JW subtitle extractor

Fampidiran̈a bokin 1 Mpanjaka.
Tamy voanalohany boky araiky fo
1 Mpanjaka ndreky 2 Mpanjaka.
Fa tafara tatỳ izy natao boky aroe.
Azo inoan̈a fa Jeremia nanoratra
bokiny 1 Mpanjaka io.
Bokiny 1 Mpanjaka io mbala
tohiny 2 Samoela.
Izio mitantara raha nandalo
kadiriny 129 taon̈o tiô,
nanomboko tamy faramparany
andra niain̈any Davida Panjaka,
firaka tamy taon̈o 911 T.K.,
tamy nifatesany Panjaka Josafata.
Fizaran̈a voanalohany amy boky io mitantara fa
tafarany nifatesany Panjaka Davida,
niadan̈a vahoakany Israely
Solomona koa fa nitondra.
Fa amy fizaran̈a faharoe ndraiky mivolan̈a
fa nanjaka fanompoantsampy,
avio nizara aroe fanjakan̈any Israely.
Koran̈iny toko voanalohany
fa Solomona voahosotro panjaka.
Koran̈iny toko faha-3,
Jehovah nitahy Panjaka Solomona
ke nan̈amia izy fahendrena tsisy ambaka izy,
avio fanan̈ana ndreky voninahitry.
Koran̈iny toko faha-4 fa
tamy Solomona nitondra,
niadan̈a vahoakany Zan̈ahary.
Toko faha-5 ziska faha-8 mikoran̈a
momba fan̈oren̈ana tempoly,
ndreky fitaovan̈a jiaby tan̈atinizio tao,
avio vavakany nitokanan̈a tempoly
nataony Solomona.
Koran̈iny toko faha-10,
Panjakavaviny Sheba naharen̈y
raha momba Solomona Panjaka,
ke izy nan̈ano dia lavitry nandeha
ta Jerosalema handeha hizaha izy.
Panjakavaviny Sheba koa fa nahita
fahendrena ndreky fiadanan̈a
nisy tamy fanjakan̈any Solomona, nivolan̈iny:
“Tsendriky antsasany nambaranolo zaho in̈y!”
Koran̈iny toko faha-11,
Solomona tsy nan̈araka volan̈a Jehovah
ke tia man̈angy maro hafa firenena.
Navadikindro man̈angy panompo sampy
aby io tsihelihely fôny Solomona,
ke izy nanjary nanompo sampy,
ke nivavaka tamy Zan̈ahary
karaha ataony Astarta ndreky Milkoma.
Solomona koa fa nanjaka tan̈atiny 40 taon̈o,
izy naty, ke Rehoboama zanany
nanjaka nandimby izy.
Amy toko faha-12 Rehoboama nivolan̈a fa
handeha ataony marereny taloha
asandro vahoaka aby io.
Nisy foko folo tsy nan̈eky zen̈y
ke Jeroboama nataondro panjakandro.
Rehoboama baka tiô nilefa niaraka
tamy fokony Joda ndreky Benjamina.
Jeroboama nanangana fanompoantsampy,
ke nanompo zanakaomby volamena
han̈akivian̈a vahoakanany,
baka iro tsy hanompo Jehovah a Jerosalema.
Nahazo vahan̈a mare fanompoantsampy
tamy fanjakan̈a tavaratra,
nanjary nijaly vahoaka,
fitondrasan̈a nisapotopoto,
avio nanajima famonoan̈a aomby.
Amy toko faha-14 ndreky 15,
Rehoboama avio Abia panjaka nandimby izy,
nampanjaka fanompoantsampy
tamy fanjakan̈a tatsimo.
Asa mba hainao?
Izikoa fa nafaka 33 taon̈o tafarany
nitokan̈any Solomona tempoly in̈y,
nambelany Jehovah Farao Sisaka
nangala raha valera jiaby tan̈atinizio tao.
Zen̈y nan̈aboahany Jehovah fa
tsy tran̈o maventy be io raha
mamparavoravo izy fa
fivavahan̈a madio aminany.
Amy toko faha-15,
Asa nanjary panjaka ta Jerosalema.
Olo nan̈ano ny marin̈y fahitany Jehovah izy.
Josafata zanany lelahy nanjaka nandimby izy.
Nan̈araka toetry tsarany babany io koa izy.
Amy toko faha-16 mitantara iro
panjaka maro ratsy fan̈ahy,
tamy fanjakan̈a tavaratra.
An̈isany panjaka ratsy fan̈ahy io Ahaba,
nanambady Jezebela panjakavavy panompo sampy.
Iro roe fivadiany nampiditry
fanompoan̈a Bala tamy fanjakan̈a io.
Amy toko faha-18,
Elia paminany nangataka han̈anaovan̈a
raha tamy Bongo Karmela,
ahitan̈a azovy ankitin̈y ten̈a Zan̈ahary,
Jehovah sa Bala.
Naboakany Jehovah tsarabe taminio
fa izy ten̈a Zan̈ahary.
Amy toko faha-19,
Elia nilefa baka tsy maty,
fotony Jezebela nivolan̈a fa andeha hamono izy.
Jehovah niboaka taminy Elia
tamy Bongo Horeba tan̈y.
Nivolan̈a moramora Jehovah nankahery izy.
Mbala namiany asa ataony koa Elia baka tiô.
Amy toko farany amy boky io,
tsy narehany Ahaba fampitandremany
Mikaia paminany,
fa izy loso niady tamy Syria fo.
Vokany amy zay,
naty taminy ady io tan̈y Ahaba.
Ahazia zanany lelahy amy zay
nanjaka nandimby izy tan Israely.
Tafaranizin̈y amy zay,
naty koa Josafata,
ke Jorama zanany nanjaka nandimby izy ta Joda tan̈y.
Anao koa mamaky bokiny 1 Mpanjaka,
alà onon̈o fa jaly fo raha azo
baka amy fanompoan̈a sampy io.
Avio zahava fa hiadan̈a ndreky ho sambatra
olo koa man̈araka fivavahan̈a marin̈y.
Zahava koa fa ten̈a mankahery
mandilatra fahendrenany Solomona,
fahendrena anan̈any Jesosy Kristy,
Panjakany Fanjakan̈any Zan̈ahary,
sady man̈ano ny marin̈y io.

Fampidiran̈a Bokiny 1 Mpanjaka