JW subtitle extractor

Informasons sobri livru di Tiago.
Ten bons motivu pa nu kridita ma é Tiagu,
irmon di Jizus, ki skrebe kel karta li.
El skrebe-l antis di anu 62 D.J.
Na kel ténpu, el ta moraba na Jiruzalen.
Kel karta li ta mostra ma é inportanti ten fé i aguenta firmi
óras ki nu ta pasa pa provasons,
ivita faze kuzas ki Jeová ka gosta,
i mostra nos fé através di kuzas ki nu ta faze.
Sima Jizus, Tiagu uza txeu ilustrason sinplis,
má ku txeu siginifikadu, ku bazi na kuzas normal di dia-dia,
sima óndias di mar,
floris i arvis,
un ómi ta djobe na spedju,
i rikézas material ki ta kaba.
Livru di Tiago ten 5 kapítlu.
Kapítlu 1
ta lenbra-nu pa nu ‘kontinua ta pidi Deus’ pa da-nu sabedoria,
i pa nu faze kel-li ku fé.
El ta lenbra-nu tanbê ma ‘kel ki ta duvida
é sima un óndia di mar, ki béntu ta leba di un ladu pa kel otu.’
Kapítlu 2
ta da un konsedju fórti pa kes ki ta trata rikus midjór di ki póbris.
Óras ki es ta faze si, es sta ta kria divizon
i es sta ta viola ‘kel lei di Rei’ di ama prósimu.
Bu sabia ma,
Tiagu ta pâpia txeu bês di kel diskursu ki Jizus faze na monti?
Pur izénplu, el fla ma nu pode ten alegria mésmu óras ki nu pirsigidu;
ma nu debe faze vontadi di Deus envês di sô obi-l;
i ma, si nu krê pa Deus purdua-nu, nu ten ki púrdua otus tanbê.
Na kapítlu 3,
Tiagu uza txeu ilustrason
pa mostra ma é inportanti nu kontrola nos língua,
inda más kes ki é instrutoris di Palavra di Deus.
Tiagu konpara língua ku alguns kuza sima
freiu na bóka di un kabalu,
lémi di un barku,
lumi i un fonti di agu.
Kapítlu 4
ta splika ma dizejus mariadu ta poi algen ta faze kuzas mariadu.
Tiagu tanbê fla:
‘Ken ki krê ser amigu di mundu
ta bira inimigu di Deus.’
Má, óras ki nu fika kóntra Diabu
i nu ser amigu di Deus, Deus ta ser nos amigu.
Kapítlu 5 ta fla ma Jeová ta ben kastiga kalker algen ki é riku
ô ki ten puder ki ta maltrata otus.
Tiagu tanbê mostra ma é inportanti ten paxénxa.
Sima un agrikultor ta spéra ku paxénxa pa txuba,
nu debe spéra ku paxénxa pa kes promésa di Deus kunpri
através di Kristu.
Timenti kel dia ka txiga,
kalker algen ki fika duenti na sentidu spritual,
debe pidi ajuda di ansions di kongregason.
Manera ki ansions ta uza Palavra di Deus ku amor
i ses orason di fé ta poi kel algen duenti ta bira bon.
Sima bu ta ba ta lé livru di Tiago,
repara ma nunka nu ka debe kulpa Jeová pamodi nos provasons,
ma nu meste sforsa pa kontrola nos língua
i ma nu debe ten paxénxa
timenti nu sta spéra pa Reinu di Deus.