JW subtitle extractor

Yi naa bed’eabʉchuta Jonás ʉ̃rʉ.
Jeowa bara zok’a bʉesi Jonasta
pʉwʉrʉ Ninibema bed’ea jara marẽã.
Jeroboan 2ba zok’a basi Israelde
Jonasra propeta basi.
Libro iyi trʉ̃ abʉra ma bʉsi poaga
844de, dayirã ewari nãã.
Maʉ̃ra bera barisi sien poaga asirioraba
Israel ãyi ne zok’a babi nabeda,
akʉza dosiento poaga bera barisi Nahumba
Nínive jõma makiniñi jarai nabeda.
Jonasra basi Amos ewaride,
maʉ̃ra propeta basi Israel wãdiare,
akʉza Joel propeta baside Judade.
Jonás libro bara 4 kapitulo erbʉ.
Kapitulo 1-2 bayeda jarabʉ,
Jeowaba jarasi Jonasra wã marẽã Ninibema.
Jonasra wã kĩrã ẽ basi, iyira mirʉ
wãsi jãba zromane Tarsi eda wãbʉde.
Maʉ̃ k’area Jeowa bara puzade zebisi nagʉra.
Jonas bara k’awuasi yi k’area mawũã dogota,
maʉ̃ k’area jarabʉ iyita doi balbʉeda marẽa.
Maʉ̃ mawũã obʉda tẽã, taʉsi.
Jeowa bara zok’a bʉesi, beda
zromata Jonás mĩbʉe marẽã.
Beda biteda bʉde Jonasra
yiwid’isi Jeowa’a, iya ũrĩsi.
Maʉ̃ tẽã Daizeze bara bedara drʉa wuebisi.
¿K’awua basika? Jesu bara jarasi iyi beita,
mamina ewari ũbea ba bʉrʉde jẽda piradrʉita.
Maʉ̃ bara jara kĩra basi «propeta Jonás
bera baridata», beda bitedaʉba ẽdrʉ bidata.
Kapitulo 3 dera jarabʉ, Jonas bara ũrĩsita,
mõbe jara wãsita Ninibera pʉwʉrʉra jõma makinita.
Jonasba jara jũẽna tẽã, ninibera bara ũrĩsi,
maʉ̃ba Jeowa bara so zʉbʉria akʉsi.
Kapitulo 4 dera jara ũrĩ bibʉ, Jonás sobiai
k’aʉde ninibitara k’area, iyira kirʉsi.
Jonás bara enaʉ̃ bari deta osi, mamaʉ̃ba
jũã basi k’ãrẽ bera barita.
Jeowa bara waribisi jibadora,
maʉ̃ are mako bisi karagamia,
jara diaita so zʉbʉria akʉi barata.
Jonás libro akʉbʉrʉde, bi’ia akʉra Jonasba
ũrĩnata aripe odata iya’a zok’ada peadara;
Jeowaba wãrĩnu kãga ũdu bidata,
so zʉbʉria akʉdata ninibitarata,
krĩchara Jesuba jarada ʉ̃rʉ Jonás nebʉra
deba iyi bei kãrãpe jẽda piradrʉita,
babita ewari jõmaʉ̃nẽ Daizeze Nok’o edre.