JW subtitle extractor

Omuaraa parau o te buka Apokalupo.
Na te aposetolo Ioane i papai i teie buka i te area tau 96.
I tera taime, ua afaihia oia i te motu o Patamo.
Te haamana‘o ra teie buka i te mau mana‘o o te buka Genese.
Te faataa ra te Genese i te ereraa tatou i te paradaiso.
Area te Apokalupo, te faaite ra ïa nafea ia fana‘o faahou i te reira.
E 22 pene to te buka Apokalupo e e 16 orama tei faahitihia i roto.
I te pene 1 tae atu i te 3,
ua anihia Ioane ia papai i na amuiraa e hitu no Ephesia,
Semurina,
Peregamo,
Tuatira,
Saradi,
Philadelephia
e Laodikea.
I te pene 4 e 5, ua ite orama Ioane ia Iehova i nia i to ’na terono.
Te horoa ra oia i te hoê otaro taatihia e hitu tapao taati i te Arenio, oia hoi Iesu Mesia.
I te pene 6, e ono tapao taati ta Iesu i ofati.
I to ’na ofatiraa i na tapao taati matamua e maha,
e maha atoa puaarehenua faataipehia te horo mai ra.
E faatupu na puaarehenua hopea e toru i te tama‘i,
te o‘e
e te pohe.
I te pene 7,
ua ite Ioane e maha melahi te tapea noa ra i te mata‘i e haamou i teie ao
ia oti roa te tapaoraa o te feia faatavaihia.
E nahoa rahi atoa ta te aposetolo i ite, eita e noaa ia taio,
no roto mai ratou i te mau nunaa atoa e na roto mai ratou i te ati rahi.
Ua ite anei oe?
I te Genese pene 3 irava 15,
ua tohu te Atua e taataahi te huaai o te hoê vahine taipe i te afii o te ophi
tei turai ia Adamu e Eva ia orure hau i te Atua.
Te haapapu ra te Apokalupo o Satani, te Diabolo, taua ophi tahito ra.
I muri a‘e, ua itehia te tuhaa matamua o te huaai o te vahine taipe, o Iesu, te Arii Mesia.
Te parau ra te buka Apokalupo e faatere atoa 144 000 taata e o Iesu.
I te pene 8 e 9, te ofati ra te Arenio i te tapao taati hopea.
Ua ite Ioane e hitu melahi e ta ratou pu.
E faaite te oto o tera mau pu i te mau haavaraa a te Atua i nia i te huitaata.
I te pene 10 e 11,
ua horoa te hoê melahi puai i te tahi otaro nainai ia Ioane
e faaue atura ia ’na ia amu.
I muri iho, faauehia ’tura Ioane ia faito i te hiero e ite atura oia i na ite e piti o te Atua.
I to te hitu o te melahi faaotoraa i ta ’na pu,
faaroohia ’tura te tahi reo puai i te na ôraa:
“Ua riro te faatereraa o te ao i te Faatereraa arii a to tatou Fatu e a ta ’na Mesia.”
I te pene 12,
ua ite Ioane i te fanauraahia te hoê tamaiti o tei afai-oioi-hia i te terono o te Atua ra,
e te huriraahia Satani e ta ’na mau melahi i te fenua.
I te pene 13, ua ite Ioane te mau puaa taehae te faatere nei i te huitaata.
I te pene 14 o te Arenio ïa te tia ra e na 144 000 i te mou‘a Ziona.
I te pene 15 e 16, e hitu melahi te manii ra e hitu au‘a auro î i te riri o te Atua i nia i te fenua.
Te faaite-atoa-hia ra, i te tama‘i rahi o te Atua,
e aro te mau arii i te hoê vahi parauhia Aramagedo.
Te faaite ra te pene 17 e 18
i te hoê vahine taiata piihia Babulonia Rahi
e parahi ra i nia i te hoê puaa taehae uteute ahuru tara.
I muri iho, e haapohe taua puaa taehae ra i tera vahine.
I te pene 19,
e haamou Iesu e ta ’na nuu i te feia ino.
I te pene 20 tae atu 22,
te faaitehia ra te taime e hurihia ’i Satani i roto i te abuso,
te Faatereraa tausani matahiti o te Mesia,
te tia-faahou-raa i nia i te fenua
e te haamouraa o te mau taata e melahi orure hau.
Ua ite atoa Ioane i te Ierusalema apî e te hoê anavai pape o te ora,
e tahe ra no roto mai i te terono o te Atua e to te Arenio
e e tumu raau o te ora i te hiti o tera anavai.
A taio ai i te buka Apokalupo,
a tapao na nafea te Genese pene 3 irava 15 i te faataaraahia i roto i te mau orama a Ioane,
nafea te Atua e faaohipa ’i ia Iesu no te faaore roa i te ino,
e nafea to Iehova hinaaro e faatupuhia ’i i te ra‘i e te fenua, maoti te Faatereraa arii a te Atua.