JW subtitle extractor

Le faatomuaga o le tusi o Eperu.
Na tusia e Paulo pe ā o le 61 T.A.,
i se taimi a o leʻi faasaʻoloto
pe ua uma foʻi ona faasaʻoloto mai i se fale na saisaitia ai i Roma.
Na tusia faapitoa lenei tusi mo Kerisiano Eperu na nonofo i Iutaia.
O le toʻatele ua leva ona avea ma Kerisiano,
ae o nisi na avea pea o ni pepe faaleagaga,
e tatau i ai le suāsusu ae lē o mea‘ai aano.
Na lamatia ai lo latou faatuatua,
ona o osofaʻiga mai i taʻitaʻi lotu Iutaia
ma ē na lagolagoina i latou.
Atonu na finau ane ē na tetee i Kerisiano e faapea,
e leai ni faamaoniga manino o le latou tapua‘iga.
Ae peitaʻi,
na iai i Iutaia se malumalu matagofie,
faiva faaositaulaga,
taulaga i manu,
le Tulafono faa-Mose,
ma le talafaasolopito na amata mai iā Aperaamo.
Na tusi atu Paulo i Kerisiano i Eperu
e faamalosia lo latou faatuatua i le faatulagaga e sili atu i le lagi,
lea e autū atu iā Keriso.
O lenei faatulagaga ua sili atu ai le tapuaʻiga faa-Kerisiano
nai lo Isaraelu faaletino.
Na fesoasoani foʻi lenei tusi i ē na tausia pea le Tulafono faa-Mose.
E 13 mataupu o le tusi o Eperu.
I le mataupu 1 e oo i le 3,
o loo faamatalaina ai le tulaga maualuga o Iesu.
E sili atu o ia i agelu ma Mose.
I le mataupu e 4 e oo i le 10,
ua faamatala ai Iesu o se Ositaulaga Sili i le lagi,
e sili atu i ositaulaga o Iutaia na auauna i le malumalu.
I le lē pei o i latou,
o Iesu e lelei atoatoa ma e leai se agasala.
Na ofo atu e ositaulaga sili taulaga i aso taʻitasi mo agasala.
Na latou ofo atu taulaga i manu
lea e gata mai lona aogā.
Na ulu atu Keriso i le lagi ma tuuina atu i le Atua le tāua o lona ola lelei atoatoa o se togiola,
ma e faatasi lava ona fai.
Na saunia ai se faavae mo se feagaiga fou,
lea e sili atu i lo le feagaiga na avea ai Mose ma puluvaga.
E te silafia?
O loo taʻua i le Eperu 9:9:
“O lenei fale‘ie o le faatusa.”
O loo faasino atu Paulo i le faleʻie lea na faia e Mose.
O tapuaʻiga ma taulaga i manu na faia i lenā faleʻie,
e leʻi faamagaloina atoatoa ai agasala.
O le “fale‘ie e le‘i faia e lima,”
o le faatulagaga lea mo le tapuaʻiga iā Ieova
e faavae i le taulaga togiola a Keriso,
ua saunia ai mea e tatou te manaʻomia
ina ia maua ai se faiā e faavavau ma le Atua.
I le mataupu e 10,
taʻua ai e tatau i soo o Keriso ona faapotopoto faatasi e lē aunoa
e faalaeiau le tasi i le isi,
ia sili ona faia faapea a o lata mai le iʻuga.
I le mataupu e 11,
e taula‘i atu i le faatuatua,
ma le tele o faaaʻoaʻoga o tane ma fafine Kerisiano anamua,
o ē na malolosi i upu ma galuega ona “o le faatuatua.”
I le mataupu e 12,
o loo taʻua ai nei tane ma fafine lototetele,
ua faia aʻe ai “se vaega e to‘atele o molimau.”
Ona faasino atu lea o le aposetolo i le molimau sili,
o Iesu Keriso,
“le Sui Sili ma o Lē e faaatoatoaina lo tatou faatuatua.”
O le faatuatua e pei o Keriso,
e tatau ona atagia atu i amioga paia.
O lea na apoapoa‘i atu ai Paulo i le mataupu e 13:
“Ia faaauau pea ona faaalia lo outou alofa faaleuso.”
“ Ia faamamaluina e tagata uma le faaipoipoga,”
ma “Ia usiusita‘i i ē o ta‘imua iā te outou.”
A o e faitau i le tusi o Eperu,
mātau le auala na faailoa mai ai e Paulo le sili atu o le tapuaʻiga faa-Kerisiano,
faapefea ona faaatoatoaina lo tatou faatuatua a o faatalitali atu i le iʻuga,
ma le auala e faaaogā ai e le Atua Iesu,
lo tatou Ositaulaga Sili i le lagi ma le Tupu o le Malo o le Atua,
e aveesea le agasala ma le oti e faavavau.

Faatomuaga o le Tusi o Eperu