JW subtitle extractor

Nu ta sforsa txeu pa linpa i kuida di nos Salons di Reinu.
Nu krê pa kes ki ta ba runion pa primeru bês fika kontenti ku nos Salon di Reinu.
É un priviléjiu ‘konpo kaza di Jeová’.
Má partisipa na kuida i konpo bu Salon di Reinu ta djuda-u di un otu manera.
Óras ki kontise un dizastri na naturéza,
kes kongregason ki ten un bon prugrama di kuida di Salon di Reinu
sta más ben priparadu pa djuda kes irmon di ses kongregason.
Kes irmon ku irmans ki ta oferese pa partisipa
na prugrama di kuida i konpo ses Salon di Reinu,
ta prende alguns kuza inportanti,
sima trabadja ku suguransa i novu manera di faze alguns trabadju
ki é kes primeru trabadju ki ta fazedu óras ki kontise dizastri na naturéza,
sima subi riba kaza, poi lóna, trabadja ku suguransa, uza feraméntas diferenti.
Kel-li é un bon trenu pa un dizastri na naturéza.
Kes irmon ki ta skodjedu pa djuda,
normalmenti é kes ki ta partisipa na kuida di Salons di Reinu.
Pamodi?
Pamodi dja es trenadu pa trabadja ku suguransa i pa faze txeu otus kuza.
Li na Mosanbiki, nu tevi un furakon ki faze txeu stragu.
Má antis di kel-li, irmons di LDC dja trenaba irmons.
Alguns di es faze párti di Kumison pa Djuda i otus analiza kel situason,
es manda informason izatu i es toma kónta di kel trabadju
di faze ô konpo kazas di irmons.
Asi es djuda lógu.
Kel izénplu li ta mostra ma kel trenu li é inportanti.
Na verdadi, sen LDC i kes irmon ki trenadu
ta sérba difísil nu djudaba kes irmon.
Ta da pa odja ma organizason di Jeová é diferenti di kalker otu organizason.
Óras ki bu konpara kuzê ki kes otu algen pasa pa el na kel furakon
ku tudu kel ajuda i amor ki nos irmons resebe, kel-li ta toka nos korason.
Sima nu ta ba ta txiga más pértu di fin,
nu ta meste djuda nos irmons ku irmans más txeu.
Kel ideia di ten irmons trenadu i organizadu pa djuda si kontise dizastri na naturéza
ten bazi na Provérbius 27:10 ki ta fla: “É midjór un vizinhu pértu di ki un irmon lonji.”
Un irmon ki sta lonji é di kunfiansa, má el ka ta konsigi djuda-nu lógu.
Má si nu ten un vizinhu pértu ki sta ben trenadu i ki krê djuda-nu,
nu ta resebe ajuda lógu,
ka ta inporta kuzê ki kontise.
É ka tudu algen ki ta konsigi partisipa na linpa i konpo Salon di Reinu,
má ten txeu otus manera di djuda,
sima da otus koraji,
resebe-s dretu ô sô dexa irmons sabe
ma nu sta prontu pa djuda na kuzê ki meste.
Ô bu ta apoia LDC ô kel prugrama pa kuida di bu Salon di Reinu, bu pode djuda.
Talvês sima bo, txeu algen ta purgunta:
“Modi ki N pode djuda si kontise un disgrasa?”
Nu krê pa bu sabe ma si bu ta djuda na kuida i konpo bu Salon di Reinu,
bu ta sta más priparadu pa djuda irmons ku irmans lógu dipôs di dizastri na naturéza.
Má si inda bu ka sta faze kel-li,
nu ta insentiva-u pa bu djuda na kuida i konpo bu Salon di Reinu.
Obrigadu pamodi bu oferese pa resebe trenu pa sirbi otus.
Trabadju ki bu ta faze ta lova Jeová i ta konsola bus irmons ku irmans.

Nu ta trenadu pa sirbi otus