JW subtitle extractor

Fampilira Bokini-Romanina

Video Other languages Share text Share link Show times

Fampilira bokini-Romanina.
Romanina ty voalohany amy taratasy 21
amy Soratsy Grika Kristiana ao reo.
Apostoly Paoly ro nanoratsy
ty 14 amy taratasy reo,
anatini-zay ty Romanina.
Mety ho tamy tao 52 Paoly ro
nanomboky nanao ty lia misionera fahatelo.
Tamy Paoly ta Korinto, tamy tao 56 any,
ro nanoratsy ho ahi-ty Kristiana ta Roma any.
Mbo tsy nitsidiky ani-tanà io ie tamy zay.
Misy toko 16 ty taratasy ho ani-Romanina.
Amy toko voalohany ao Paoly, miresaky
ty faniriany hitsidiky ty Kristiana a Roma any
amy zay mba hisiani-fifampahereza.
Nanazava koa ie fa tsy azo alà tsiny
ty fandaisam-bata ratin’olo amy tontolo toy eto,
satria ty toetsi-Ndranahary tsy hita maso
le hita mazava amy ty raha niforoniny.
Fa nihainao va?
Tertio mpitan-tsoratsiny ro
nampanoratini-Paoly ani-taratasy toy.
Mety ho Foiby anabavy tsy nivaliky
na ty olo niaraky aminy
ro nampandesiny ani-taratasy io a Roma any.
Amy toko faha-2 ao, le hamafisini-Paoly
fa tsy manavakavaky Ndranahary.
Fitsipiky mitovy avao ro hitsarà
ty Jiosy noho ty hafa firenena.
Manazava Paoly amy toko faha-3 noho faha-4 ao
fa ambarani-Jehovah ho marina
ty Jiosy noho ty Grika lafa manam-pinoa.
Nampiasa ty tantarani-Abrahama ie
mba hanazavà ani-zay.
Tamy fotoa nahavelo ani-Abrahama,
le mbo tsy namea ani-Mosesy ty Lalàna,
sady mbo tsy nanao soro ty ainy Jesosy.
Fe nirambesi-Ndranahary ho anatini-
olo marina Abrahama satria nana finoa niavaky.
Amy toko faha-5 noho faha-6 ao Paoly
mitantara fa nanota tamy Ndranahary Adama,
ka nanjary nandova ota noho fahafatesa ty olo iaby.
Ty finoa ani-Jesosy noho ty soro
nataony avao ro hahazoa fahafaha.
Resahini-Paoly amy toko faha-7
noho faha-8 ao hoe
manino ty Lalànani-Mosesy
ro nampiseho ty atao hoe fahotà,
le manino ty Kristiana ro
tsy ambanini-Lalàna io sasy.
Manazava Paoly amy toko faha-9 noho 10 ao fa
hanjary anaki-Ndranahary ara-panahy
ze manam-pinoa,
ndre ino ndre ino firenena niaviany.
Amy toko faha-11 ao Paoly mampiasa
ohatsy mikasiky fambolea hazo oliva.
Nampitovizy amy sampany nitampahy rey
ty Jiosy nandà ty Mesia.
Nisy sampany baka amy aviavin’ala,
manondro ani-Kristiana tsy Jiosy rey,
natao grefy hisolo ty pilasin-drozy.
Tsy maintsy miambany noho
mampiseho finoa ani-Jesosy
ze ta ho tafiaraky amy hazo io.
Amy toko faha-12 noho 13,
le nampirisiky ani-Kristiana reo Paoly
mba hilongo amin’olo iaby,
mba hifankatea, noho hanaja
ty manam-pahefà mpanday.
Amy toko faha-14 noho 15 ao
misy torohevitsy ho ahi-ty Kristiana
mba tsy hitsara ty hafa fa hanoha ani-ze malemy.
Amy toko faha-16 ao, le nitamperini-Paoly ty taratasiny
ka nanao safà fampahereza noho firarian-tsoa ie,
le nanono anaran’olo 26.
Lafa mamaky ty Safà-Ndranahary
amy Romanina ao iha le henteo hoe
tsy manavakavaky Ndranahary
lafa mifandramby amin’olo iaby,
manino ty Kristiana ro tokony hilongo amin’olo,
le manino tsika ro tsy ho afaky
amy ota noho fahafatesa
laha tsy maneho finoa ani-Jesosy,
azy Mpanjakani-Fanjakà-Ndranahary iny.
.