JW subtitle extractor

Nos ki é povu di Jeová,
nu ta sforsa pa nu ka kunfia na sabedoria di ómi,
prinsipalmenti óras ki nos fé ta podu na próva.
I sima nu prende na testu di oji,
óras ki nu ta kunfia na sabedoria di ómi
nu pode dexa di kunfia na sabedoria di Jeová.
Normalmenti nu sta prontu pa lida ku dizafius
dirétu ki Satanás ta faze pa poi nos fé na próva
sima pirsigison ô opozison.
Nu sabe ki prinsípius di Bíblia pode djuda-nu
responde ku ruspetu.
Sima 1 Pedru 3:15 ta fla:
‘nu ta sta sénpri prontu pa difende dianti di tudu
ken ki iziji un razon pa speransa ki nu ten’.
Nu ka ta kunfia dimás na nos.
É ka pamodi nu ta atxa ma
nu sabe más ki otus algen.
É pamodi nu ta kunfia na
orientason i sabedoria di Jeová.
Provérbius 3:5, 6 ta lenbra-nu pa nu ‘kunfia
na Jeová di tudu nos korason, i pa ka bu kunfia
na nos própi intendimentu.’
Óras ki nu ta kunfia na Jeová,
nu ka ta ser influensiadu pa
sabedoria di mundu
ki ta insentiva pesoas pa faze kel ki es krê.
Má alvês kel dizafiu é ka dirétu.
El pode ser difísil nu ka da kónta,
i ti el pode ben di algen di nos família.
Pode ser difísil óras ki un algen na família
pô-nu ta xinti kulpadu prinsipalmenti si el
sta ta pasa pa un situason difísil.
Óras ki kel-li kontise
nu pode ka atxa ma é un próva di fé.
Nu pode pensa ma kel situason li
é sô más un prubléma na família.
Jeová ta intende ma kel-li pode ser
difísil pa nos.
É pur isu ki Bíblia ten txeu izénplu
di pesoas ki pasa pa mésmu situason ki nos
i mante lial pa Jeová.
Nu pode prende txeu kuza ku izénplu di Jó.
Nu sabe ma Jó foi un ómi fiel ki pasa pa txeu
prublémas ki nu ka ta konsigi nen imajina,
má un di kes prubléma más difísil ki el pasa pa el,
ben di se própi kaza, se mudjer.
El ku Jó es pasa pa kel mésmu
situason difísil djuntu.
Nu abri Bíblia, favor, i odja kuzê ki
el fla na Jó 2:9.
Jó 2:9.
Ku txeu tristéza el fla Jó kel-li:
“Inda bu sta ta mante bu lialdadi?
Maldísua Deus i móre!”
El ka fla kes kuza li di abuzu.
El staba ta mostra se grandi tristéza.
É kel-li ki due Jó pamodi
ka éra un inimigu ki staba ta dizanima-l.
Éra un algen ki el ta amaba txeu
ki staba ta insentivaba el pa el dizisti.
Dja bu pasa pa un situason sima kel-li?
Talvês bu mai ô bu pai sta internadu
ô móre ka dura li.
Tudu algen sta ka sábi.
Tudu algen sta tristi.
I dirapenti, un família ô un irmon ta txiga ta fla-u:
“Pamodi ki bu ka ben djobe-l antis?”
ô “Bu ta da más valor pa bu dizignason
di ki bu família.”
Kes palavra li ta due
pamodi es ta ben di un algen ki nu ta ama.
I nu pode pergunta:
‘Pamodi ki el sta ta fla-m kel-li?
Es ka sabe modi ki é difísil pa mi
ka konsigi sta li más bês sima N ta kreba.
Es ka sabe kantu bês N ka ta konsigi durmi noti
ta ora i ta pensa pamodi kel situason li.’
Na kes óra la, é más fásil nos
pensamentu ser influensiadu
pa nos sentimentu.
É ka sô mudjer di Jó ki pô-l ta xinti ka sábi.
Se três amigu falsu, Elifás, Bildade i Zofar,
tanbê tenta pô-l ta xinti kulpadu.
Elifás fla ma talvês Jó
fazeba algun kuza mariadu.
Zofar fla-l pa el para di peka.
I ti mésmu Bildade fla ma fidjus di Jó
móre pamodi pekadus di Jó.
Ses palavra tinha bazi na pensamentus di ómi,
ka na amor ô na verdadi.
Na verdadi, Jeová dipôs fla Elifás
kel ki sta na Jó 42:7:
“N sta txeu xatiadu ku bo i ku bus dôs amigu
pamodi nhos ka fla verdadi sobri mi,
sima nha sérvu Jó faze.”
Envês di djuda Jó, es pô-l más tristi inda.
Nu pode pasa pa un situason sima kel-li
ka pamodi kes ki nu ta txoma amigu,
má talvês pamodi un algen di nos família
ki ka ta adora Jeová.
Talvês dja nu ten txeu anu ta sirbi di manera
fiel na un dizignason,
má gósi nos dizignason dja muda ô dja tirmina,
i nu sta óra sobri kel-li pamodi nu krê
kontinua nos sirvisu pa ténpu interu.
Má envês di ajuda, nu ta obi kes palavra li:
“Inda bu krê faze kel trabadju la?
Dja bu faze txeu pa bu relijion.
Ki ténpu ki bu ta kumesa ta pensa na bu futuru
i na ganha dinheru?”
Es ka ta intende pamodi ki nu skodje
uza nos vida na sirvisu di Jeová.
I ses palavra pode pô-nu ta
dúvida di nos disizon,
prinsipalmenti si dja nu sta ta xinti tristi pamodi
mudansas ki fazedu na nos dizignason.
Má sima kes amigu falsu di Jó,
ses konsedju ten bazi na pensamentus di ómi,
ka na pensamentus di Jeová.
É fásil pa kel manera di pensa li
afasta-nu di manera di pensa di Jeová.
É kes tipu di sentimentu li própi
ki pode panha-nu disprevinidu.
Má sikrê se mudjer i ses amigu falsu
tenta ta pô-l ta xinti kulpadu,
Jó mante lial pa Jeová.
El faze kel-li sikrê el ka ta intendeba
pamodi ki el sta ta sufri.
Kuzê ki nu ta prende di izénplu di Jó?
Bon, nu ben pâpia di três lison.
Primeru, Jó ta inxina-nu kunfia
na sabedoria di Jeová,
ka na nos sentimentus i ideia di ómi.
Kantu se mudjer, ki staba dizanimadu,
tenta pô-l ta dizisti,
Jó ka reaji ku raiba ô difende se kabésa.
Envês di kel-li, el lenbra se mudjer
ma el ta kunfiaba na Jeová.
Nu ben odja modi ki Jó responde na Jó 2:10.
Má el responde-l:
“Bu sta ta pâpia sima un mudjer ki ka ten juís.
Nu debe seta sô kes kuza dretu
ki Deus verdaderu ta da-nu
i ka seta tanbê kes kuza mariadu?”
Sikrê tudu kel-li kontise,
Jó ka peka ku se bóka.”
Jó intende ma se mudjer fla kes palavra
pamodi el staba tristi.
Jó ka diskuti, nen el ka pô-l xinti mariadu.
Si el fazeba asi, el ta ajiba pa emoson.
Má, ku kalma Jó mostra-l ma el ta
kunfiaba na Jeová.
Nton si un algen ki nu ta ama pâpia
ku nos mariadu pamodi el sta tristi,
nu pode poi na se lugar,
responde-l ku bondadi i imita Jeová.
Nu ka meste difende nos kabésa.
Ku amor nu ta mostra-s ma nu ta kunfia
na Jeová i tanbê ma nu ta ama-s.
Segundu, Jó inxina-nu modi
ki nu ta kontinua lial
sikrê nu ka ta intende pamodi
ki nos situason muda.
Ses amigu falsu akuza-l di manera injustu
pamodi es ka tinha pensamentus di Deus.
É verdadi ma Jó staba konfuzu i tristi
pur isu el fla alguns kuza sen krê.
Enbóra el pâpia “sen pensa”, simé el mostra
gratidon pa manera ki Jeová kuida di el.
Repara kuzê ki el fla na Jó 10:12.
Jó 10:12 ta fla:
“Bu da-m vida i bu mostra-m amor lial.
Bu proteje-m i bu kuida di mi.”
Kantu Jó fla kes palavra li el ka sabia modi ki
Jeová ta ba djudaba el.
El staba dizanimadu i ku txeu dór,
má el ka para di kunfia na Jeová.
El kontinua ta pâpia ku ses amigu falsu sobri
se amor i gratidon pa kel ki Jeová dja daba el.
Di mésmu manera,
óras ki nos família ki ka ta sirbi Jeová
ka ta apoia-nu na nos sirvisu pa ténpu interu,
kel-li pode magua-nu.
Má nu pode mostra nos amor i gratidon
pa Jeová i pa tudu ki el faze pa nos.
Lenbra ma sikrê nos família ka intende pamodi
ki nos sirvisu pa Jeová é kuza
más inportanti na nos vida,
Jeová ta odja kuzê ki nu ta faze i el ta da valor.
Tirseru lison ki nu pode prende di respósta di Jó
é ma nu debe ten paxénxa i
kunfia ma Jeová ta djuda-nu.
Jó kontinua lial sikrê el ka sabia
pamodi ki el staba ta sufri,
má repara kuzê ki el fla na Jó 19:25.
Na Jó 19:25 el ta fla:
“Pamodi N sabe dretu ma kel ki ta resgata-m sta bibu.
El ta ben dipôs i el ta ben labanta riba di téra.”
Un kuza interesanti é ki kes kuza ki Jó pasa pa el
talvês dura alguns mês ô ménus ki un anu.
Má sima kel testu li ta mostra,
el tinha serteza ma Jeová ta staba la
pa resgata-l pamodi el tinha valor pa Jeová.
El aguenta firmi.
I el spera pa Jeová.
Óras ki nos situason muda
ô óras ki nos dizignason tirmina
ô nu sta ta xinti tristi pamodi un
algen ki nu ta ama móre,
pode leba ténpu pa nu rekupera nos alegria.
Má sima Jó, nu pode spera pa Jeová.
Nu pode kunfia ma el ta odja nos lialdadi,
i el ta da valor pa nos kapasidadi di aguenta firmi
i nunka el ka ta skese di nos fé.
Izénplu di Jó ta inxina-nu ma óras
ki otus ta pô-nu ta xinti kulpadu, prinsipalmenti
kes más pértu di nos,
kel-li pode ser un grandi próva di fé.
Má tanbê ta mostra ma nu pode
ser lial pa Jeová
ti mésmu duránti situason más difísil di nos vida.
Na situasons sima kes-li,
é inportanti nu ka kunfia na nos kabésa.
Má, nu ta kunfia na sabedoria di Jeová
envês di kunfia na nos sentimentus.
Mante lial sikrê bu ka sta intende
pamodi ki sta un kuza sta ta kontise.
I spera pa Jeová,
pamodi el ta odja i el ta da valor
pa bu kapasidadi di aguenta firmi.
I sima el abensua Jó pamodi se lialdadi,
el ta ben abensua-nu tanbê.

Peter Price: Kontinua lial óras ki otus pô-u ta xinti mal (Jó 2:9, 10)