JW subtitle extractor

Apre delij la,
Jewova te di
pawòl nou jwenn
nan Jenèz 8:21 yo:
“Tandans lòm gen
nan kè l
se fè sa k mal
depi l toupiti.”
Malerezman, nou tout
gen tandans
peche lakay nou,
e Satan ta renmen nou suiv
move tandans sa yo.
Pa egzanp, tèks pou
jounen an montre
Jòb te bezwen gen plis imilite.
Lè n ap li istwa Jòb,
n ap wè li gen lòt kalite
li te bezwen amelyore.
Lè Satan te atake l, li te vin
an kòlè e l te dekouraje.
Nou konprann sa!
Nenpòt nan nou t ap reyaji
menm jan an.
Men, konprann sa pa vle di
se yon bon bagay.
Paske reyaksyon sa yo,
tandans enpafè a,
te anpeche Jòb wè lòt rezon
petèt ki fè l te jwenn pwoblèm.
Sa te fè l blame Jewova,
epi kritike l.
Lè n tande fason
yo pale de Jòb la,
sa parèt vrèman negatif.
Jòb te bezwen plis imilite,
evite kòlè, dekourajman,
evite jistifye tèt li, evite
kritike epi blame Jewova.
Menm jan ak Jòb, siman nou
gen kèk kalite lakay nou,
nou bezwen amelyore.
Satan te swete move tandans
Jòb yo pot laviktwa sou li,
pou yo kraze entegrite l.
Èske se konsa Jewova
te wè Jòb?
Èske se konsa li wè nou tou?
Nou kapab di non.
Ann wè ki jan eprèv Jòb yo
te kòmanse
ak fason Jewova te wè l.
M ap envite nou chèche
Jòb chapit 1,
Jòb chapit 1 vèsè 8,
Jòb 1 vèsè 8.
Men sa k te pase nan syèl la:
Jewova te pèmèt Satan
antre devan l.
Ann suiv konvèsasyon an
nan vèsè 8 la:
“Epi, Jewova di Satan:
‘Èske w wè Jòb, sèvitè m nan?
Pa gen pèsonn tankou l sou tè a.
Li se yon moun ki dwat
e ki fidèl nan tout bagay.
Li gen lakrentif pou Bondye
e li vire do bay sa ki mal.’”
Waw, sa vrèman enteresan!
Kot diferans lan?
Ki sa nou ka aprann ki ka ede n
fè fas ak eprèv nou jwenn jodi a?
Men premye leson an:
Nou dwe gen relasyon
sere sere ak Jewova
e nou dwe gen bon relasyon
ak frè n ak sè n yo.
Pou kòmanse, ann pale de Jewova.
Sa klè, Satan te rayi Jòb.
Tout sa k te enterese l nan Jòb
se te kraze entegrite Jòb.
Jòb pa t gen okenn valè pou li.
Epoutan, Jòb ak Jewova
te gen yon relasyon sere sere.
Jòb pa t rive konprann
rezon ki fè l t ap soufri.
Men malgre sa, li te renmen
Jewova e li pa t vle pèdi entegrite l.
Jewova te konnen Jòb.
Jewova te wè fidelite Jòb
ak lanmou li pou fanmi l.
Li te sonje Jòb pa t konn adore
solèy la, lalin nan ak zatwal yo
menm jan ak anpil moun
nan epòk la.
Li te konn ede timoun
ki san papa yo, vèv yo,
e l te konn byen boule
ak sèvitè l yo.
Epitou, Jewova te konnen
Jòb pa t vle pèdi entegrite l.
Se sa k fè, malgre Jewova te wè
tandans peche Jòb gen lakay li,
li pa t ret konsantre
sou feblès Jòb yo.
Jewova te wè Jòb e l te chwazi
konsantre sou bèl kalite l yo.
Se menm bagay la Jewova
fè pou nou jodi a.
Poukisa?
Paske nou gen yon relasyon
pèsonèl avè l ki baze sou lanmou.
Se vre, pafwa, nou ka anvi pou
Jewova korije yon sitiyasyon
oswa di nou sa pou n fè byen vit.
Nou ka menm pa renmen
direksyon li bay yo.
Oubyen nou pa konnen poukisa
Jewova pèmèt yon sitiyasyon.
Men, piske nou konnen Jewova,
nou gen pasyans, nou konte sou li.
Nou konnen Jewova
ap jere sitiyasyon yo,
e l ap beni obeyisans nou
menm jan l te fè sa pou Jòb.
Epitou, nou bezwen gen bon
relasyon ak kwayan parèy nou yo
lè nou jwenn eprèv.
Pa egzanp, lespri sen Jewova
te bay Eliyou fòs pou l ede Jòb.
Eliyou te pi jèn e li pa t
gen anpil eksperyans,
men, Jòb te aksepte konsèy li,
li te bezwen èd la.
Yon referans fè konnen
Jòb te tèlman santi l soulaje,
li te menm “kriye”
lè Eliyou t ap ede l yon fason
ki fèm, men, avèk jantiyès.
Jodi a, frè ak sè n yo vle ede.
Men, men sa n dwe fè:
Nou dwe dispoze aksepte èd yo,
kit se èd espirityèl,
fizik, oswa emosyonèl.
Nou pa dwe rejte èd yo ban nou,
paske nou wè tandans
peche yo gen lakay yo,
oubyen, paske nou pa vle
vin yon chay pou yo.
Frè ak sè nou yo
gen sousi pou nou,
e relasyon nou gen
ak frè ak sè nou yo
pral vin pi enpòtan toujou
tank lafen an ap pwoche.
Pou n ka andire eprèv,
li enpòtan pou n gen
bon relasyon ni ak Jewova,
ni ak frè ak sè nou yo.
Men yon dezyèm leson:
Nou vle gen yon bon
pwennvi sou eprèv yo.
N ap sonje se pa t Jewova ki te
lakòz pwoblèm Jòb te genyen yo,
men l pa t anpeche yo nonplis.
Li te pèmèt Jòb soufri.
Men, nan yon objektif
ki pi enpòtan:
pou l pwouve entegrite l
e montre Satan se yon mantè.
Dezyèmman, eprèv la
te bay Jewova posiblite
pou l bay Jòb plis fòmasyon.
Se menm bagay la jodi a.
Satan vin pi mechan toujou.
Se vre, nou pap chèche
jwenn eprèv,
men, nou pa sezi lè yo vini
e nou pa met fen nan eprèv yo
yon fason ki kontrè ak Ekriti yo.
Poukisa?
Paske eprèv yo ban nou
posiblite pou n demontre
lanmou nou pou Jewova.
Imajine jan Jòb t ap santi l
si lè Satan te manke
Jewova dega a,
Jewova te di Satan: ‘Ou konnen,
Jòb bon, men li gen kèk pwen
li bezwen travay sou yo toujou.
Li poko pare.
Ann tann jiskaske Moyiz vini.’
Men, se pa sa k te rive.
Gade vèsè 8 la ankò.
N ap remake se pa Satan
ki te site non Jòb.
Se vre, li t ap panse ak sa.
Men, se Jewova ki te
site non Jòb
e ki te byen pale de Jòb
jan n te li sa nan vèsè a.
Pou Jòb, se te yon onè
pou l defann non Jewova.
Se menm bagay la pou nou.
Nou ta renmen pou Jewova
pale de nou jan l te pale de Jòb la.
Nou menm tou, lè nou andire
sa ban nou yon bèl opòtinite.
M ap envite nou ouvri Bib nou
nan 1 Pyè chapit 5.
Nou prale nan 1 Pyè 5:10.
Men sa li di:
“Men, apre nou fin soufri
pou yon ti tan
[anba eprèv, sa vle di
ap gen eprèv],
Bondye ki bay favè
san parèy tout jan an,
e ki rele nou nan glwa etènèl li a
ann inyon avèk Kris, [note sa]
ap fin fòme nou li menm,
[e kòm rezilta]
l ap fè nou vin fèm,
l ap fè nou vin djanm,
l ap mete nou sou yon
fondasyon ki solid.”
Se vre, se pa Jewova ki te
lakòz soufrans Jòb yo,
men l te sèvi avèk yo pou l
anseye l yon bagay,
e Jewova te ede Jòb wè
bagay yo menm jan avè l,
epi vin gen plis imilite.
E Jewova kapab ban nou menm
fòmasyon sa a tou jodi a.
Lè nou jwenn eprèv, nou bezwen
mande tèt nou:
Ki sa Jewova ap anseye m?
Èske m bezwen plis lafwa,
plis dousè, plis imilite?
Kèlkeswa kalite nou bezwen an,
kite Jewova anseye nou.
Sa pa gen lontan m t ap pale ak
yon sè ki te andire yon sitiyasyon
ki te difisil pandan yon
bon bout tan.
Pandan l t ap esplike sitiyasyon an,
li te fè yon bèl kòmantè.
Li di byenke li pa t janm atann
li t ap viv yon sitiyasyon konsa
e li pa swete l ap janm
viv sa ankò,
sa te ede l wè jan Jewova
vrèman gen sousi pou li.
Li di li te rive wè men Jewova
nan lavi l pèsonèlman
yon fason li pa t janm
wè sa anvan.
Sa te fòtifye lafwa l.
Donk, yon eprèv kapab
bay Jewova opòtinite
pou l fòme nou,
e pou l fè nou vin fèm.
N ap jwenn anpil anpil eprèv
anvan lafen an rive,
e Satan ta renmen nou echwe.
Men, antanke sèvitè Jewova,
n ap andire eprèv yo.
Pou n ka fè fas ak eprèv yo,
nou dwe sonje nou bezwen gen
yon relasyon solid ak Jewova,
e ak frè ak sè nou yo.
Pèsonn pa ka andire yo poukont li,
nou tout bezwen èd.
Dezyèmman, nou bezwen gen
yon bon pwennvi sou eprèv la.
Se yon onè pou n bay Jewova
yon repons pou l bay Satan
k ap pwovoke l,
e nou bay Jewova opòtinite
pou li fini fòmasyon nou.

Jody Jedele: Ann imite Jòb lè nou jwenn eprèv (Jòb 1:8)