JW subtitle extractor

Le faatomuaga o le tusi o 2 Korinito.
Na tusia e Paulo lana tusi faagaeeina lona 2 i Korinito,
i ni nai masina talu ona maua e le faapotopotoga lana tusi muamua.
Na auina atu Tito i Korinito,
e fesoasoani i le faamaopoopoina o foaʻi mo uso i Iutaia,
ma atonu foʻi ina ia vaai po o le ā se latou tali mai i le tusi muamua a Paulo.
Ina ua tuua e Tito le aai o Korinito,
na malaga atu e feiloaʻi ma Paulo.
Talu ai na ia aumaia se lipoti lelei,
na fiafia Paulo ma toe tusi atu i Kerisiano i Korinito.
E 13 mataupu o le 2 Korinito.
I le mataupu 1,
na taʻua ai e Paulo Ieova o “le Tamā o le alofa mutimutivale,
ma le Atua o faamāfanafanaga uma,
o lē na te faamāfanafanaina i tatou i o tatou puapuaga uma.”
I le mataupu e 2,
na faamautinoa atu ai e Paulo lona alofa iā i latou,
ma faamanatu atu le a‘oa‘iga malosi na avatu i lana tusi muamua.
O le tagata fai mea sesē lea na faateʻaina mai i le faapotopotoga,
ua suia ona ala ma e tatau ona faamagalo ma toe talia o ia.
I le mataupu e 3 na tusi Paulo,
e māfua ona tatou agavaa o ni auauna,
ona o le Atua.
I le mataupu e 4,
o loo faamatala ai la tatou faiva o se “ʻoa i ipu omea.”
E ui o i tatou o ni ipu omea e lē lelei atoatoa,
ae o le feʻau o loo tatou talaʻia e mafai ona tatou maua ai le ola e faavavau,
faapea i latou e faalogo mai.
I le mataupu e 5,
na faapea mai Paulo:
“Ua faamalosia i matou ona o le alofa o le Keriso.”
E lē mafai ona tatou talia le alofa silisili o Keriso pe a lē uuna‘ia i tatou e ola mo ia.
O lona alofa e uunaʻia ai i tatou e faaaʻoaʻo iā te ia.
I le mataupu e 6 o loo faamatala ai,
o le faifaimea faatasi ma ē e lē talitonu
ua avea ai ma ē e amo faalēgatasi.
E mautinoa,
e iʻu ina mou atu ai le faatuatua o se Kerisiano.
I le mataupu e 7,
o loo faaeseese mai ai le faanoanoa faale-Atua
ma le faanoanoa o le lalolagi.
E lagona le faanoanoa faale-Atua pe a vaai se tasi i se mea sesē na fai,
o se agasala i le Atua.
E uunaʻia ai o ia e saʻili mo le faamagaloga ma liliu ese mai i lona ala sesē.
E ese mai ai le faanoanoa o le lalolagi.
E ui e faanoanoa ona ua faailoa lana mea sesē,
ae e leai sona faanaunauga e saʻili le faamagaloga a le Atua.
I le mataupu e 8 ma le 9,
na faalaeiau ai e Paulo Kerisiano i Korinito ia mulimuli i le faiva o le foaʻi atu,
ina ia fesoasoani i uso i Iutaia.
E te silafia?
Na faaaogā e Paulo le upu Eleni e tasi mo le “faiva”
e faamatala ai le galuega talaʻi ma le aʻoaʻo atu,
faapea le faiva o le foaʻi atu.
O le foaʻi atu o se vaega o le auaunaga paia a se Kerisiano.
I le mataupu e 10 i le 13,
o loo faamatala ai aafiaga leaga o aposetolo pepelo ma a latou aʻoaʻoga.
Na faamanatu atu e Paulo i le faapotopotoga,
e mafai e le upu moni o le Tusi Paia ona lepetia mea “ua mātua mautū” e aofia ai a‘oa‘oga sesē,
o faiga ma amioga o loo atagia mai ai le poto o tagata lē lelei atoatoa.
A o e faitau i le 2 Korinito,
mātau le auala na faamalosia ma faatumau ai e Ieova ana auauna,
faapefea i le salamō moni ona ta‘ita‘ia atu ai i le faauōga ma le Atua,
ma le auala e faalauiloa atu ai e tagata faatauvaa le tala lelei o le Malo o le Atua.

Faatomuaga o le Tusi o 2 Korinito