JW subtitle extractor

Na ténpu ki nu sta ta vive
nu ta pasa pa txeu próva di fé
i tanbê nu ta pasa pa txeu prublémas na nos vida.
I tanbê ta parse ma ténpu sta pasa faxi dimás
ki nu ka ta konsigi faze kes kuza ki nu meste faze.
I nu pode fika preokupadu dimás ka simé?
I si nu ka toma kuidadu,
nu pode fika sen paxénxa.
Sen paxénxa pa spera dia di Jeová ben,
sen paxénxa pa spera mundu novu
i nu pode pensa:
‘Pamodi ki Jeová inda ka traze kel mundu novu?
Bon, pa nu intende pamodi ki kel manera di pensa li
i tanbê falta di paxénxa é prigozu,
nu abri nos Bíblia li na Provérbius kapitlu 14,
i nu lé versiklu 29.
Provérbius 14:29 ta fla:
“Ken ki ka ta xatia faxi ten txeu intendimentu,
má ken ki ka ten paxénxa ta mostra ma el é tolu.”
Na Bíblia nu ta atxa izénplu di pesoas
ki ka mostra paxénxa i ki tevi maus rezultadu.
Nu ten izénplu di Adon ku Eva.
Es faze kel ki es kreba sen djobe orientason di Jeová
i nu sabe kal ki foi rezultadu.
Pensa tanbê na rei Saul,
ki ka mostra paxénxa i el ka obi ku Jeová,
envês di spera pa Samuel pa djuda-l adora Jeová.
El dexa di ser rei pamodi kel-la.
Nu pensa na kes israelita
ki perde paxénxa ku Muizés i ku Jeová na dizértu
i es perde xansi di entra na
kel téra ki Deus prometeba es.
Nton nu ta odja ma si nu ka sforsa pa mostra paxénxa,
nos tanbê nu pode ten maus rezultadus.
Nton modi ki nu pode ivita kes sentimentu li?
Modi ki nu pode sforsa pa mostra paxénxa?
Bon, ten un prinsípiu ki pode djuda-nu.
Si inda bu tene bu Bíblia abértu na Provérbius,
favor, bai na kapitlu 16 i nu ta ben lé versiklu 20.
Li ta fla:
“Ken ki ta mostra intendimentu na
un asuntu ta ten bon rezultadu,
i ken ki ta kunfia na Jeová é filís.”
Nton nu ten ki para i pensa
na manera ki Jeová ta pensa.
Intende modi ki Jeová ta odja kuzas.
Kel-li é kel primeru kuza ki ta djuda-nu mostra
paxénxa prinsipalmenti pa spera dia di Jeová.
I 2 Pedru 3:12 ta inxina-nu un kuza
sobri manera di Jeová pensa sobri kel asuntu li.
Na 2 Pedru 3:12 la ta fla ma nu ‘sta spera
i nu sta ku xintidu na prezénsa di dia di Jeová.’
Nhos repara kal ki é pontu?
É dia di Jeová.
É ka nos dia.
Nu sabe kuzê ki dia di Jeová siginifika pa nos
i é pur isu ki nu tene txeu vontadi pa el txiga
i nu ta ben fika livri di pekadu ku mórti
i nu ta ben odja Jeová ta bira téra un paraízu
undi nu pode vive pa tudu ténpu.
I nu tene txeu vontadi pa kel-li kontise.
Kel-li ta ben kontise?
Sin, nu sabe ma el ta ben kontise
i nu ten próvas ki ta mostra kel-la.
Ki próvas?
Bon, kel-li é un kuza pa nu pensa,
un kuza pa nu midita na el.
1 Timótiu 1:17 é kel pontu prinsipal
pamodi la ta fla ma Jeová é “Rei di tudu ténpu.”
Nu ta lenbra ma Jeová sénpri dja izistiba,
mésmu antis di el kria Jizus,
i el ta ben kontinua ta izisti pa tudu ténpu.
Jeová é kel úniku algen ki pode disidi
kuzê ki el krê faze i ningen ka ta pode muda se vontadi.
Nada ka ta pode afeta vontadi di Jeová.
Má, el é “Rei di tudu ténpu” i el ta ben kunpri se vontadi.
Na verdadi, Atus 17:31 ta fla
ma Jeová dja marka un dia
ki el ta ben julga téra interu.
Nton Jeová dja ten un ténpu markadu
pa traze se dia, pa ben kunpri se vontadi.
Jeová ta faze tudu kuza na ténpu sértu
i nada ka pode muda kel-la.
É ka un data ki ta pode mudadu.
Kel data ki Jeová ta ben traze se dia
ka ta ben muda pamodi situason na mundu
ô pamodi prublémas na pulítika.
Kes kuza li ka ta influensia vontadi di Jeová
ô ki ténpu ki el ta traze se dia
pamodi el é “Rei di tudu ténpu.”
É el ki faze ténpu i el ta poi ténpu
ta bai na direson ki el krê,
ki é pa frenti i na kel velosidadi ki el krê.
El ta kontrola ténpu.
Má dja ki nos é inperfeitu
nu ten prubléma ku spera.
Nos tudu nu erda pekadu i mórti
i nu ten txeu otus prubléma pamodi kel-la.
Nton é normal nu fika ku txeu vontadi pa kel dia li ben
pamodi nu krê pa kes prubléma li kaba.
Nu sta kansadu pamodi kes
prubléma ki nu sta pasa pa el oji.
Má nu debe lenbra ma kes
prubléma li é pa poku ténpu.
Má di kuzê ki nu pode ten serteza?
Bon, Jeová ta responde-nu kel pergunta li.
Abakuki 2:3 ta fla ma dia di Jeová
“sta ta kóre faxi pa se fin.”
Sufunias 1:14 ta fla ma
“Dia di Jeová sta kuazi ta txiga!”
i ma “el sta ta ben uma faxi!”
I lenbra di kes palavra di Jizus na Apokalipse 22:20
undi ki el ta fla: “N ta ben faxi.”
Nhos repara, kes testu di Bíblia li
ta djuda-nu intende modi ki Jeová
ta odja ténpu i se dia ki nu tene vontadi pa ben.
Dia di Jeová sta kada bês más pértu,
i já-já el ta ben ser un rialidadi.
Nton si nu lenbra di kel-li ta ser más fásil pa nos
pensa di manera klaru, mante kalmu
i mostra paxénxa ku ténpu ki Jeová ta disidi faze kuzas.
Pa nu intende kel-li talvês nu pode pensa na kes austronauta
ki ta fika na spasu duránti txeu ténpu,
es ta da un vólta na téra interu
na kada novénta minutu.
Nton na kel ténpu di 24 óra
es ta odja sol ta kanba 16 bês i sol ta sai 16 bês.
Nton modi ki es ta konsigi kontrola ténpu
i ivita fika preokupadu dimás ô konfuzu
sobri kantu óra sta
i modi ki es ta konsigi pâpia ku ses família
i ku kes algen ki sta djuda-s na kes mison?
Modi ki es ta konsigi organiza ses vida?
Bon, es ten rilóji ki ta mostra-s kantu óra ki sta di verdadi.
Enbóra es ta viaja rápidu na vólta di téra
es ka ta fika konfuzu sen sabe kantu óra sta
pa ses família i tanbê pa ses koléga ki sta na téra.
Nton di mésmu manera,
kantu óra sta di verdadi pa mi i pa bo?
Nos óra é óra di Jeová.
Jeová dja da-nu kel informason ki nu meste
pa nu sabe na ki ténpu ki nu sta ta vive,
asi pa nu pode kolabora ku el
i pa nu konsigi odja ma dia di Jeová sta ta ben rápidu.
I kel li ta ben djuda-nu pa ka fika preokupadu dimás,
má pa nu mostra paxénxa.
I na nos ténpu Jeová tene-nu okupadu na óbra di Sinhor
i é difísil faze tudu kuza ki nu meste faze, ka simé?
Oji, ten mutu más kuza ta kontise
na organizason di Jeová di ki antis.
Nu sta ta odja Izaías 60:22 ta kunpri,
undi di ki el ta fla: ‘Kel poku ta ben bira mil.’
I Jeová sta ta ‘silera trabadju’.
Nton gósi más di ki nunka,
é inportanti nu fika pértu di organizason di Jeová
asi pa nu konsigi sabe kantu óra ki sta
i fika sienti na kes novu orientason ki nu ta dadu,
através di ‘skravu fiel i prudenti’.
I duránti es ténpu di fin,
Jeová sta ta da-nu kumida spritual
i intendimentu ki nu meste
pa nu kontinua ta kolabora ku el
i pa nu faze kel ki el krê, pa nu faze gósi.
I nu meste fika preokupadu ku kuzê ki ta ben
kontise na futuru i modi ki nu ta ben skapa
duránti grandi tribulason?
Nu odja otu prinsípiu ki nu debe lenbra di el.
É Juan 16:12.
Repara kuzê ki Jizus fla ses disiplu.
Juan 16:12, li ta fla:
“Inda N tene txeu kuza pa N fla nhos,
má gósi nhos ka ta konsigi intende-s.”
Nton Jeová ta da-nu kel ki nu meste gósi
pa nu pode kolabora ku el.
Nu ka meste fika preokupadu
ku kuzê ki ta ben kontise na futuru.
Jeová ta ben djuda-nu intende kes kuza li
na ténpu ki nu meste intende-s.
É si ki disiplus di Jizus prende.
Dipôs ki Jizus bai pa séu i el manda kel ajudador,
ki é spritu santu, ses disiplu intende tudu kuza.
I tanbê es intende modi ki es ta skapaba di distruison di Jiruzalen.
Es resebe orientason klaru na kel ténpu.
Es kontinua sénpri ta kolabora ku Jeová
i ta kunpanha kunprimentu di se vontadi.
I nos tanbê nu ta faze mésmu kuza oji.
Através di se organizason, ki el ta orienta ku se spritu santu,
Jeová ta djuda-nu kolabora ku se vontadi.
Ten kel konhisimentu li, ta djuda-nu ten paxénxa
i kontrola nos sentimentu
i kalker ansiadadi ki nu pode ten.
I asi nu ta mante kalmu
i ku paxénxa pamodi nu sabe
ma dia di Jeová ta ben i ma el ta ben da-nu
kel vida di verdadi ki el promete.

Christopher Mavor: Spera ku paxénxa pa dia di Jeová (Mat. 24:13)