JW subtitle extractor

Li ta Birminghame
liʼ naki li pʼijil vinik xchiʼuk
jnitvanej ta relijion
ti Joseph Priestley sbie.
Li ta 1789, la xchiʼin
jtsop krixchanoetik
sventa xachʼubtasik
li Vivlia ta inglese.
Li chib sien jabil echʼem tale
laj yichʼ nopel ti muʼyuk sbalil
xchiʼuk ti chʼay li yabtele,
¿kʼu yuʼun ti muʼyuk laj yichʼ pukele?
Xchiʼuk ¿kʼu yuʼun toj tsots skʼoplal?
La jchiʼinkutik la loʼil li buchʼu
xchanojbeik lek skʼoplal
sventa xalbunkutik li
kʼusi la spas Priestleye.
Li Priestleye jaʼ mas laj yichʼ
ojtikinel ta skoj ti la xchanbe skʼoplal
kʼu yelan ch-abtej li luse
xchiʼuk li ikʼ chkichʼtike.
Li Joseph Priestleye jaʼ jun
vinik ti toj echʼ noʼox pʼije
xchiʼuk laj yichʼ ojtikinel
kʼuchaʼal jun sientifiko,
pe li stuke maʼuk jech
ox tskʼan ojtikinel.
Oy ox ta yoʼonton ti chichʼuk
ojtikinel kʼuchaʼal jun jnitvanej ta relijion
o li buchʼu chchanbe skʼoplal li Diose.
Li stuke toj anil chchan yan kʼopetik
yuʼun toj lek chkom ta sjol kʼusitik.
Jech xtok, jaʼ jun vinik
ti toj baxbol ta abtele.
Kʼalal chex toʼoxe la
xchan li ebreo kʼope,
tetik van kʼalal 15
toʼox sjabilale,
ta mas tsʼakale lik xchan
griego xchiʼuk li latine.
Jech xtok, ti bu kʼalal stakʼ laj yile
la xchan li kʼopetik tstunesik
ta Oriente Medioe.
Ti la xchan li kʼopetik taje
toj echʼ noʼox koltae
kʼalal lik skʼelbe skʼoplal
li tekstoetik ta Vivliae,
yuʼun xuʼ la skoʼoltas li
kʼusi chal li teksto orijinal
xchiʼuk ti kʼu yelan jelubtasbil
li Vivlia King Jamese.
Kʼalal och ta abtel li Priestleye
oy yan epal tsʼibetik ti maʼuk
noʼox li ebreo xchiʼuk griegoe,
te laj yakʼ venta ti xuʼ
stunes yan tsʼibetik
ti muʼyuk la stunesik kʼalal
la sjelubtasik li King Jamese.
Akʼo mi kʼun ta aʼibel smelolal
li kʼopetik tstunes li King Jamese
ti melel xkaltike muʼyuk
lek laj yichʼ jelubtasel.
Oy kʼusitik ti jaʼ to laj yichʼ tikʼbel
ti muʼyuk bu jech ta orijinale.
Li Priestleye jelel tsnop
kʼuchaʼal li yantike,
yuʼun oy ta yoʼonton tskʼan
tsta li kʼusi melele
xchiʼuk oy jun chanubtasel ta
Vivlia ti tsots skʼoplal chile:
ti mu koʼoluk li Jesus xchiʼuk
li Dios ti skotol xuʼ yuʼune.
Li ta 1783 xi la stsʼiba komele:
«Li tsʼibetike chchanubtasvan
ti jaʼ noʼox jun Dios oye
xchiʼuk ti jaʼ noʼox jun
Jpasvanej kuʼuntike,
ti jaʼ noʼox stuk skʼan
xkichʼtik ta mukʼe
xchiʼuk jaʼ li buchʼu la stak
talel ta balumil Jesus
sventa xchanubtas li krixchanoetike.
Jaʼ laj yakʼbe sjuʼel sventa spas
skʼelobiltak juʼelal
xchiʼuk jaʼ la xchaʼkuxes
xchiʼuk jech-o yakʼojbe
sjuʼel li avi kʼakʼale».
Li Priestleye laj yil ti muʼyuk
jamal chal li King James
ti jelel li Dios xchiʼuk li Kristoe,
jaʼ yuʼun, li ta 1787
la skʼopon batel li yamigoe,
ti jaʼ jun jnitvanej ta relijion
ti Theophilus Lindsey sbie.
Li Lindseye jaʼ jun pastor
li ta iglesia ta Inglaterrae,
pe ta kʼunkʼun lik chibetajuk ta
sventa li kʼusi chakʼik ta chanele,
jech kʼuchaʼal li Trinidade,
yuʼun jech xa ox chaʼibe
smelolal kʼusi chal Vivlia
jech kʼuchaʼal li Priestleye.
Li Priestleye xi laj yalbe li Lindseye:
«Lek tajek chkaʼi ti koʼol
ta jtukʼibtastik li Vivliae,
yuʼun mu toj tsotsuk ta pasel
chkaʼitik li abtelal liʼe.
Xuʼ voʼot xabain sjelubtasel
li achʼ Testamentoe
xchiʼuk vuʼun ta jelubtas
li mol Testamentoe,
ta jnop noʼoxe xuʼ van stsuts
kuʼuntik ta oxib jabil».
Tsots tajek skʼan x-abtejik sventa
stsuts ta oxib jabil li abtelal liʼe,
yuʼun li King Jamese 47 ta
voʼ abtejik sventa spasik,
pe jalij vukub jabil.
Jaʼ yuʼun, li Priestley xchiʼuk Lindseye
la saʼ yan chaʼvoʼ xchiʼilik
sventa slikesik li abtelale.
Li kʼusi oy ta yoʼonton tspasike
jaʼ ti stukʼibtasik batel li tekstoetik
ti muʼyuk lek jelubtasbil
li ta King Jamese.
Jech xtok, oy kʼusi kʼot
ta nopel yuʼunik
ti skʼan jech spasik
kʼalal tsjelubtasike.
Li kʼusi kʼot ta kʼot
ta nopel yuʼunike
xuʼ jaʼ jelel-o tajek xkom yuʼunik
kʼuchaʼal li yan Vivliaetik ta inglese
o li yan Vivliaetik ta yan
kʼop ti oy li vaʼ orae.
Li kʼusi kʼot ta
nopel yuʼunike
jaʼ ti tsjelik ta Jeova
kʼalal chal Kajvaltik,
kʼalal jaʼo te chvinaj li sbi Dios
li ta ebreo kʼop ta mol Testamentoe
xchiʼuk li ta achʼ Testamentoe
ta stikʼik Jeova ti bu sta-o chilik
sventa xvinaj ti jelelik
li Dios xchiʼuk Kristoe.
Maʼuk noʼox stuk ti jech tsnopike,
yuʼun jech la sta ta alel
ek li Hopton Haynes
li ta livro ti jaʼ
la stsʼiba stuke
xchiʼuk ti oy xa ox
ta 40 jabil stsʼibaoj
kʼalal mu toʼox slikes
yabtel li Priestleye.
Yuʼun laj yal ti skʼan ox te
tsʼibabil xkom li biil Jeova
ti maʼuk noʼox Kajvaltik
xi li ta King Jamese.
Jech xtok li ta achʼ Testamentoe
ti lajuk onoʼox yichʼ tikʼel
komel li biil Jeovae
xuʼ xichʼ aʼibel smelolal
ti jelelik li Kajvaltik Dios
xchiʼuk li Kajvaltik Jesus
ti jaʼ li Jchanubtasvaneje.
Li Priestley xchiʼuk xchiʼiltake
jaʼ jech tsnopik ek.
Laj yakʼik venta ti chtun
yuʼunik mas koltaele,
jaʼ yuʼun la skʼanbeik koltael
li buchʼutik lek chanemike.
Pe mu skotolikuk la xchʼamik
yuʼun oy lek srasonal
ti jech la spasike.
Sjelubtasel jlikuk Vivlia li ta
siglo 18 li ta Inglaterrae
ep batel yichʼoj
xchiʼuk xibal sba tajek.
Ti sjelubtasik yan Vivlia
li vaʼ orae xibal sba tajek,
yuʼun oy xa ox jayib
viniketik ti jech la spasike,
pe muʼyuk tsuts yuʼunik.
Yuʼun li King Jamese
jaʼ stsakojik lek ta venta
li ta relijion ta Inglaterrae
xchiʼuk yalojik
ti jaʼ noʼox xuʼ stunesik sventa
xchanubtasvanik li ta relijion taje.
Jaʼ yuʼun, mi oy buchʼu chal
ti muʼyuk lek jelubtasbile
o mi oy buchʼu tsjelubtas
yan achʼ Vivliae
xkoʼolaj ti tskʼan tsjelbe li kʼusi
xchʼunoj li krixchanoetike
o ti tskontrain li relijion
ta Inglaterrae.
Kʼalal mu toʼox sta oxib u
ti la stsob sbaike,
junantik viniketik ti jaʼ jech
tsnopik kʼuchaʼal Priestleye
laj yalik ti oy ta yoʼonton
chkoltavanike.
Te tsakal skʼoplal li
Robert Edward Garnham.
Avie liʼ oyutik ta Cambridge,
li doktoretik Nicolas Bell
xchiʼuk Chris Reid
chalbutik skʼoplal li abtelal
la spas li Garnhame.
Li ta 1769 kʼalal 16 toʼox
sjabilal li Garnhame
tal chanunajuk li ta Trinity College.
Jun jabil ta tsʼakale
laj yichʼ akʼbel jun sbeka,
ta mas tsʼakale lik
chanubtasvanuk liʼ eke.
Jutuk mu skotoluk li yabtele
liʼ la spas li ta vivlioteka liʼe.
Akʼo mi oy toʼox kʼusitik muʼyuk
li ta vivlioteka kʼuchaʼal li avie,
li epal livroetike jaʼ
chalbe skʼoplal li Vivliae
xchiʼuk livroetik sventa teología .
Jaʼ yuʼun, xuʼ van ep tajek koltae
ti liʼ oy skotol li kʼusitik chtun yuʼun
sventa xchanbe
lek skʼoplal li Vivliae.
Li Priestley xchiʼuk li Lindseye
ep tajek sbalil laj yilik
ti koltaatik yuʼun li Garnhame,
maʼuk noʼox ti lek xaʼibe smelolale
yuʼun lek baxbol ta abtel xtok.
Li kʼusi toj lek la spas li Garnhame
jaʼ ti toj lek tsabe skʼoplal li Vivliae
xchiʼuk ti xaʼibe lek smelolale.
Toj labal sba tajek.
Li Garnhame lek baxbol ta abtel,
jaʼ yuʼun, kʼalal laj xa ox sjelubtas
ta yan kʼop li achʼ Testamentoe
jech-o abtej batel.
Li ta 25 yuʼun noviembre ta 1789,
li Priestleye xi la stsʼibabe
batel jlik karta li Lindseye:
«Toj ep tskoltautik
ta abtel li Garnhame».
Li Lindsey eke xi laj yalbe
batel yan xchiʼiltak ta abtele:
«Toj lek snaʼ x-abtej li Garnhame».
Kʼalal jutuk xa ox skʼan
stsuts li abtelal tspasik
li Priestley xchiʼuk xchiʼiltake
oy kʼusi kʼot ta pasel.
¿Kʼusi?
Li ta 1791
lik tsatsal kontrainel
li ta Birminghame,
ti muʼyuk bu jech ilbil-o
li ta Gran Bretañae.
Li Priestley xchiʼuk yan xchiʼiltake
jelel kʼusi tsnopik ta
sventa li politikae
xchiʼuk jamal yalojik ti muʼyuk lek kʼusi
chakʼik ta chanel li relijion ta Inglaterrae,
kap tajek sjolik li
jnitvanejetik ta relijione.
Chanib kʼakʼal jalij li kʼope
ep buchʼutik cham xchiʼuk
la xchikʼik naetik.
Li sna Priestleye la
xchikʼik ta j-echʼel.
Jutuk mu la smilik
xchiʼuk la xchʼaybeik
skotol li svuntake.
Yaʼeluke la xchikʼbeik skotol
li svuntake, li slivrotake
xchiʼuk li yabtel yakal
tspas ta sventa li Vivliae.
Ta skoj taje
li ta 1794 bat ta
Estados Unidos li Priestleye.
Laj yikta komel li slumale
xchiʼuk li yamigotake
tsots tajek kʼusi yakal tsnuptan.
Ta skoj ti chʼay skotol slivrotak
xchiʼuk ti stuk kome
muʼyuk xa la spas-o
li yabtel ta Vivliae
yuʼun la xkechan-o.
Pe ¿kʼusi kʼot ta pasel
xchiʼuk li yabtel Garnhame?
Sventa jnaʼtike
skʼan xijbat ta Londres.
Li Garnhame yichʼoj lek spʼijil,
muʼyuk la stsak batel sbi
li ta vunetik la slokʼese.
Jaʼ yuʼun, kʼalal laj yaʼi li kʼusi
kʼot ta stojolal li Priestleye
muʼyuk la spuk li
Vivlia la sjelubtase.
Kʼalal echʼ jayib jabile
li Garnhame jel li kʼusi
tsnop ta sventa li Vivliae
xchiʼuk chʼay xchʼunel
yoʼonton ta stojolal Dios,
cham ta 1802 kʼalal 49 yichʼoje.
Pe ¿Mi te van chʼay skʼoplal
li kʼusitik la stsʼiba
sventa Vivliae?
Oy mas ta chib sien jabil
laj yichʼ nopel ti te chʼaye,
pe li ta slikebaltik 2017
oy kʼusi labal sba laj yichʼ tael
li ta vivlioteka Dr. Williamʼs Library
li ta Londrese.
¿Kʼusi laj yichʼ tael?
Laj yichʼ tael jaypokuk vunetik,
ti jaʼik mu skotoluk
li achʼ Testamentoe.
Li jpoke mu toj
masuk lek tsʼibabil,
li yane lek kʼelbil,
li yan xtoke te chvinaj li
slikebtak sbie: R.E.G.,
Robert Edward Garnham.
Li buchʼutik la xchanbeik
skʼoplal li vunetik taje
laj yakʼik venta ti jaʼik li svunaltak
li abtelal sventa Vivlia
la slikes li Priestleye
xchiʼuk ti muʼyuk toʼox yichʼoj taele.
Li kʼusi laj yichʼ tael liʼe
muʼyuk mas jech jtaojkutik-o.
Labal sba, yuʼun li vunetik
taje lekik to laj yichʼ tael.
Li Vivlia la sjelubtas li Garnhame
kʼun ta aʼiel.
Yuʼun jaʼ la stunes li
kʼopetik ti mas ojtikinbile,
jech kʼuchaʼal liʼe, li ta Vivlia
King Jamese xi chale:
«Skotol li balumile oyik ta choplejal»,
pe li Garnhame xi la sjelubtase:
«Sjunul li balumile oyik ta yok
skʼob li buchʼu toj chopole».
Jech xtok, maʼuk xa
kʼatinbak laj yikta komel
kʼalal Hades xi ta griego kʼope,
«Mukinal» xa laj yikta.
Pe li kʼusi mas to labal sbae
jaʼ ti la stunesbe li sbi Jeovae.
Kʼalal xi toʼox
chal li King Jamese:
«Skʼan xakʼan ta sjunul
avoʼonton li kajvaltike»,
pe li Garnhame xi la sjelubtase:
«Skʼan xakʼan ta sjunul avoʼonton
li Jeova Dios avuʼune.
Akʼo mi junantik noʼox velta tstunesbeik
sbi Dios li ta yan Vivliaetike,
pe li Garnhame
jaʼ jech la spas kʼuchaʼal
xchapojik xchiʼuk li Priestleye,
yuʼun la stunes li biil Jeova
te van chibuk sien ta velta ti bu
sta-o li ta achʼ Testamentoe.
La jnopkutik toʼox ti chʼay
li Vivlia ti la sjelubtasike.
Pe kʼalal la jtakutik li kʼusi
sjelubtasoj li Garnhame
toj labal sba laj kaʼikutik
yuʼun muʼyuk jnopojkutik
ti chichʼ taele.
Li Vivlia laj yichʼ tael ta
vivliotekae toj lek,
yuʼun li buchʼutik la sjelubtasike
lek xchanojik li ebreo
xchiʼuk griegoe.
Skʼan snaʼ yan krixchanoetik
li kʼusi laj yichʼ taele
Toj labal sba li kʼusi
la spas Garnham
sventa sjelubtas li Vivliae.
Ti muʼyukuk
kʼusi kʼot ta pasel xchiʼuk ti lajuk
onoʼox yichʼ pukel kʼalal tsutse
toj labal sba li kʼusi
kʼot ta pasel jechuke.

Laj yich’ tael li k’usi ch’ayem to’oxe