JW subtitle extractor

Le faatomuaga o le tusi o 1 Korinito.
Na tusi atu e le aposetolo o Paulo lenei tusi i Kerisiano i le aai pisi ma to‘atele ai tagata eseese,
o Korinito.
Na nofo Paulo i Korinito a o alu lana malaga faamisionare lona lua,
ma fesoasoani e faavae se faapotopotoga i inā.
I lana malaga faamisionare lona tolu a o iai i Efeso,
na maua ai e Paulo se tusi ma ni tala lē lelei e faatatau i le faapotopotoga i Korinito.
Pe tusa o le 55 T.A.,
na tusi atu ai Paulo i Kerisiano i Korinito e faatatau i na mataupu.
E 16 mataupu o le tusi o 1 Korinito.
I le mataupu 1 i le 4,
na faasa‘o ai e Paulo manatu fevaevaea‘i o Kerisiano i Korinito,
ma faalaeiau ia autasi.
Na faapea atu Paulo e lē tāua po o ai lē e totō pe faasūsū,
auā o le Atua na te faatupuina.
I le mataupu e 5 i le 6,
na faailoa atu ai e Paulo le matuiā o amioga lē mamā taufeusuaʻiga.
Na iai se tagata fai mea sesē e lē salamō iā i latou,
na tatau ona faate‘a ese ina ia puipuia ai le faapotopotoga,
ma na fautuaina ia sosola ese mai i amioga lē mamā tau feusuaʻiga.
I le mataupu e 7,
o loo iai fautuaga paleni e faatatau i le nofofua ma le faaipoipo.
I le 8 i le 10,
tatou te a‘oa‘oina ai o le alofa i isi e tatou te lē faia ai nisi o mea e tatou te manana‘o i ai,
ina ia lē tausuai ai isi pe taofia ai tagata mai le taliaina o le tala lelei.
E te silafia?
E ta‘ilua tausaga ma faia taaloga i Isthmius e lata i Korinito.
Ona na masani tagata Korinito i na taaloga,
na faaaogā ai e Paulo le faata‘ita‘iga i le tamo‘e i se tuuga,
e fesoasoani ai iā i latou ia iloa le tāua o le faamaoni ma le tumau.
I le mataupu e 11,
na avatu ai e Paulo faatonuga e faatatau i le Talisuaga Afiafi a le Alii.
I le mataupu e 12,
na faatusa ai e Paulo le faapotopotoga i itutino o le tagata,
e iloa ai le tāua o sui ta‘itasi.
E fiafia Ieova pe a tatou galulue faatasi ma le autasi.
Ua faamatala i le mataupu e 13 le mea e uiga i ai le alofa ma le mea e lē uiga i ai.
I le mataupu e 14,
o loo faamatala ai e tatau ona maopoopo ma filemu sauniga a faapotopotoga.
E maua i le mataupu e 15 faamaoniga e moni le faamoemoe o le toetū.
Na ta‘ua e Paulo le auala ua faataunuuina ai e le toetū o Iesu valoaga,
ma molimau na vāaitino i ai,
ma e mafai ona manumalo mai i le agasala ma le oti e ala i le togiola a Iesu Keriso.
I le mataupu e 16,
na avatu ai e Paulo faatonuga i le aoaoina o tupe mo Kerisiano e lē tagolima i Ierusalema.
A o e faitau i le 1 Korinito,
ia mātau le tāua i Kerisiano moni ona autasi pea,
le tatau i faapotopotoga ona tausia tapulaa tau amio a Ieova,
ma le tāua o le talitonu i le toetū o Iesu
ina ia maua ai faamanuiaga o le Malo.

Faatomuaga o le Tusi o 1 Korinito