JW subtitle extractor

Mahay mandeha aosinala mpananiky vohitsy toa
ka tsy misy olo mahavita miharìny azy.
Ino ty mahavy ani-zay?
Mivaky roe ty hotrony sady afaky mivelatsy biby.
Zay ro ahafahani-aosinala io lomay, mitsamboko,
noho mihina mbamy pilasy tsy saky andehana.
Vitany ty mandeha mbamy kintsỳ rey mbeo.
Nanohatsy namboatsy kiraro
manahaky ani-zay avao mpikaroky reo,
fe tsy nahavita.
Afaky lomay zisiky amy
50 km sandera ty sôvaly.
Tsy vitani-zay fa mbo mahay mitsitsy hery koa ie.
Tombony rey mahavita raha io.
Sahala amy resôro io
ty hozatsy amy tomboni-sôvaly.
Arakarakaraky ty fidoforany marè amy tany eo
ro ahazoany hery hitsambokona ndraiky
lafa miala bakeo.
Tsy maharè maharary koa ie ndre midofotsy marè.
Nanohatsy nangalaky an-tahaky
ani-zay enjeniera reo fe nirohaky.
Lafa mitily ty voromahery,
le mitsinga mana anabo
ty farany antsisiny amy elany.
Mihena halavani-elany iny
fe mbo afaky mitily soa ie.
Nandiniky voro manahaky ani-rey manam-pahaiza reo
satria ta hamboatsy rapolany soa marè.
Farany nataon-drozy manahaky voromahery io
elani-rapolany rey,
ka nihasoa ty rapolany namboarin-drozy.
Afaky mitily lavitsy marè amy zay rapolany rey
sady afaky manday enta maro fanampiny,
kanefa mitsitsy soliky.
Nihena 7 600 tapitrisa litra
ty soliky nampiasàni-rapolany amy tany toy iaby,
laha vo nampiasà tanatini-folo tao
karazan-drapolany reo.
Mahavita raha ty elani-voromahery,
fe mbo lakolako ty masony.
Maharaky raha masony iny,
sady hainy ovaovà malakilaky ty fahitàny,
ka mazava soa avao ze raha henteany.
Hitany soa avao ty raha hosamboriny,
manomboky baka lavitsy eny zisiky hahazoany azy.
Misy fitifira sary mahavita ani-zay va?
Miresaky mikasiky ty hipopotamo koa
ty bokini-Joba.
Mety hahasaky 4 zisiky amy 5 metatsy
ty halavani-hipopotamy bevata,
le 3 tony noho 600 kilo ty lanjany.
Matanjaky biby ty taolany,
sandraky ty hazon-dambosiny.
Afaky mandeha anaty rano be vatovato any ie,
satria miaro azy ty taolan-tratrany
sady matevy biby ty angoziny.
Tsy taolani-hipopotamo reo avao ro mahatseriky.
Soa avao fa nisy taola ty ankamaroani-rahamananay.
Mivola ty mpikaroky fa manahaky beton io ty taola.
Vy amy beton reo ro mahavy azy hatanjaky biby.
Siman afangaro fasy noho vato iny
ro mahavy azy tsy ho mora potiky.
Fe mbo matanjaky marè
mandilatsy ty beton farani-ze soa ty taola.
Mbo misy raha hafa mampiavaky taola io koa.
Mandramby hormony mampitombo
noho mampivelatsy azy ty taola,
sady afaky mihavao avao.
Manahaky hozatsy io avao koa ie,
ka vomaiky mihamatanjaky lafa ampiasà.
Tsy ty biby manehitsy fa ty voay.
Hehitsini-liona io mimpoly in-telo
vo mitovy amy ty voay sisany.
Mahatseriky koa fa mahatsapa raha ty valanoràny,
ka ndre rambotanantsika reo mbo engàny.
Misy nera an’arivony amy valanoràny eo,
miboaky amy lavadavaky amy karan-dohany ao.
Zay koa ro mahavy ty voay vaviny
ho afaky manday anany rey amy vavany eo
fe tsy mandratsy azy.
Hita amy ty raha natao-Ndranahary vatany
“ty toetsiny tsy hita maso.”
Mbo maro biby ty raha azontsika ianara
baka amy biby niresahini-Joba rey.
Ao zao ty aombinala,
ty vanobe,
noho ty ôtirisy.
Manino laha mianatsy mikasiky ani-raha rey
amy fotoam-pivavahani-fianakavianareo,
soa ho hainareo ty toetsini-Jehovah hafa?

Mampianatsy Antsika Tsy Hivaliky ty Bokini-Joba: Biby