JW subtitle extractor

Staba inda sukuru di palmanhan,
kantu nha maridu i nha fidju-fémia
panha ses bisikléta i es bai faze ses studu di Bíblia.
Na kel dia di tardi, la pa uns 5 óra,
N staba ta spera-s volta.
Má, N resebe notísia ma nha maridu móre na un asidenti.
Na kel noti N kreba pa algen konsola-m,
má pamodi staba mau ténpu,
N ka konsigi fla irmons sobri kel asidenti.
Na kel noti, mi ku nhas dôs fidju-fémia,
nu lé publikasons di nos organizason
pa nu pode atxaba forsa i konsolu.
Sen nu sta ta speraba, na meiu di kel mau ténpu,
dôs irmon i un irman ben vizita-nu na nos kaza.
Es anda duránti 2 óra na móta na meiu di txuba fórti.
La pa meia-noti, más 7 irmon ku irmans di nos grupu
ben ta anda apé pa nos kaza.
Pa txiga na nos kaza,
es pasa 1 óra i meia ta anda sen sapatu
na meiu di txuba ku lama, déntu sukuru.
Nos família resebe txeu forsa di nos irmons ku irmans na kel noti.
Gentis di nos zóna ten txeu ideia mariadu sobri mórti,
pur isu N staba preokupadu si mórti di nha maridu
podia poba pesoas di nos zóna ta pâpia mal di Jeová.
Nton, N ora pa Jeová sobri kel asuntu li.
Na kel otu dia,
txeu di nos irmons ku irmans di otus kongregason ben vizita-nu.
Envês di gentis di nha zóna pâpia mal di Jeová,
amor ki irmons mostra-nu, traze glória i lovor pa se nómi.
Pamodi amor i apoiu ki irmons ku irmans da-nu,
gósi nha fidju-fémia más grandi sta ta trabadja na betel,
i nha fidju-fémia más pikinoti
sta kontenti ta sirbi Jeová djuntu ku mi.
Na novu mundu, N ta gostaba di konta nha maridu
sobri kel amor ki irmons ku irmans mostra pa nos família.
I modi ki, ku ajuda di irmons,
N faze nha midjór pa N djuda nos fidjus-fémia
kontinua ta ten un amizadi fórti ku Jeová.
Un ansion fla-m:
“Nu ta gostaba txeu di djuda nhos ku kel ki nhos meste.”
Nbóra N perde nha maridu,
kel tipu di bondadi li djuda-m vense nha dizusperu,
i nha speransa fika más fórti.
Amor di nos irmons ku irmans
djuda nha família aguenta kel tristéza li.

Mostra kel amor ki ka ta kaba pa kes ki ta sirbi Jeová — Pa viúvas i kes ki ka ten pai