JW subtitle extractor

Yi naa bed’eabʉchuta Daniel ʉ̃rʉ.
Danielba bʉsi naʉ̃ librora Babiloniane.
Edesida Babilonia ena, kʉ̃rãbasi eda
Juda prinsipebaside, ãba nok’ora wũãwũãrabawara.
Tẽãne, Danielra trajasi babilonia
nok’orabawara akʉza, medopersabawara.
Danielbara iyi librora nebʉra asi poaga 618de
dayirã ewari nãã, iyi kʉ̃rãbaside.
Maa bʉsi poaga 536de.
Abdiasta, Ezequielta akʉza Jeremiata
Daniel ewaridebasi.
Panasi ewari bed’ea zroma berabarinʉmʉne
Israelde maʉ̃ ewaride Jeruzalen
pʉwʉrʉta makenasida.
Danielbara ũdusi Medopersiaba
Babilonia makena jirbʉta
Daizeze ode wiñapanʉrãta
jẽda zesida Jeruzalen ena.
Mamina, iyira edabaẽbasi Jeruzalen ena
wãbʉrʉbawararã, aukara zõrã basikĩra bʉbaera.
Daniel librora 12 kapitulo bʉ.
Kapitulo 1neba 6bayedara arare arare
jarabʉ Daniel badata yi neũduk’awuara ũbeabʉ ʉ̃rʉ.
kapitulo 7 deba 12 bayedara jarabʉ k’ãĩmo karade
ũdudata akʉza zok’aichude Daizezeba diadata.
Kapitulo 1, 3, 6 ba jarabʉ sãwũã kẽrẽpa basita
Daniel zʉbʉria berabari nʉmaside akʉza yi
neũduk’awuara hebreoraba aripe osidata.
Naʉ̃ra kʉ̃rãrabara koẽbasi doẽbasi
ne k’ãrẽ Daizeze dabʉ nãã zeriẽãra.
Maʉ̃ tẽã jʉ̃nẽãn e, Daniel neũduk’awuara
ũbeapanasi Sadra, Mesa, akʉza Abenego,
ãyira beikĩrãpanasi tʉbʉ pʉreade
Babiloniara santo’a yiw’idiẽbaita.
Poaga bio berabarida tẽã, leyta diasida
baldua yiwid’iẽmarẽã nok’o Darioẽbʉrʉ,
Danielra yiwid’ibasi Jeowa’a, maʉ̃ k’area,
pozode eibalbʉesida imama edabʉmae.
Danielta akʉza yi neũduk’awuarabawara kẽrẽpabasi
Jeowa nãã zʉbʉriaberabariside,
akʉza iya k’arebasi.
Kapitulo 2 akʉza 4 dera jarabʉ
Jeowabara k’arebasi Danielba
Nabucodonosorba k’ãĩmo karadata jaramarẽã.
Naʉ̃ k’ãĩmo kararã Daizezeba
k’arebasi akʉza maʉ̃ra propesiabasi.
Nãã ũdusi estatua zromata
maʉ̃bara metalta kĩrãtana erbasi.
Estatuabara jarakĩrãbʉ jõma
pʉwʉrʉ zromara zareapanʉta
k’arebasebʉdata akʉza
yõsebʉdata Daizeze pʉwʉrʉʉ̃me.
Propesiabara ũdubibʉ jõma
pʉwʉrʉ zromara jõbitaeta
akʉza ũdubisi Daizeze Nok’obʉrʉ
zok’aita ẽbẽra ʉ̃rʉ.
Nabucodonosorba ũdusi bakuru
aba bajãinʉ drasoa edaunʉmʉta.
Bakurura tʉsida, bakuru tʉdama
«jiorroba tãjʉ̃sida» siete ewari eda.
Naʉ̃bara jarakĩrãbʉ nok’o aba jõbita.
Mamina, bakuru tʉmara iduaribisi
akʉza nok’ora jẽda zeita.
Kapitulo 5 bara jarabʉ juwa abaʉba bʉ bʉsawasita
parede nok’o babilonia Belsasar nekonʉmʉ deda.
Danielbara jarasi Belsasar’a
Daizeze Bed’eabara Babiloniara
medo akʉza persaraba makenaita.
Babiloniara maʉ̃ diamasi baesi.
¿K’awuabasika Danielbara libro ẽzadra
bade bʉsita iyi bed’ea arameode?
Arameo bed’ea kikibaribasi akʉza jõmaʉ̃ba
bed’eapanasi hebreo alpabeto kĩrãk’abasibaera.
Kapitulo 7ba Akʉza 8ba jarabʉ
Danielba ũdudata nedʉwʉrʉ zromarata
maʉ̃ba jarakĩrãbasi beita Babiloniata,
Medopersiata, Gresiata akʉza Romata.
Adewara, Jeowabara diabʉ yi Warra Nok’o
jõkata maʉ̃ba makenamarẽã jõma ẽbẽra nok’orarã.
Kapitulo 9dera jarabʉ Danielbara iyikʉza
k’awuasi Daizeze Bed’eata estudiabʉdeba
Judiora ẽdrʉira arak’aitabata.
Maʉ̃ tẽãne, Daniel yiwid’ibʉ eda, angel
aba yi ũdubi k’ãrãpe jara ũrĩbisi Mesia ʉ̃rʉ.
Kapitulo 10deba 12 bayeda jarabʉ angel
abaʉba akʉza Daniel jẽda akʉsedata,
zarea diape akʉza ũdubisi ʉ̃rabʉrʉ k’ãrẽ zei ʉ̃rʉ.
Naʉ̃ propesiadera jara ũrĩbibʉ nok’o zroma
ũme yõpanʉta k’aita audre yi zroma k’awuadaita.
Naʉ̃ propesiara nʉmañi «naʉ̃ ewari jõñi ena».
Angelbara jarasi Daniel’a Daizezebara iyi
bia akʉbʉta akʉza jarasi, beimina,
iyira jẽda piradrʉita ẽjʉ̃ã biade.
Naʉ̃ libro akʉbʉrʉde, krĩchara Jeowaba
k’ãrẽaba kãgabasita Daneilra
kerepabada k’area, akʉza akʉra Jeowaba
sãwũã zok’abʉta nok’ora iya krĩchabʉta
aripe berabarimarẽã akʉza sãwũã
yi Warra diabʉta Nok’o jõkata
maʉ̃ba makenamarẽã jõma ẽbẽra nok’orarã.