JW subtitle extractor

Irmons ku irmans,
Grupu Enkaregadu di Óbra
ta gostaba di agradese nhos
pa kes kontribuison ki nhos ta da di korason.
Nhos kontribuison ka sô ta poi
korason di Jeová kontenti
má tanbê ta traze glória pa se nómi.
Óras ki bu ta faze kontribuison,
algun bês dja bu pergunta:
‘Nhas kontribuison sta ta djuda
na ki prujétu i na ki atividadi?’
Na es vídiu, nu sta ben viaja
pa alguns párti di mundu
pa nu odja alguns izénplu di kuzas bon
ki sta fazedu ku bus kontribuison.
Tanbê nu ta ben odja modi ki alguns jóven
ta xinti ku kontribuison ki es ta faze.
Primeru nu ta bai pa Kósta Rika.
Kantu ki N lé kel karta di
agradesimentu di otubru di 2025,
N xinti txeu gratidon i inkorajadu di sabe
ma txeu irmons ku irmans gósi pode
lé Palavra di Deus na ses língua.
Foi la ki N da kónta ma kontribuisons sima kes di meu
ta djuda irmons ku irmans sima kes di Mosanbiki,
asi pa es pode lé Palavra di Deus na ses própi língua.
Sabe ma Traduson di Mundu Novu
gósi sta disponível na língua Tshwa
ta intxi-m di alegra i ta inkoraja-m txeu.
Kel-li djuda-m odja ma Jeová pode uza un kuza sinplis
sima kontribuison pa spadja
notísias sábi pa tudu párti di téra.
Kel-li ta dexa-m txeu kontenti pamodi
N sta ta apoia trabadju di Reinu.
Sima nos irman, talvês dja bu repara ma
tudu mês ki bu faze un kontribuison pa internet,
bu ta resebe un karta di agradesimentu.
Txeu algen ta xinti ma kes karta ta inkoraja-s
i ti es gosta di le-s na ses adorason na família.
Kes karta li sta ta djuda kes algen odja
modi ki kes kontribuison ki es ta faze
sta ta djuda pesoas na mundu interu lova Jeová.
Gósi, nu sta bai pa Kamarons.
N krê djuda organizason di Jeová
ku dinheru ki nha mai ku nha pai ta da-m
pamodi N ta ama Jeová
i se organizason txeu.
Enbóra ami é mininu,
N krê djuda na trabadju ki sta ta fazedu.
Óras ki nha pai ku nha mai da-m algun dinheru,
N ta tra un párti di kel dinheru
pa N faze kontribuison pa
óbra na mundu interu.
N ta poi kel dinheru na kaxa di kontribuison
na Salon di Reinu i alvês na asenbleia.
Kantu N vizita Betel
i N odja kel novu muzeu,
N fika txeu kontenti.
N intende ma kel muzeu li fazedu
grasas-a kes kontribuison sima di meu.
N prende ma nhas kontribuison ten un obijetivu.
Odja tudu kes kuza na es muzeu
ki ta konta stória di trabadju di pregason
na nos tiritóriu ta bira nha fé más fórti.
Ka ta inporta bu idadi,
bu pode xinti kel mésmu alegria.
Óras ki bu ta vizita ô bu ta obi sobri
kes trabadju bon ki bu filial sta ta faze,
bu ta para pa pensa ma bus kontribuison
djuda pa faze kes trabadju?
Pa últimu, nu sta bai pa Tailándia.
Kantu N lé kel artigu ki ta splika
modi ki nos kontribuison ta uzadu pa faze kes drama
Stória di Vida i trabadju di pregason di Jizus,
N fika adimiradu.
N repara ma kel-li é un prujétu grandi
ki ta iziji txeu sforsu, ténpu i dinheru.
I tanbê, irmons ten ki faze planu,
pripara kuzas ku kuidadu
asi pa tudu algen pode trabadja kontenti djuntu.
N xinti filís i gratu pamodi Jeová da-nu kes drama
sobri Stória di vida i trabadju di pregason di Jizus
ki ta djuda-nu intende kel amizadi bunitu
ki ten entri Jeová i Jizus.
I más inportanti, kel-li sta ta djuda-m krê ser
más amigu di Jeová i di Jizus tanbê.
Bu sta ku vontadi di odja kes novu drama
sobri Vida i trabadju di pregason di Jizus?
Bus kontribuison ta djuda faze
kes vídiu ki ta fortalese nos fé.
Tanbê es ta djuda pa faze kes muzeu di Betel,
traduson di Bíblia i txeu otus trabadju.
Bu ta gostaba di sabe más sobri
kes prujétu li i otus atividadi?
Pa faze kel-li entra na jw.org.
Bai na Bibliotéka i klika na artigus di jw.org.
I dipôs, klika na “Modi ki ta uzadu bus kontribuison.”
I bu ta atxa txeu artigu ki ta splika
modi ki kontribuison sta uzadu na mundu interu.
Bu ka ta atxa ma é un priviléjiu apoia
kes prujétu ki ta traze glória pa nómi di Jeová?
Rei Davidi xinti si kantu el
faze kontribuison pa faze ténplu.
Odja kuzê ki el fla na 1 Krónikas 29:14:
“Má ken ki é mi i kenha ki é nha povu,
pa nu faze ofértas di livri vontadi sima kes-li?
Pamodi tudu kuza ta ben di bo,
i nos sô nu ta da-u kes kuza ki ben di bu mô.”
Nton, enbóra tudu rikéza é di Jeová,
el ta da-nu priviléjiu di faze kontribuisons
pa trabadju ki sta fazedu na mundu interu.
El ta da txeu valor pa nos
kontribuison di livri vontadi.
Pa el es é mutu más di ki sô dinheru.
É un manera di mostra-l amor.
Pur isu, es ta faze párti di nos adorason
i es ta traze glória pa nos Deus.
Más un bês, Grupu Enkaregadu
di Óbra krê fla-u, obrigadu.
I nos tudu nu ta agradese Jeová
pa priviléjiu ki nu ten
di da Kel algen ki ta da-nu tudu kuza.

Óras ki nu ta da nu sta lova Jeová