JW subtitle extractor

Joʼuushi taya suluʼu wanee pueulochon
jee anapuʼushi taya.
Aishi tapüla Maleiwa sutuma tekirajünüin
natuma na kachonniikana taya
otta kojutusü tamüin tü Bibliakat.
Oʼunapuʼushi taya
suluʼumüin tü iküleesiakat,
koleejiapuʼushi jee ekirajaapuʼushi taya
sünain tü Bibliakat.
Eepejeʼe tü kasa choʼujaakalü tamüin.
Wanaa sümaa 15 touyase
aʼwanajaaleesia tü takuwaʼipakat.
Ashaitüshi taya naaʼu wanee wunuʼu,
süshataaka nütüna chi wunuʼukai tamaa,
eewaashi taya.
Nnojorüleesia süpüla
takutuluin tatüna otta tasa’a,
shia neʼe takutulakat tanulu.
Nnojoluichipa awataain taya
jee taaʼinrüin waneirua kasa.
Wanaa sümaa 18 touyase
katsüinsü tatüna otta nnojotsü choʼujaain
tamüin wanee wayuu akaalinjaka taya.
Soʼunnaa tia, chajachi taya koleejiain
suluʼu tü universidakat
otta kepiapuʼushi taya suluʼu.
Suʼwanajaaka takuwaʼipa süchikuaʼaya,
namaashii taya wayuu
akamüjülii droga,
asülii jee jieyuuyulii,
tashataka neʼe tü nakuwaʼipakat.
Ayatapejeʼe taashajeʼerawalin
tü Bibliakat aipaʼawai,
tatüjaa aaʼuchi eein chi Maleiwakai.
Süpülapünaa tatünküin,
oʼuraajawaishi taya,
«jotteechi taya saʼaka siki
saaʼujee müin taainjala»,
ma’waishi neʼe taya süka
shiain ekirajünapuʼuin anain taya.
Teʼraajiraaka sümaa wanee majayüt,
Julie sünülia
jee kasaatka taya sümaa.
Hippie shia wanaa tamaa,
watüjaapejeʼe saaʼu wakatalaainjanain
noulia na waʼaleewainkana
süpüla paʼwayuusejiraain
waya waneepia.
Nia wachajaaka achiki Maleiwa
süka waʼwaajeein nia.
Soʼu wanee kaʼi,
chajachi taya tamüiwaʼa
sotpaʼa wanee laa
otta eesü wanee uuchi
chaa süchiiruajee.
Toʼuraajaka nümüin Maleiwa,
«aʼyataweeshii waya pümüin
shiajaʼa neʼe isain wachiki
tü sukuwaʼipainjatkat»,
tamakat nümüin.
Nüntaka tanainmüin wanee wayuu
jee nüküjaka tamüin eeinjatüin
wanee paʼaraiisü yaa mmapaʼa.
Anasü maʼin nünüiki tamüin,
taashaje’ettüjülia tü nümakat tamüin.
Shia kamalainka maʼin tamüin tü nümakat
süchiki nnojoluin jotuin wayuu saʼaka siki.
Tayaawata aaʼu süpüshuaʼa
tü nümakat tamüin.
Nuunejaain waya sünain
tü outkajawaakat,
woʼunaka waneemüin kaʼi.
Nnojorüleejaʼa motuin taaʼin tia
outkajawaakat sümaa taʼwayuuse,
alatüirü 37 juya süchikijee tia.
Kawalouleshi taya,
jotooisü tapantaloonse,
masapatsesai taya soʼu tia.
Wanaa sümaa joyotuin waya
«nülerajakajasa waya chisa
wayuu aashajaakai»,
maa müsü taaʼin.
Shiasaʼa sajaʼttapa
tü outkajawaakat,
antüshi wanainmüin
sünain nüsaküin waya
jee nuunejaain waya nipialuʼumüin.
Nnojotsü sotuin waaʼin kasain
aashajaanüin achiki sünain tü outkajawaakat,
nnojoleetpejeʼe motuin waaʼin
jamüin wasakia natuma.
Outkaja’awaishii waya waneepia
otta ekirajaashii waya sünain tü Bibliakat
nümaa chi wawala aashajaakai
tamaa sotpaʼa tü laakat.
Nnojoishii waya
aʼwanajaamaatüin wakuwaʼipa,
kamaneepejeʼe maʼin
na wawalayuukana wamüin
jee nnojoishii ashapajaain naya.
Nnojoluitpa mojuin taaʼin,
eeitpa tü anakalü atuma takuwaʼipa.
Nnojoluitpa jülüjain waaʼin
wakuwaʼipa wamüiwaʼa
eeichipa Jehová wamaa,
eeinnapa na wawalayuukana
otta aküjashii waya pütchi.
Waapüin waaʼin nümüin Jehová
jee woutiisashii waya.

¡Nnojoleerü motuin waaʼin jamuin wasakia natuma!