JW subtitle extractor

Informasons sobri livru di Gálatas
Apóstlu Polu skrebe kel karta li
talvês duránti ô dipôs
di se sugundu viaji misionáriu.
El staba na Korintu ô na Antiokia di Síria kantu el skrebe-l.
Nbóra el ta uzaba un sekretáriu pa skrebe se kartas,
é própi Polu ki skrebe kel karta pa irmons na Galásia.
Gálatas skrebedu pa vólta di anus 50 ti 52 D.J.
Bu sabia ma, Galásia éra un pruvínsia di Roma
ki ta fikaba na meiu di kel tiritóriu
ki oji é konxedu pa Ázia Menór?
Kes kongregason na Galásia ki resebe karta di Polu,
talvês ta inkluiba kes na Antiokia di Pizídia, Ikóniu, Listra i Derbi.
Alguns di kes instrutor falsu staba ta inxina
ma kristons devia sigiba Lei di Muizes.
Pur isu, Polu uza se karta pa djuda
kes kriston ntende ma kel-la ka éra verdadi.
Livru di Gálatas ten 6 kapítlu.
Na kapítlu 1
Polu ta konta ma el sai di relijion di judeus i el bira kriston.
El lenbra kes kriston na Galásia ma kuzas ki el inxina-s ben di Jizus Kristu,
pur isu éra txeu inportanti pa es sigiba kes orientason.
Na kapítlus 2 i 3
Polu splika ma kes ‘óbra di lei’ ka ta pode bira un algen justu.
El fla ma Lei é sima ‘un algen ki ta toma kónta’ di un mininu
i ki ta leba pesoas pa Kristu.
I kuzê ki ta bira un algen justu é fé na Jizus.
Polu mostra ma kel disendenti di Abraon ki prometedu
é Jizus Kristu i tudu kes ki ta erda Reinu djuntu ku el.
Na kapítlus 4 ti 6
Polu aviza kes algen na Galásia
ma es ta koreba risku di bira skravus di ensinus ki ómis inventa.
Na kapítlu 4
Polu konta un stória undi el uza izénplu di Agar ku Sara
i ses fidju, Ismael i Izaki.
Agar ku Ismael ta reprizenta Jiruzalen na Téra
i ses fidjus ô sidadons, ki bira skravus di Lei di Muizes.
Sara ku Izaki ta reprizenta ‘Jiruzalen di riba’,
kel párti di organizason di Jeová ki sta na Séu,
i se fidjus skodjedu ku spritu santu ki ka é skravus di Lei, má es é livri.
Má Polu aviza ma kel liberdadi
ka debe uzadu sima un diskulpa pa faze kuzas mariadu.
Polu mostra diferénsa entri óbras di karni i frutu di spritu di Deus,
i el inxina ma nu ta kodje kel ki nu símia.
Sima bu ta ba ta lé Gálatas,
repara modi ki fé é úniku manera di un kriston txomadu justu,
modi ki kes ki ta mostra frutu di spritu di Deus ta ten bensons,
i modi ki el ta mostra ma Kristu i kes ki ta ba governa ku el na se Reinu
é kel disendenti di Abraon ki prometedu.

Informasons sobri Gálatas