JW subtitle extractor

Fampidiran̈a bokiny Mpitsara.
Paminany Samoela nanoratra bokiny Mpitsara io,
ke tamy taon̈o 1100 T.K. nivitanizio.
Bokiny Mpitsara io mikoran̈a
raha nandalo tan̈atiny 330 taon̈o,
nanomboko tamy taon̈o kadiriny 1450 T.K. tan̈y.
Raha ten̈a nikoran̈iny boky io ao,
koran̈a momba iro pitsara aby taminy Israely,
ke iro io nampiasainy Jehovah hamonjy olonany
tamy fampijalianolo iro.
Amy toko 1 atsika mamaky fa
iro Israelita aby io tsy ten̈a nan̈adoso
iro panompo sampy aby io tamy tanindro.
Fa iro io ndraiky nampiasaindro hiasa mare tamindro.
Amy toko 2 ahitantsika anjely araiky
nampitandrin̈y iro Israelita aby io fa
baka tamindro tsy nitandren̈y volan̈a Jehovah,
iro olo aby tsy nadosondro tamy tanindro aby io
nitariky iro hanompo sampy.
Amy toko faha-3 firaka 16,
hitantsika ao fa tanteraka volan̈any anjely in̈y,
izikoa fa naty Josoa ndreky taranakanany.
Natetiky iro Israelita aby io
nanompo sampy tamy fotoan̈any zen̈y.
Ke Jehovah neloko tamindro.
Sahiran̈a iro taminio,
ke nitady vonjy tamy Jehovah.
Zen̈y nahavy Jehovah nifidy olo sasany tamindro
natao pitsara han̈avotro iro.
Nisy 12 iro pitsara aby io.
Otniela, Ehoda, Samgara, Baraka,
Gideona, Tola, Jaira, Jefta,
Ibzana, Elona, Abdona ndreky Samsona.
Asa mba hainao?
Iro lelahy aby pitsara koran̈iny bokiny Mpitsara io,
olo nanampinoan̈a,
ke iro nitariky ndreky namonjy vahoakany Zan̈ahary,
Iro man̈eky fa Jehovah ten̈a Pitariky iro,
ndreky Pamonjy iro.
Dikany zen̈y,
iro tsy mira iro pitsara aby aminandra zioty foeky.
Amy toko faha-3, Otniela ndreky Ehoda pitsara,
nankafaka iro Israelita aby io
taminiro nandivoziny panjakany Mezopotamia,
ndreky Moaba.
Amy toko faha-4,
misy paminany vavy araiky Debora an̈arany,
nan̈iraka lelahy araiky manampinoan̈a,
Baraka an̈arany.
Nivolan̈iny taminany fa
Jehovah han̈ampy izy handresy Sisera
ndreky panjaka Jabina, sefony tafikiny Kananita,
fotony iro io nampijaly Israelita.
Jehovah nahavy Baraka
nahavita nandresy tafikiny Sisera jiaby,
fa Sisera ndraiky mbala tsy naty taminio.
Fa nisy man̈angy araiky, Jaela an̈arany,
izy namono Sisera.
Amy toko faha-6 firaka faha-8,
Jehovah nampiasa Gideona pitsara
ndreky maramilanany 300 lahy fo,
namonjy iro Israelita nampijaliandro Midianita aby io.
Toko faha-11 ndreky 12,
mikoran̈a momba Jefta pitsara.
Jehovah nan̈ampy izy,
ke izy nahavita nandresy iro Amonita ndreky Filistiny
nampijaly iro Israelita aby io, tan̈atiny 18 taon̈o.
Toko 13 firaka 16,
mikoran̈a momba Samsona pitsara.
Samsona io Nazirita namezany Jehovah angovo nan̈afahafa.
Samsona koa nitariky tamy
famonjian̈a iro Israelita aby io,
tamy fampijaliandro Filistiny aby io.
Toko faha-17 firaka 21 ndreky,
mikoran̈a raha nandalo talohany raha jiaby zen̈y.
Toko faha-17 mitantara fa
nasiany Mika sampy tran̈onany tan̈y Efraima tan̈y.
Avio nisy Levita araiky tanora nataony pisoron̈o,
Jonatana an̈arany.
Kanefa Jonatana io tsy baka tamy
taranakany pisoron̈o aby.
Toko faha-18 ndraiky mivolan̈a fa
misy Danita mandeha anjatony
tamy lalan̈a handeha handresy foko araiky,
nijanon̈o tamy tran̈ony Mika tao.
Nangalarindro sampy niasainy Mika in̈y,
avio nindesindro Jonatana nataondro pisoron̈ondro.
Toko faha-19 ndreky 20,
nikoran̈a momba iro lelahy Benjaminita
tamy tanànany Gibea,
nametaveta vady heliny Levita araiky.
Niady tamy fokony Benjamina iro foko hafa aby io.
Tsy nimboany nisaziany iro olo aby
nan̈ano raha tsy nanjary io.
Tseky lan̈y ripaka fokony Benjamina taminio.
Anao koa mamaky bokiny Mpitsara,
aleva onon̈o fa ten̈a ratsy miala amy Jehovah zen̈y.
Avio zahava koa fa
Zan̈ahary ten̈a mamindro fo aminolo mibebaka,
ndreky mitady vonjy aminany.
Avio zahava nan̈ino atsika mila matoky
Jehovah Pitsara Farany Mahery io,
fa izy mahavita mamonjy atsika
amindro fahavalo aby io,
aminy alalany Fanjakan̈anany.

Fampidiran̈a Bokiny Mpitsara