin na̱ ndásakáʼnu Ndióxi̱.
Ti̱xin ña̱yóʼo ndíka̱a̱ ña̱ kotona nu̱ú kée na̱ yiví chálá,
yaa ña̱ kininí káʼa̱n á nda̱a̱ ndáaka nu̱ú va̱xi ña̱ kini
ña̱ kítáʼan xíʼin na̱ ta̱chí ndi̱va̱ʼa á nu̱ú kánitáʼanna.
Na̱ chíka̱a̱ solicitud ña̱ ki̱ʼvina Betel
xíniñúʼu kúúmiína 19 a nda̱a̱ 35 ku̱i̱ya̱.
Sava yichi̱ va̱ʼa ki̱ʼvi iin na̱ xa̱a̱ ni̱ya̱ʼa 35 ku̱i̱ya̱
chi sana xínina sava chiñu
ña̱ kivi chindeétáʼan xíʼin Betel,
tá kúú na̱ xíni xa̱ʼa̱ ta̱tán, na̱ va̱ʼaní sándaya̱ʼa inka tu̱ʼun,
na̱ xíni̱ní keʼé veʼe, na̱ xíni̱ chiñu ña̱ plomeria
á na̱ ndasavií tubo nu̱ú ku̱a̱ʼa̱n ti̱kui̱í,
na̱ káchíñu xíʼin luz,
na̱ va̱ʼa káva carro tú náʼnuní á na̱ xíni chiñu ña̱ carpinteria,
káʼa̱nndi̱ xíʼin ndiʼi na̱ xíni̱ keʼé chiñu yóʼo
ña̱ sándakutúna solicitud.
Xa̱ʼa̱ ña̱ ndiʼi tiempo káchíñún Betel
va̱ása xíniñúʼu kuumiíún iin kue̱ʼe̱ ña̱ kivi kasi nu̱ún ña̱ káchíñún yóʼo,
ta saátu ña̱ kivi kachíñún ku̱a̱ʼáka hora.
Xíniñúʼu va̱ʼa kaʼviún,
taún ta ka̱ʼún tu̱ʼun ña̱ káʼa̱n na̱ territorio nu̱ú ndíka̱a̱ Betel,
ña̱yóʼo chindeéña yóʼó ña̱ va̱ʼa natúʼún xíʼin ndiʼi na̱ ñúʼu Betel,
ña̱ va̱ʼa kunda̱a̱-iniún tá ná sánáʼa̱na yóʼó ndáa ki̱ʼva keʼún iin ña̱ʼa
ta saátu ña̱ vií kachíñún.
Na̱ chíka̱a̱ solicitud
siʼna iin ku̱i̱ya̱ kúú ña̱ xíniñúʼu kuñuʼuna Betel,
tiempo kán kúú ña̱ sákuaʼana ndáaña keʼéna
ña̱ va̱ʼa ndakundeéna kachíñuna kán.
Va̱ása káʼa̱nndi̱ xíʼin na̱ hermano ña̱ ku̱ʼu̱nna káʼvi va̱ʼana
á ña̱ sákuaʼana iin ña̱ʼa tasaá kamaka ndi̱ʼvina kachíñuna Betel.
Iin ña̱ va̱ʼa keʼéndó tá kúma̱níka ki̱ʼvindó Betel
kúú ña̱ kuundó precursor regular.
Na̱ ta̱a na̱ kúa̱an kúú na̱ xíniñúʼuka Betel.
Soo káʼa̱nndi̱ xíʼin ndiʼi ndóʼó,
na̱ sándakutú requisito ña̱ va̱ʼa ki̱ʼvindó yóʼo,
nda̱a̱ ná hermana,
ña̱ kivi kuundó voluntario temporal.
Ña̱ kuundó voluntario temporal chindeéña ndóʼó
ña̱ kivi keʼéndó inka chiñu nu̱ú Jehová chí nu̱únínu.
Tá kúni̱ún kachíñún Betel,
¿ndáa solicitud kúú ña̱ xíniñúʼu ndukún nu̱ú iin na̱ ndíka̱a̱
ti̱xin comité ña̱ servicio congregación nu̱ú ndíka̱ún?
U̱vi̱ nu̱ú kúú solicitud íyo,
ña̱kán síʼna ka̱ʼún xíʼin Jehová
ta saátu vií va̱ʼa ndakanixi̱níún ndáaña keʼún.
Iin ña̱ kivi ndukún kúú
“Solicitud para el programa de voluntarios” (A-19)
ña̱yóʼo ku̱va̱ʼaña xa̱ʼa̱ na̱ kúni̱ kachíñu iin tiempo,
kivi kooña iin semana á nda̱a̱ ku̱a̱ʼání yo̱o̱.
Kivitu ndukún ña̱
“Solicitud de ingreso en la Orden Mundial de Siervos Especiales
de Tiempo Completo de los Testigos de Jehová” (A-8).
Solicitud yóʼo ku̱va̱ʼaña xa̱ʼa̱ na̱ kúni̱ kachíñu ku̱a̱ʼá tiempo,
kivi kooña iin ku̱i̱ya̱ á ku̱a̱ʼání tiempo.
Tá na̱ Comité ña̱ Sucursal ndákanixi̱nína ña̱ xíniñúʼuna yóʼó,
mií na̱kán ndaka̱xin ndáa mií kúu ña̱ va̱ʼaka kachíñún,
á Betel kachíñún á iin chiñu ña̱ construcción.
Tá ná ndataxiún solicitud
kivi kachíñukaún nu̱ú Jehová
ta saátu chindeétáʼankaún xíʼin na̱ ñuu Ndióxi̱.
Sava yichi̱ ni kúni̱nívayó kachíñuyó Betel
soo va̱ása kívi xa̱ʼa̱ tu̱ndóʼo ña̱ íyo nu̱úyó,
soo kiviva ka̱ʼa̱nyó xíʼin inkana ña̱ va̱ʼa kachíñuna.
Ndóʼó na̱ íyo se̱ʼe,
kotondó ndáaña ke̱ʼé na̱ xi̱ndasakáʼnu Ndióxi̱ tiempo xi̱naʼá,
tá kúú ña̱ ke̱ʼé ñá Ana xíʼin ta̱ Elqaná
chi kǒo nísasina nu̱ú ta̱ loʼo se̱ʼena ña̱ kachíñura nu̱ú Jehová ndiʼi tiempo.
Natúʼunndó xíʼin na̱ va̱lí se̱ʼendó
ndáa ki̱ʼva íyo Betel
ta ka̱ʼa̱nndó xíʼinna ña̱ si̱íní koona tá ná nda̱ka̱xinna kachíñuna yóʼo.
Tá kivi,
ku̱ʼu̱nndó xíʼinna ná kotona sede mundial
ña̱ ndíka̱a̱ chí ñuu Nueva yok (Estados Unidos),
á Betel ña̱ ndíka̱a̱ yatin ñuu nu̱ú ndóondó,
saá kúú ña̱ koto na̱ va̱lí se̱ʼendó
ndáa ña̱ʼa kúú ña̱ kéʼé na̱ ñúʼu Betel
ña̱ va̱ʼa chindeétáʼanna xíʼin na̱ ñuu Ndióxi̱.
Kúni̱ndi̱ ña̱ na̱ kúú anciano
ná chindeétáʼanna xíʼin na̱ va̱lí ña̱ va̱ʼa sándakutuna requisito
ta saá kivi kachíñuna Betel.
Jehová káʼa̱nra xíʼin ndiʼiyó
ña̱ kivi ku̱a̱ʼáka kachíñuyó nu̱úra.
Táki̱ʼva ke̱ʼéra xíʼin ta̱ Isaías,
vitin Jehová ndákatu̱ʼu̱nra: “Ndáana chindaʼíi̱ ku̱ʼu̱n?
Ta, ¿ndáana ku̱ʼu̱n nu̱úyó?
Tasaá kivi ndakuiún
táki̱ʼva nda̱kuiin ta̱ Isaías ta kachiún:
“Yóʼo íyo yi̱ʼi̱, yi̱ʼi̱ chindaʼún ku̱ʼu̱n”.
Chika̱a̱ ndee̱ ña̱ xa̱ún koún iin na̱ yiví espiritual
ta ndakundeún ndasakáʼnún Jehová,
tasaá tá ná ya̱ʼa tiempo
sana kivi kachíñún Betel
á kivi keʼún inkaka chiñu nu̱ú Jehová,
kán kuniñúʼún ndiʼi ndee̱ ña̱ kúúmiíún
ña̱ va̱ʼa ndasakáʼnún Jehová.
Kúnda̱a̱-inindi̱ ña̱ ndakundeéndó kachíñundó
ña̱ va̱ʼa ni̱ʼíndó ña̱yóʼo,
ta kǒo nandósó-inindó ña̱ kúʼvi̱ní-inindi̱ xínindi̱ ndóʼó.

¿Ndáaña xíniñúʼu keʼún ña̱ va̱ʼa kachíñún Betel?