JW subtitle extractor

Na ténpu ki nu sta ta vive oji,
nos tudu nu ta pasa pa prublémas.
Bu ta atxa ma Jeová ta djuda-u?
Si bu ta atxa ma sin, nton é na ki ténpu?
Nu pode ten sertéza
ma Jeová ta djuda-nu óras ki nu sta pasa pa prublémas.
Pamodi?
Pamodi amor é kel kualidadi prinsipal di Jeová.
Pa nu prende más sobri kel kualidadi li
i modi ki nu pode mostra-l,
nu ben analiza stória di Juzé ki sta na Bíblia.
Dja ten más di 3.700 anu
ki Juzé nase na Mezopotámia.
Se pai Jakó, éra xéfi di família,
el éra konxedu tanbê pa Israel.
Juzé tinha 10 irmon pa ladu pai
i un irmon di mai ku pai,
ki txomaba Benjamin.
Kantu Juzé staba rapazinhu inda,
el kumesa ta pasa pa prublémas pamodi se 10 irmon más grandi
tinha siumis di el.
Dja ki Juzé aguenta kes prubléma,
tudu se família skapa duránti un ténpu di fómi.
Alén di kel-li,
pamodi kuzas ki el pasa,
nu pode resebe benson ki ta dura pa tudu ténpu.
N ta konvida nhos tudu
pa obi leitura di Bíblia ku atenson
na Génesis 37:2-11.
Kantu Juzé tinha 17 anu,
el staba ta kuida di ovelhas djuntu ku fidjus di Bila i fidjus di Zilpa,
ki éra mudjeris di se pai.
I Juzé ben konta se pai un kuza mariadu ki es faze.
Israel ta amaba Juzé más di ki tudu kes otu fidju,
pamodi el éra fidju di se bedjisa;
i el manda faze-l un ropa spesial.
Kantu se irmons odja ma ses pai ta amaba el más di ki tudu es,
es kumesa ta odia-l,
i es ka sta konsigi papiaba ku el dretu más.
Dipôs, Juzé tevi un sonhu i el konta se irmons el,
i kel-la foi más un kuza ki pô-s ta odia-l.
El fla-s:
Favor, nhos obi kuzê ki N sunha ku el.
Nu staba ta mara fexu na meiu di kanpu
kantu nha fexu labanta i el fika sakédu,
i kes fexu di nhos rodia-l i es nbaxa dianti di nha fexu.
Se irmons fla-l:
Bo própi ki ta ben fika rei riba di nos i ta ben manda na nos?
Nton, es atxa un otu razon pa odia-l,
pamodi kes sonhu ki el ta tinha i kuzê ki el fla.
Dipôs di kel-li, el tevi un otu sonhu i el konta se irmons:
N tevi un otu sonhu.
Kel bês li, sól, lua i 11 stréla staba ta nbaxa nha dianti.
Nton, el konta se sonhu pa se pai, i tanbê pa se irmons,
i se pai reprende-l i el fla-l:
Kuzê ki siginifika kel sonhu li ki bu tevi?
Bu krê fla ma ami i tanbê bu mai ku bus irmon,
ta ben nbaxa bu dianti ku róstu pa txon?
I se irmons fika ku siumis di el,
má se pai guarda kes palavra na se menti.
Família di Juzé ka krê seta kuzê ki se sonhu siginifika!
Má simé, Jakó ‘guarda kes palavra’
ô el guarda sonhu di Juzé ‘na menti.’
Di ki manera?
El kontinua ta pensa na el.
Talvês el ntende ma kel sonhu di se fidju ben di Jeová.
Má, irmons di Juzé ka pensa di mésmu manera.
Nu kontinua ta obi leitura na Génesis 37:18-36.
Es odja-l di lonji i, antis di el txiga na es,
es kumesa ta faze planu kóntra el pa es mata-l.
Nton, es fla kunpanheru:
Nhos odja!
Ala kel sunhador ta ben.
Nu pruveta gósi,
nhos ben nu mata-l i nu bota-l déntu di un di kes sistérna,
i nu ta fla ma é un animal brabu ki kume-l.
Asi, nu ta odja kal di se sonhu ki sta ben realiza.
Kantu Ruben obi kel-li, el tenta salva-l di ses mô.
Nton el fla:
Ka nu tra-l se vida.
Ruben fla-s:
Ka nhos tra sangi.
Nhos bota-l na es sistérna, li na dizértu,
má ka nhos faze-l mal.
Se obijetivu éra salvaba el di ses mô,
pa el torna lebaba el pa se pai.
Nton, sin ki Juzé txiga na se irmons,
es tra-l se ropa ki el tinha bistidu di riba,
kel ropa spesial ki el ta uzaba,
i es pega-l i es bota-l na sistérna.
Na kel ténpu kel sistérna staba vaziu;
ka tinha agu na el.
Dipôs, es xinta pa es kume.
Kantu es labanta róstu,
es odja un grupu di ismaelitas ki staba ta binha di Jiliádi.
Ses kamelu staba ta karega alguns tipu di purfumu,
i es staba ta dixi pa Ijitu.
Nton, Judá fla se irmons:
Kuzê ki nu ta ganhaba si nu mataba nos irmon
i nu sukundiba se mórti?
Nu bende-l pa ismaelitas, má ka nu faze-l mal.
Afinal, el é nos irmon, nos karni.
Nton, es obi ku ses irmon.
I, kantu kes ómi di Midian, ki ta fazeba nogósiu, staba ta pasa,
kes irmon di Juzé tra-l fóra di kel sistérna
i es bende-l pa kes ismaelita
pa 20 pésa di prata.
Kes ómi leba Juzé pa Ijitu.
Dipôs,
kantu Ruben volta pa sistérna i el odja ma Juzé ka staba na sistérna,
el ratxa se ropas.
Kantu el torna bai na se irmons, el grita:
Rapazinhu dja dizaparse!
I mi, kuzê ki N ta faze?
Nton, es panha ropa di Juzé,
es mata un bódi i es mete kel ropa na se sangi.
Dipôs, es manda kel ropa spesial pa ses pai i kel rekadu li:
Odja kuzê ki nu atxa.
Favor, djobe si é ropa di bu fidju ô nau.
El djobe-l i el fla:
É ropa di nha fidju!
Un animal brabu debe dja kume-l!
Di sertéza Juzé dja satadjadu!
Nton, Jakó ratxa se ropas i el mara un panu di saku na sintura,
i el txora se fidju duránti txeu dia.
I tudu se fidjus-matxu i tudu se fidjus-fémia tenta konsola-l,
má el ka dexa-s konsola-l, i el fika ta fla:
N ta txora nha fidju ti ki N móre!
I el kontinua ta txora se fidju.
Timenti kel-li staba ta kontise,
kes ómi di Midian bende Juzé na Ijitu, pa Putifar,
ki éra un ofisial na palásiu di Faraó i xéfi di guarda.
Fórti mudansa grandi pa Juzé!
El éra kel fidju ki se pai kreba más txeu i gósi el é un skravu!
Irmons di Juzé ka fadja sô na mostra-l amor lial,
má tanbê es fadja na mostra amor lial pa ses pai Jakó,
i más inportanti inda, pa ses Pai na Séu, Jeová.
Sikrê nos é sérvus fiel di Jeová, nu pode sufri injustisa.
Alvês, é nos irmons ô irmans ki pode trata-nu ku injustisa.
Bu sta ta pasa pa un situason sima kel-li?
Nton, bu prubléma ta da-u un bon oportunidadi
pa bu prova bu amor pa Jeová.
Di ki manera?
Odja modi ki Juzé lida ku se prubléma.
Nu obi kuzê ki Génesis 39:1-23 ta fla.
Juzé lebadu pa baxu, pa Ijitu,
i un ómi di Ijitu ki txomaba Putifar,
un ofisial na palásiu di Faraó i xéfi di guarda,
kunpra-l na kes ismaelita ki lebaba el pa la.
Má Jeová staba ku Juzé,
i pur isu tudu kuza ki el ta fazeba ta tinha bon rezultadu
i el fika responsável di kaza di se patron, kel ómi di Ijitu.
I se patron odja ma Jeová staba ku el
i ma Jeová ta poba tudu kuza ki el ta fazeba ta tinha bon rezultadu.
Putifar ta gostaba txeu di Juzé, i Juzé bira se ajudanti pesoal.
Nton, el pô-l enkaregadu di se kaza,
i el manda-l toma kónta di tudu kuza ki éra di sel.
Sin ki kel ómi di Ijitu pô-l enkaregadu di se kaza
i di tudu kuza ki éra di sel,
Jeová abênsua kaza di kel ómi di Ijitu pamodi Juzé,
i benson di Jeová staba riba di tudu kuza ki el tinha na kaza i na kanpu.
Ku ténpu, Putifar dexa tudu kuza ki éra di sel na mô di Juzé,
i el ka ta preokupaba ku nada, sô ku se kumida.
Tanbê, Juzé bira bunitu i ku un korpu bunitu.
Pasa uns ténpu i mudjer di Putifar kumesa ta repara na Juzé
i el fla-l:
Deta ku mi.
Má el ta negaba i el ta flaba mudjer di se patron:
Nha patron nen ka sabe kuzê ki sta ku mi na kaza,
i tudu ki el ten el ntrega-m na nha mô.
Ka ten ningen más grandi ki mi na kel kaza li,
i el ka nega-m ninhun kuza, ménus nha,
pamodi nha é se mudjer.
Pur isu, modi ki N pode faze es grandi maldadi
i peka kóntra Deus?
Nton, tudu dia el ta papiaba ku Juzé,
má Juzé nunka ka seta deta ku el ô sta djuntu ku el.
Má, un dia kantu Juzé entra na kaza pa faze se trabadju,
ninhun di kes sérvu di kaza ka staba la.
Nton, el pega-l na ropa i el fla:
Deta ku mi!
Má el el dexa mudjer ku se ropa na mô i el fuji pa fóra.
Kantu mudjer odja ma Juzé dexa se ropa na se mô i el fuji pa fóra,
el kumesa ta grita i ta txoma kes ómi di se kaza.
El fla-s:
Nhos odja!
Kel ebreu ki nha maridu traze-nu, krê faze trósa di nos.
El ben pega-m pa el deta ku mi,
má N kumesa ta grita más riju ki N pode.
I, sin ki el obi-m ta grita, el dexa se ropa na nha ladu i el fuji pa fóra.
Dipôs di kel-li,
el dexa kel ropa di Juzé na se ladu ti ki patron di Juzé txiga kaza.
Nton, mudjer fla-l kel mésmu kuza:
Kel sérvu ebreu ki bu traze-nu ben tenta faze trósa di mi.
Má, sin ki N kumesa ta grita,
el dexa se ropa na nha ladu i el fuji pa fóra.
Kantu patron di Juzé obi se mudjer ta fla,
“É kel-li ki bu sérvu faze-m”,
el fika uma xatiadu.
Nton, patron di Juzé pega-l i el manda-l pa kadia,
kel lugar undi prézus di rei ta fikaba,
i el kontinua la na kadia.
Má, Jeová kontinua ta sta ku Juzé i ta mostra-l se amor lial,
i Jeová poi xéfi di guardas di kadia ta gosta di el.
Pur isu, xéfi di guardas di kadia
poi Juzé ta kuida di tudu kes otu prézu ki staba na kadia,
i éra Juzé ki ta orientaba tudu kuza ki es ta fazeba la.
Kel xéfi di guardas di kadia
ka ta preokupaba ku nada ki Juzé ta kuidaba di el,
pamodi Jeová ta staba ku Juzé,
i Jeová ta poba tudu kuza ki el ta fazeba ta tinha bon rezultadu.
Jeová kuida dretu di Juzé i el abênsua tudu kel ki el faze.
Pamodi ki Jeová ta gostaba txeu di Juzé?
Pamodi Juzé kontinua ta ama Jeová
sikrê ku tudu kes kuza ki el pasa pa el.
Izénplu di Juzé ta inxina-nu ma si nu kontinua ta ama Jeová
nunka El ka ta bandona-nu!
I, el ta da-nu kel ki nu meste na ténpu sértu pa nu pode aguenta.
Nu volta pa stória di Juzé.
Gósi el mandadu pa el kuida di dôs prézu spesial.
Xéfi di kes algen ki ta sirbiba bebida
i xéfi di paderu di Faraó.
Un dia di noti, es tudu dôs tevi un sonhu stranhu.
Jeová djuda Juzé splika-s siginifikadu di ses sonhu
i kontise sima el fla.
Repara na Génesis 40:14,
kuzê ki Juzé pidi kel xéfi di kes algen ki ta sirbiba bebida:
‘Lenbra di mi, óras ki kuzas sta ta kóre dretu ku bo.
Favor, mostra amor lial pa mi i pâpia ku Faraó sobri mi,
pa el pode tra-m di es lugar.’
Má dipôs ki el sai di kadia el skese di tudu kuza sobri Juzé.
Algun ténpu dipôs, Faraó tanbê tevi dôs sonhu stranhu.
Na un, el odja uns baka magru ta kume otus baka ki staba gordu,
i na kel otu el odja uns spiga séku ta inguli otus spiga ki staba dretu.
Ninhun di kes saserdóti i ómis di sabedoria na Ijitu
ka konsigi splika sonhus di Faraó.
Ti ki enfin, kel sérvu di Faraó konta-l
sobri grandi kapasidadi ki Juzé ten di splika sonhus.
Juzé manda txomadu kel óra na kadia.
Nu kontinua ta obi leitura ki ta kumesa na Génesis 41:25.
Gósi Juzé tene 30 anu i el sta frenti di rei.
Nton, Juzé fla Faraó:
Kes sonhu di Faraó ten sô un siginifikadu.
Kel Deus verdaderu dexa Faraó sabe kuzê ki el sta ta ben faze.
Kes 7 baka gordu é 7 anu.
Tanbê, kes 7 spiga bunitu é 7 anu.
Kes sonhu ten sô un siginifikadu.
Kes 7 baka magru i feiu ki subi dipôs di kes gordu, é 7 anu;
i kes 7 spiga sen nada, ki bira séku pamodi béntu lésti, é 7 anu di fómi.
Sima dja N fla Faraó,
kel Deus verdaderu dexa Faraó odja kuzê ki El sta ta ben faze.
“Ta ben ten 7 anu di grandi fartura na tudu téra di Ijitu.
Má, dipôs di kes-li, di sertéza ta ben 7 anu di fómi,
i tudu kel fartura di téra di Ijitu di sertéza ta skesedu di el
i fómi ta toma kónta di país.
I kel fartura ki tinha antis na país ka ta lenbradu di el más,
pamodi kel fómi ki ta ben dipôs ta ser duru dimás.
Faraó dadu kel sonhu dôs bês
pamodi é un kuza ki Deus verdaderu dja disidi faze,
i Deus verdaderu sta ben faze-l já já.
Juzé faze un planu pa guarda txeu kumida pa ténpu fómi.
Faraó fika uma kontenti ku splikason di sonhu
i ku kes konsedju ki Juzé da-l,
ki el poi Juzé pa ser governanti di tudu Ijitu,
sugundu ómi dipôs di el!
Dipôs ki pasa 8 anu, fómi toma kónta di tudu kel téra.
Família di Juzé tanbê sufri.
Nton, Jakó manda se fidjus pa bai kunpra kumida na Ijitu.
Kes 10 fidju más grandi di Jakó bai pa Ijitu.
Má, Benjamin, kel más pikinoti, fika na kaza.
Kes 10 irmon nkontra ku Juzé i es nbaxa se dianti ku róstu pa txon,
sima kel sonhu ki el tevi antis ta mostraba.
Juzé rekonhise se irmons, má es ka rekonhise-l.
El pâpia ku es sô na língua di Ijitu através di un tradutor
i el ka dexa-s sabe ken ki el éra di verdadi.
Gósi Juzé ten ki toma un disizon.
El ta uza se autoridadi pa konplika vida di se irmons?
El ta manda-s bai ses kaminhu,
pamodi el ta atxa ma es ka merese se ajuda?
Ô el ta tenta djobe algun oportunidadi pa faze pas ku es?
El ta imita amor lial di Jeová?
Kuzê ki bu ta fazeba?
Juzé krê sabe si dja es muda
ô si inda es tene ódiu i invéja di el.
Nton, el txoma-s di spion,
i el fla ma ses irmon Simion
ta fika prézu la ti ki es ben ku Benjamin.
Nu ben obi leitura di Génesis 42:21-24.
Di sertéza, nu sta ser kastigadu pamodi kuza ki nu faze ku nos irmon,
pamodi nu odja modi ki el sufri kantu el pidi-nu pa nu ten péna di el,
má nu ka obi ku el.
É pur isu ki kel sufrimentu li dja ben kai riba nos.
Nton Ruben fla-s:
N ka fla nhos: ‘Ka nhos peka kóntra kel rapazinhu’?
Má nhos ka obi ku mi.
Gósi, di sertéza nu sta ben paga pamodi se sangi.
Má es ka sabeba ma Juzé staba ta ntende,
pamodi el uza un tradutor pa pâpia ku es.
Dipôs, el sai di djuntu ku es i el kumesa ta txora.
Kantu el ben i el torna pâpia ku es,
el pega Simion i el mara-l na ses frenti.
Juzé obi Ruben ta fla ma kes kuza mariadu ki sta kontise ku es
é pamodi es maltrataba Juzé.
Má Ruben i se irmons staba rapendidu di verdadi?
Pa Juzé ten sertéza ma dja es rapende,
el manda se irmons pa volta pa Kanaan i pa traze Benjamin,
ses irmon más pikinoti, pa Ijitu.
Modi ki Jakó reaji kantu ki es txiga kaza
i es fla-l ma es ten ki leba Benjamin pa Ijitu?
Nu obi respósta na Génesis 42:36, 37.
É mi ki nhos dexa sen fidju!
Juzé ka izisti más, i Simion ka izisti más,
i gósi nhos ta ben leba Benjamin!
É mi ki ten ki aguenta tudu kes kuza li!
Má, Ruben fla se pai:
Nhu pode mata nhas dôs fidju si N ka torna traze nho el.
Nhu ntrega-m el na nha mô i N ta torna da nho el.
Jakó sta disididu!
El ka sta dexa Benjamin sai di djuntu di el.
Má, na sugundu anu di fómi Jakó ku se família
fika sen ninhun kumida.
I gósi?
Jakó ta dexa Benjamin bai pa Ijitu
ku se irmons pa traze más kumida?
Nu ben obi respósta na leitura di Génesis 43:8-10, 13, i 14.
Nton, Judá insisti ku Israel, se pai:
Manda rapazinhu djuntu ku mi i dexa-nu bai,
asi pa nu fika bibu i pa nu ka móre, anos, anho i nos fidjus.
N ta garanti ma N ta proteje-l.
Nhu pode pô-m responsável di el.
Si N ka torna traze nho el,
N ta karega kel pekadu li dianti di nho pa tudu nha vida.
Má, si nu ka atrazaba, pa gósi talvês dja nu baba i dja nu voltaba dôs bês.
Nhos toma nhos irmon i nhos bai,
nhos torna bai na kel ómi.
Pa Deus Tudu-Poderozu poi kel ómi ta xinti péna di nhos,
asi pa el liberta kel otu nhos irmon i Benjamin.
Má ami, si N ten ki fika sen nhas fidju,
N ta fika sen nhas fidju!
Nbóra na pasadu Judá maltrata Juzé,
kel fidju ki se pai kreba más txeu,
i el tinha siumis di el,
gósi el sta prontu pa proteje se irmon Benjamin,
kel fidju ki se pai krê más txeu.
Nton, Jakó dexa se fidjus volta pa Ijitu,
i es leba Juzé un monti prezenti.
Nu kontinua ta obi leitura na Génesis 43:26-30.
Kantu Juzé entra na kaza,
es leba-l ses prezenti pa el i es nbaxa se dianti ku róstu pa txon.
Dipôs di kel-li el pergunta-s:
Modi ki nhos pai sta, kel ómi grandi ki nhos papia-m di el?
Inda el sta bibu?
Es responde:
Nos pai, sérvu di nho, sta dretu.
Inda el sta bibu.
Nton, es nbaxa i es poi róstu pa txon.
Kantu el labanta róstu i el odja Benjamin se irmon,
fidju di se mai, el fla:
É kel-li ki é nhos irmon,
kel más pikinoti, ki nhos flaba mi?
I inda el fla:
Pa Deus abensua-u, nha fidju.
Juzé xinti txeu mágua pamodi se irmon,
pur isu el sai faxi ta djobe un lugar pa el txora.
Nton, el entra déntu di un kuartu i el kumesa ta txora.
Juzé krê ten sertéza ma se irmons dja muda,
nton el sprimenta-s.
Modi?
Juzé manda se sérvus pa intxi saku di kada un di se irmons ku kumida.
El manda sukundi se kópu spesial di prata na saku di Benjamin.
Dipôs ki dja es bai, má ka mutu lonji,
Juzé manda se sérvus pa bai ses tras.
Kantu sérvus di Juzé txiga na se irmons, es fla:
‘Pamodi ki nhos furta kópu di prata di nos Sinhor?’
Irmons di Juzé fla ku tudu sertéza
ma ninhun di es ka furta kópu i tanbê es fla:
‘Si nhos atxa algun di nos ku kópu nhos pode mata kel algen.’
Nton, sérvus di Juzé djobe na tudu saku
i es atxa kel kópu na saku di Benjamin!
Irmons di Juzé ratxa ses ropa pa mostra ses tristéza.
Es fika dizorientadu,
i es volta ku Benjamin pa kaza di Juzé.
Judá poi duedju na txon frenti di Juzé i el fla:
‘Kel Deus verdaderu dja diskubri éru di bus sérvu.
Gósi, anos é skravus di nha sinhor’.
Juzé kontinua ta sprimenta-s.
El fla ku firméza:
‘Anhos, nhos pode volta pa kaza,
má Benjamin ta fika li pa ser nha skravu!’
Judá inplora Juzé:
‘Si N ka torna leba Benjamin, di sertéza nha pai ta móre
i N ta peka kóntra el pa tudu ténpu.’
Judá ka krê pa se pai perde más un fidju ki el krê txeu i pô-l ta sufri,
pur isu el oferese pa fika skravu na lugar di Benjamin.
Nu ben obi modi ki Juzé reaji na Génesis 45:1-15:
Pur isu, Juzé ka konsigi aguenta dianti di tudu se sérvus.
Nton, el grita:
Nhos manda tudu algen pa sai di li!
Kantu ningen más ka staba djuntu ku Juzé,
el fla se irmons ken ki el éra.
I el kumesa ta txora uma riju
ti ki gentis di Ijitu obi-l i gentis di kaza di Faraó tanbê obi-l.
Na fin, Juzé fla se irmons:
Ami é Juzé.
Nha pai inda sta bibu?
Má se irmons ka konsigi fla-l nada,
pamodi es fika spantadu ku el.
Nton, Juzé fla se irmons:
Nhos txiga más pértu mi favor.
I es txiga más pértu di el.
El fla-s:
Ami é Juzé, nhos irmon ki nhos bende pa gentis di Ijitu.
Má, gósi, ka nhos fika preokupadu nen ka nhos poi kulpa na kunpanheru
pamodi nhos bende-m pa gentis di Ijitu;
pamodi Deus manda-m nhos frenti pa salva vida di pesoas.
Kel-li é sugundu anu di fómi na país,
i inda ta ben ten más 5 anu ki ka ta ten nen simentera nen kodjéta.
Má, Deus manda-m nhos dianti,
pa un párti di nhos família pode fika bibu na Téra
i pa salva nhos vida através di un grandi libertason.
Pur isu, é ka nhos ki manda-m pa li,
má foi kel Deus verdaderu,
pa el pode skodjeba mi pa N ser kel algen prinsipal pa da Faraó konsedju,
sinhor di tudu se kaza i governador di tudu téra di Ijitu.
“Nhos volta faxi pa nha pai i nhos fla-l:
‘Juzé fidju di nho fla:
“Deus skodje-m pa N ser sinhor di tudu Ijitu.
Nho ben atxa-m li.
Ka nhu dura.
Nhu ta ben mora na téra di Gózen,
pa nhu fika pértu di mi, anho, fidjus di nho, nétus di nho, ribanhus di nho,
tudu animal di nho i tudu kel ki nhu ten.
N ta leba nho kumida la, pamodi inda ta ten más 5 anu di fómi.
Sinon, anho, kaza di nho i tudu kel ki nhu ten ta kai na pobréza.”’
Gósi, nhos ku nha irmon Benjamin,
nhos pode ben odja-m ku nhos própi odju,
ma é mi própi ki sta ta pâpia ku nhos.
Nton, nhos konta nha pai sobri tudu glória ki N ten na Ijitu
i tudu kel ki nhos odja.
Gósi, nhos bai faxi i nhos traze nha pai pa li.
Dipôs el brasa Benjamin, se irmon, i el kumesa ta txora,
i Benjamin txora brasadu na el.
I el da tudu se irmons beju i el txora brasadu na es.
Dipôs, Jakó ku sérka di 70 algen di se família muda pa Ijitu.
Faraó da-s téra di Gózen pa es vive la.
Famílias di Jakó vive 215 anu na Ijitu,
ti dia ki Jeová abri un kaminhu na meiu di Mar Burmedju
i 3 milhon ô más di es pasa ti kel otu ladu.
Ku ténpu es bai mora na kel téra ki Deus prometeba es.
Jeová uza Juzé pa proteje kel família ki Misías ta binha di el.
Kuzê ki stória di Juzé ta inxina-nu?
Juzé mostra amor lial pa Jeová.
Duránti txeu anu, el pasa pa un monti prubléma,
un tras di kel otu, má nunka el ka bira un algen marguradu.
Oji, na kel mundu inperfetu li, talvês nu ka ta konsigi faze txeu kuza
pa lida ku prublémas ki nu ta pasa pa el.
Má nu pode kontrola manera ki nu ta reaji.
Nu ka ta dexa kes kuza la pô-nu ta fika xatiadu ku Jeová.
Nu ta ama Jeová i nu sta disididu na prova nos amor pa el,
óras ki nu ta ivita faze kalker kuza ki pode magua-l.
Más tardi, kantu situason di Juzé muda,
el mostra amor lial pa se família,
sikrê se irmons maltrataba el na pasadu.
Na verdadi,
amor lial ki Juzé mostra pa se família djuda kunpri un profesia!
Na ténpu di Abraon, ki éra bizavó di Juzé,
Jeová marka un ténpu izatu
pa salva se povu, 430 anu dipôs.
Si Juzé ka mostraba amor lial pa se família
modi ki kel profesia li ta kunpriba?
É klaru ki amor lial ki nu ta mostra pa nos irmons é inportanti pa Jeová.
Pur isu, si bu sta maguadu ku algun irmon ô irman,
ka bu kai na tentason di pâpia mal di el ô di faze-l algun kuza mariadu.
Faze tudu kel ki bu pode pa nhos torna ten pas ku kunpanheru.
Si Jeová ta ama nos irmons, es tanbê es merese nos amor lial!
Midjór izénplu di amor lial na kel stória li é Jeová.
Juzé bandonadu pa se família,
mudjer di se patron konta mintira sobri el,
i na fin el podu na kadia.
Má, Jeová ‘kontinua ku Juzé i el ta mostraba el amor lial’.
Pamodi?
El odja ma Juzé kontinua lial, nton el trata-l ku lialdadi tanbê.
Manera ki Jeová trata Juzé tanbê mostra se amor lial pa nason di Israel.
Jeová uza Juzé pa proteje vida di se família,
asi el proteje kel família ki Misías ta binha di el
i tanbê el garanti ma se promésa di salva israelitas
ta ben kunpriba na ténpu sértu.
Kel-li ka ta nkoraja-nu?
Umanus inperfetu pode diziludi-nu,
faze-nu trósa,
konta mintira sobri nos
ô trata-nu ku injustisa.
Má si nu kontinua lial, Jeová nunka ka ta bandona-nu.
Nunka el ka skese di Juzé i el ka ta skese di ninhun di se sérvus lial oji.
Kontinua ta ten un amizadi fórti ku Jeová
i el ta kontinua ta mostra-u amor lial.

Jeová kontinua ta mostra amor lial