JW subtitle extractor

Li avie jkotoltik chkiltik prevaetik.
¿Mi oy xanop mi tskoltautik
onoʼox van li Jeovae?
Mi tanae, ¿bakʼin tskoltautik?
Xuʼ jpat koʼontontik ti tskoltautike.
¿Kʼuxi jnaʼojtik?
Yuʼun li stalelal mas tsots skʼoplal
xchiʼuk ti kʼupil sbae, jaʼ li kʼanelale.
Sventa jnaʼtik mas ta sventa taje
xchiʼuk ti kʼuxi xuʼ xkakʼtik ta ilele,
jkʼelbetik li sloʼil xkuxlejal Jose ta Vivliae.
Li Josee mas xa ta 3,700
jabil svokʼel ta Mesopotamia.
Li stote Jakob sbi,
jaʼ li moltotil ta utsʼ alalil ti Israel sbi xtoke.
Oy lajunvoʼ xchabankiltak xchiʼuk
oy jun yitsʼin ti jmoj stot smeʼik ti Benjamin sbie.
Ta skeremal onoʼox laj yil svokol
ta skoj ti laj ta itʼixal yuʼun sbankiltake.
Pe koliyal ti kuch yuʼun li prevaetik taje,
muʼyuk xcham ta viʼnal li yutsʼ yalale.
Jech xtok, jaʼ ta skoj ti xuʼ jtatik
ep bendision ta sbatel osile.
Jchikintatik li kʼusi chal Jenesis 37:2-11
xchiʼuk jmoj jkʼeltik batel.
Li yutsʼ yalal Josee mu skʼan xchʼun
kʼusi smelolal li xvayichtake.
Pe li Jakobe laj yakʼ ta yoʼonton,
tsnopilanbe skʼoplal.
Yuʼun laj van yakʼ venta ti likem talel ta
stojolal Jeova li kʼusitik la xvaychin skereme.
Pe li sbankiltake muʼyuk lek laj yaʼiik,
jkʼeltik to batel li Jenesis 37:18-36.
¡Anil jel xkuxlejal!
¡Ichʼbil toʼox tajek ta kʼux,
pe avie jaʼ xa jun mosoil!
Li sbankiltake muʼyuk tukʼ la skʼan
li yitsʼinike xchiʼuk li stotike.
Pe li kʼusi mas to chopole
jaʼ ti muʼyuk skʼanik li Jeovae.
Melel onoʼox ti mu skotoluk velta tskoltautik
Dios ta sventa li kʼusitik ta jnuptantike.
Xuʼ van oy kʼusi muʼyuk tukʼ
la spasbutik junuk ermano.
¿Mi oy van jech anuptanoj?
Mi jeche, mu me xchʼay xkaʼitik
xkakʼtik ta ilel ti jkʼanojtik li Jeovae.
Jnoptik ta sventa ti kʼu yelan laj yaʼi sba Jose
kʼalal laj yil svokole.
Jkʼeltik Jenesis 39:1-23.
Jech-o chchabi Jose li Jeovae
xchiʼuk tskolta sventa lekuk xbat ta pasel yuʼun skotol.
¿Kʼu yuʼun ti skʼanoj tajeke?
Yuʼun skʼanoj tajek Jeova ta sjunul yoʼonton ek.
Li kʼusi la snuptan Josee chakʼ
jchantik ti muʼyuk tstenutik Jeova
mi jech-o jkʼanojtike.
Yuʼun sventa xkuch kuʼuntike
ta xakʼbutik li kʼusi chtun kuʼuntike
xchiʼuk ta yorail chakʼbutik.
Jkʼeltik kʼusi mas la snuptan li Josee.
Akʼbat sbain chaʼvoʼ jchukeletik ti tsots yabtelike:
jaʼ li jpʼis-uchʼbol yuʼun faraone
xchiʼuk li bankilal jpaspane.
Jun akʼobale, oy kʼusi labal sba la xvaychinik.
Pe li Jeovae la skolta Jose sventa xalbe
lek smelolal xchiʼuk jech kʼot ta pasel.
Li ta Jenesis 40:14
xi xvokolet laj yalbe jpʼis-uchʼbol li Josee:
«Vulesun me ta ajol un mi lek xa xbat akuxlejale.
Avokoluk, akʼbun ta ilel ti tukʼ akʼanojune
xchiʼuk albun jkʼoplal ta stojolal faraon
sventa xuʼ xkichʼ lokʼesel liʼe».
Pe li jpʼis-uchʼbole chʼay ta sjol.
Ta tsʼakale, jaʼ xa oy kʼusi chaʼtos labal sba
la xvaychin li faraone:
laj yil vukot bak meʼ vakax
ti la sbikʼ vukot jupʼem meʼ vakaxe
xchiʼuk laj yil jichʼil sat trigo
ti lik sbikʼik vukchoj sat trigo ti noj sate.
Pe mi junuk pale mi jaʼuk pʼijil viniketik
ta Ejipto x-albej yuʼun smelolal.
Li jpʼis-uchʼbole jaʼ to vul ta sjol li Josee
xchiʼuk ti toj pʼij ta yalbel smelolal vaychiletike.
Bat slokʼesik tal ta chukinab ta anil li Josee.
Jkʼeltik batel ta Jenesis 41:25.
Li Josee 30 xa sjabilal,
te kʼot svaʼan sba ta yeloval ajvalil.
Li Josee laj yal ti oy kʼusi xuʼ spasik
sventa mu xlajik li ta viʼnal chtale.
Li faraone toj lek laj yaʼi ti kʼu yelan la xchape
xchiʼuk li kʼusi laj yal yoʼ mu xchamike.
Jaʼ yuʼun, la stikʼ ta ajvalil ta Ejipto,
jaʼ kʼot ta xchibal ajvalil.
Vaxakib jabil echʼ sventa xtal li viʼnale.
Laj yilik viʼnal ek li yutsʼ yalal Josee,
jaʼ yuʼun laj yalbe xnichʼnabtak Jakob
ti akʼo xbat smanik tal veʼlil li ta Ejiptoe.
Li lajunvoʼ sbankilal keremotak Jakobe
batik ta Ejipto.
Pe li kʼox Benjamine te kom ta snaik.
Li lajunvoʼ sbankiltak Josee te kʼot skejan sbaik
ta stojolal; jaʼ jech kʼot ta pasel li xvayiche.
Li Josee laj yakʼ venta ti jaʼ sbankiltake,
pe li stukike muʼyuk laj yojtikinik,
yuʼun jaʼ noʼox chkʼopoj ta skʼop j-ejiptoetik
li Josee xchiʼuk la stunes jun j-etʼesej
kʼop sventa mu xakʼik venta.
Skʼan snop kʼusi tspas li Josee.
¿Mi ta van xilbajin sbankiltak
ta skoj ti tsots xa yabtele?
¿Mi ta van stak batel, mi mu van kʼusi sventa-o
xchiʼuk mi ta van snop ti mu staik-o koltaele?
¿O mi ta van xchapan skʼopik?
¿Mi jaʼ van jech tukʼ chkʼanvan kʼuchaʼal Jeovae?
¿Kʼusi van la apas ti voʼotuke?
Tskʼan tskʼel mi jelem xa sbankiltak li Josee
o mi jech-o ch-itʼixaj yoʼontonik.
Jaʼ yuʼun, la spakʼta ta jpaʼivanejetik
xchiʼuk laj yal ti jaʼ te chukul chkom li Simeone,
jaʼ to mi laj yikʼik tal li yitsʼinike.
Jkʼeltik Jenesis 42:21-24.
Li Rubene toj chopol chaʼi ti laj yilbajinik li Josee.
Pe ¿mi ta melel van sutesoj yoʼonton
li stuke xchiʼuk li xchiʼiltak ta vokʼele?
Sventa snaʼe, li Josee laj yalbe li sbankiltak
ti akʼo xbatik ta Kanan xchiʼuk ti xikʼiktal
ta Ejipto li Benjamine
¿Kʼusi van laj yal Jakob ti tskʼan
chikʼik batel ta Ejipto li Benjamine?
Jkʼeltik ta Jenesis 42:36, 37.
Jpʼel yoʼonton li Jakobe,
mi jaʼuk xakʼ batuk li Sbenjamine.
Pe kʼalal xchibal xa ox jabil slikel viʼnale,
chlaj xa batel sveʼelik xchiʼuk yutsʼ yalal li Jakobe.
¿Mi ta van xakʼ batuk Benjamin
ta Ejipto li Jakobe
sventa xbat xkuchik tal veʼlil
xchiʼuk li sbankiltake?
Jkʼeltik kʼusi chal Jenesis 43:8
kʼalal ta 10, 13 xchiʼuk 14.
Akʼo mi toj tsots echʼ stalelal
ta stojolal Jose li Judae,
li avie ta sjunul xa yoʼonton laj yal ti jaʼ chchabi
li Benjamin ti kʼanbil tajek yuʼun li stot eke.
Jaʼ yuʼun,
laj yakʼ batuk ta Ejipto xnichʼnabtak li Jakobe
xchiʼuk ti xichʼbeik batel smoton li Josee.
Jkʼeltik batel Jenesis 43:26-30.
Li Josee tskʼan tskʼel kʼu yelan yoʼonton
li sbankiltake, jaʼ yuʼun laj yakʼ ta preva.
¿Kʼuxi?
Laj yalbe mantal yaj-abteltak
ti akʼo snojesbeik xkoxtalike.
Pe laj yal mantal ti akʼo stikʼbeik
ta mukul ta xkoxtal Benjamin li skopae.
Kʼalal te xa ox kʼuk snatil batike, la stak batel
yajtuneltak li Josee sventa xbat snutsik ta be.
Kʼalal taatik ta bee, xi albatike:
«¿Kʼu yuʼun laj avelkʼanbeik tal skopa
ti pasbil ta plata li kajvalkutike?».
Li sbankiltak Josee xi laj yalik ta jamal
ti muʼyuk kʼusi chopol spasojike:
«Mi oy buchʼu yichʼoj junukal kuʼunkutike,
akʼo chamuk».
Jaʼ yuʼun, la xchajik ta kʼelel skotol li koxtaletike,
te la staik ta xkoxtal Benjamin
La svul yoʼontonik,
jaʼ yuʼun la xchʼi ta jatel skʼuʼik.
Mu xa snaʼ kʼusi tspasik,
sutik batel xchiʼuk Benjamin.
Kʼalal kʼotike, la snijan sbaik ta stojolal li Josee,
vaʼun li Judae xi laj yale:
«Li Diose laj xa svinajesbe smul li amosotake.
¡Li avi une, kajval, chi-ochkutik ta amoso!».
Li Josee laj to yakʼ ta preva xchiʼuk xi
tsots laj yale: «¡Li voʼoxuke sutanik batel.
Jaʼ noʼox chkom ta jmoso li Benjamine!».
Xi tsvul yoʼonton laj yal li Judae:
«Mi muʼyuk laj kikʼ sutel li Benjamine,
chcham li jtotkutike
xchiʼuk jech-o me la jsaʼ jmul
ta stojolal sbatel osil».
Li Judae mu xa skʼan xakʼbe yat yoʼonton
stot ta skoj ti chcham yan yuni kereme,
jaʼ yuʼun laj yal ti jaʼ chkom ta mosoil stuke.
Li Josee mu xa stsʼik chaʼi;
jkʼeltik avil kʼusi chal Jenesis 45:1-15.
Vaʼun, li Jakob xchiʼuk li 70 ta voʼ yutsʼ yalale,
batik ta naklej ta Egipto.
Te nakanatik yuʼun faraon ta yosilal Gosen.
Te van 215 jabil nakiik ta Egipto
li yutsʼ yalal Jakobe.
Jaʼ to ti kʼalal echʼ xtuchʼik tsajal nab
ti oxib xa ox miyon yepalike,
laje te kʼotik ta Albil Balumil.
Jaʼ jech tunesat yuʼun Jeova li Josee
yoʼ mu xchʼay stsʼunobal
ti bu chlik tal li Mesiase.
¿Kʼusi chakʼ jchantik
li kʼusi kʼot ta stojolal Josee?
Akʼo mi ep kʼusitik la snuptan li Josee,
laj yakʼ ta ilel tukʼil kʼanelal
ta stojolal li Jeovae.
Oy jayibuk jabil laj yil svokol,
pe muʼyuk bu te xtiʼet sjol.
Li avie,
xuʼ van mu kʼusi stakʼ xkutik
sventa mu jnuptantik prevaetik.
Pe li kʼusi stakʼ jpastike jaʼ ti mu
xkakʼ xchibajesutik li vokoliletike.
Mu me xij-ilin-o ta stojolal li Jeovae.
Yuʼun jkʼanojtik xchiʼuk jpʼel ta koʼontontik
ti muʼyuk ta jpastik li kʼusi chopol chile.
Kʼalal jel xkuxlejal li Josee,
laj yakʼ ta ilel tukʼil kʼanelal ta stojolal li yutsʼ
yalale, akʼo mi ilbaj utat yuʼun li sbankiltake.
Koliyal ti kʼu yelan tukʼ kʼanvane
kʼot ta pasel jun albil kʼop.
Kʼalal kuxi Abraan ti jaʼ snamtal mukʼtot li Josee,
laj yal Jeova bakʼin tskolta lokʼel li steklumale:
jaʼ ta 430 jabil ta mas tsʼakal.
Ati muʼyukuk laj yakʼ ta ilel tukʼil kʼanelal
ta stojolal li yutsʼ yalale,
¿kʼuxi van kʼot ta pasel jechuk
li albil kʼop taje?
Jamal xvinaj ti tskʼan ti xkakʼtik ta ilel tukʼil
kʼanelal ta stojolal kermanotaktik li Jeovae.
Jaʼ yuʼun,
mi la syayijes koʼontontik junuk ermanoe,
mu me xlik jchopol kʼoptatik
o ti jpakbetik sutele.
Jaʼ lek kakʼtik persa ti junuk koʼontontike,
yuʼun kʼanbilik yuʼun Jeova
li kermanotaktike xchiʼuk skʼan jkʼantik ek.
Li kʼusi chal Vivlia liʼe chakʼ jchantik
ti tukʼ snaʼ xkʼanvan li Jeovae.
Iktaat yuʼun yutsʼ yalal li Josee,
laj yichʼ jutbel smul xchiʼuk laj yichʼ
tikʼel ta chukel.
Pe li Jeovae te xchiʼuk-o,
laj yakʼ ta ilel tukʼil kʼanelal ta stojolal,
yuʼun tukʼ laj yakʼ sba li Josee.
Ti kʼu yelan lek la xchabie,
jaʼ jech laj yakʼ ta ilel tukʼil kʼanelal
ta stojolal j-israeletik.
Kʼalal la stunes Jose
yoʼ mu xlaj ta viʼnal li yutsʼ yalale,
jaʼ jech la xchabi ti bu chlik tal li Mesiase,
vaʼun jaʼ jech kʼot ta pasel ta yorail
ti la skolta lokʼel ta mosoil li j-israeletike.
Tspat koʼontontik taje.
Yuʼun xuʼ van xchibajesutik li yantike,
xuʼ van slabanutik,
sjutik jmultik o ti oy kʼusi xkichʼtik pasbele.
Pe mi tukʼ laj kakʼ jbatik ta stojolal Jeovae,
muʼyuk tstenutik.
Jech kʼuchaʼal muʼyuk bu xikta li Josee,
muʼyuk me chiktautik ek mi tukʼ kakʼoj jbatike.
Nopoluk me xkakʼ jbatik ta stojolal,
vaʼun jaʼ jech skʼanojutik-o.

Li Jeovae jech-o laj yakʼ ta ilel tukʼil kʼanelal